Read Doyayo HINWƆ HI MITS YOHANA 19 Bible Online

HINWƆ HI MITS YOHANA 19 - Doyayo bible

HINWƆ HI MITS YOHANA 19

¹Yɔ hin wɔrɔ hi daa anbɔ, mi lag an dood saal kit a bɛtha hi bookya̧a̧ hi tɛŋk hi raako: a Haleluya, baanin Bɛto! Za̧a̧tigi, gbɔlumsɛ, hi tɛŋko hi gi a Bɛt ge.

²Dɔglɔgbaak wɔ hi gi rɔbo hi gbɔnɔ! Bɛt gbaas nis kaat ha̧a̧l bɔ gi nɛ ha̧tirgo dood hɛbtdi hi mansnaakɔ wɔ dɔglɛ; gbaasig dɔgl a woosɔya wɔ gbɔ̧hi hi dɔŋgo.

³Hi wɛɛ hi dɔg ɓɛ, a Haleluya, baanin Bɛto! Waal gbɔɔl bɔ laa-uusɔ gi waa dɔɔk bɛtha wɛlɛ hi wɛlɛ!

⁴Ɗɛntɛ yɔ̧ɔ̧lgbun daa nas wɔ hi hinza̧a̧til nas wɔ hi zagl hi ɗɔbs Bɛt yɔ ɗɔɔt a gi waar ums ɗɔɔtillɛlɛ, hi raa: a hɔɔ, aanbɔ, Haleluya, baanin Bɛto!

⁵Mi lag hinza riitin an ya̧a̧booyz a waar ums ɗɔɔtillɛl bɔ ge: a Bɛt woosya ɔ̧ɔ̧ wɛ sɛw, baanin Bɛt wɛ. Dood wɔ hoob gihige ha̧a̧ko, dood tɔs wɔ hi dood nabl wɔ sɛw.

⁶Mi wɛɛ mi lag nams za yɔ riitin an dood saalzanɔ gbɔɔl ya̧a̧boonɛ, an mɛm yɔ gi tuuk zɛɛ gbɔɔl du ya̧a̧boonɔ, wɛɛ an bɛldɔntil gbɔɔl ya̧a̧boonɛ: a Haleluya, baanin Bɛto, ya̧a̧nɛ, Waar wɛ Bɛto Tɛŋkya-Sɛw tal gi ma a gi waar ums du.

⁷Yɛwɛ dag hato, kpoos wɛ kpɛ̧ɛ̧ge, yɛwɛ tɔɔs nuŋgɔ! Ya̧a̧nɛ, Tamwaa bɔ lootinsnaabɔ ɔ̧t tuurɔ. Nis gbaag bɔ gɛms muulɔ da̧a̧da̧.

⁸Nis bɔ heg gbandil buu gaat muul fɛr, gi zuunik Bɛt doodɔ wɔ woosya̧ riit bɔ.

⁹Bɛtwalsɛr bɔ raami: a bi̧i̧mɔ: a hat gi a dood wɔ hi elihi a Tamwaa bɔ gi lottins naab du hi. Wɛɛ dɔgsimi: a Bɛt dɔglɔ rɔbɛ wɔ hii bɔ.

¹⁰Mi zagl gi dɔŋdi an mi ɗɔbsige, hɔnɛ wɛɛ raami: a oom zul mɔ, bɔmɔ gɔ anbɔ! Bee be gi doo woosya an mɔɔ hɛw, hi an namɔza wɔ hi wa̧a̧k dɔgl wɔ Yeesu boo a gi zulɛ hi Baatɔ zulɛ. Ɗɔbsum Bɛto! Yeesu dɔgl yɔ dɔgɔ, gi dɔgl yɔ Bɛt Mɔkilɔ zuun a ya̧a̧ɔ-kɛŋkya wɔ hi ya̧a̧ du giya.

¹¹Yɔ anbɔ, mi gbɛn bɛtha kpɛ̧ɛ̧rɔ, mi wɛɛ mi gbɛn dɔy zaa buu midza. Za̧a̧n bɔ kar hage nuŋgɔ Doo Woosfɔkya hi Doo Rɔbo; gɔ gbaa dɔglɛ, wɛɛ gɔ nɔk hi gbɔnɔ.

¹²Lɔlɔ wɔ hi kabzig du an laazebti, wɛɛ gin waar ums kal gi zul ha kittɔnɔ; gin nuŋg za bi̧i̧k a gi muulɛ, doo za mɛɛ gɛ, gɛ giya.

¹³Heg gbandil hob yɔ bɔɔy a ga̧a̧m du, wɛɛ gɔ hi el nuŋgɔ bɔ: a Bɛt Dɔglɛ.

¹⁴Laaya wɔ bɛtha saalya̧ hi kar a dɔy buudɛ ha hi fɔge, hi heg gbandil buudɛ rɔbɛ muulɛ, gbandilya̧ hi gaa anbɔ fɛr.

¹⁵Daŋbɛsim lɔmnt tuuz a gi ya̧a̧ du an gi gbɔmn dood waaldu. Gi wɛɛ waar hi zulha gi kaŋkinihi sɔɔltusɛ. Gii gi ɓɔ̧ɔ̧ bumhob a Bɛt Tɛŋkya-Sɛw nɔɔtigɔ a gabs wɔd hinɓɔ̧ɔ̧nikya bɔ gedu.

¹⁶Gin nuŋg-bi̧i̧k a gbandilɔ bɔ gi muulɛ hi a gi dɔɔnaa muulɛ: a waar ɛ Waar yɔ, ɗɛntɛ Ɗɛntyɔ.

¹⁷Mi wɛɛ mi gbɛn Bɛtwalsɛr za gi erk a ɔ̧tha ɓooya̧a̧ ha̧a̧ltɔnɔ raa nɔɔs wɔ hi riŋk a bɛtha sɛw: a zaanɛ, mɔksinɛ an nɛ gbob lees gbɔɔl yɔ Bɛt gɛmsɔ,

¹⁸an kuudu nɛ gbob waar ɛ gbɔlɛ wɔ wɔrkya̧, hi laaya gbɔlɛ wɔ nambya̧, hi dood tɛŋkyaadɛ wɔ nambya̧, hi dɔy wɔ nambya̧ hi wɔ hi kar hage nambya̧, hi dood sɛw nambya̧, an doo yɔ gi aakil du, hi yɔ gi gbaari, an dood tɔs wɔ hi dood nabl wɔ.

¹⁹Mi wɛɛ mi gbɛn nambhɛtum ha̧a̧l bɔ hi waar ɛ gbɔlɛ wɔ hɛbtdi hi layaya̧ saal kit wɔ hi mɔks an hi gɔ nɔko hi Za̧a̧nyɔ ɗɔɔt a dɔy ha hi laaya ɔ̧ɔ̧ kit wɔ.

²⁰Hi wa̧a̧ namhɛtum ha̧a̧l bɔ hi Bɛtya̧a̧kɛŋkya ya̧a̧gɔ̧ɔ̧nya bɔ gi gɔk nɛ gɛrs a gi muutdu gi maatingo dood wɔ hi gin nambhɛtum nuŋgɔ muulɛ, hi wɔ hi ɗɔbsig muulɔ bɔ hi wɔmɔ. Hi gbal nambhɛtum ha̧a̧l bɔ hi bɛtya̧a̧kɛŋkya ya̧a̧-gɔ̧ɔ̧nya bɔ za̧a̧til a laazɛŋk ha̧a̧l bɔ gi uuk-uus hob gedu hi eer sɛw.

²¹Wɛɛ za̧a̧n bɔ kar dɔy ha gbɔm dood zaadɛ wɔ hi daŋbɛsim yɔ gi tuuk gi ya̧a̧ du; nɔɔs sɛw hi tɔb nambya̧, wɛɛ buuya̧ hi̧i̧ rurug.