Read Doyayo HINWƆ HI MITS YOHANA 21 Bible Online

HINWƆ HI MITS YOHANA 21 - Doyayo bible

HINWƆ HI MITS YOHANA 21

¹Mi wɛɛ mi gbɛn bɛtha sego hi hɛbtdi sego. Bɛtha biitir bɔ hi hɛbtdi biitir bɔ hi wag lɛlɛ, wɛɛ mɛmbal gbɔɔl bɔ wag be.

²Mi wɛɛ mi gbɛn waal gbɔɔl gaat bɔ Urusalima seg bɔ gi sizig bɛtha a hɛbtdi, gɛms muulɔ an nis lool yɔ gi rek an gi dagz waltɔ.

³Mi lag ya̧a̧ za ɓoot tɛŋkya fu̧u̧z a waar ums ɗɔɔtillɛl bɔ ge: a yɛrɛ Bɛt waabilɔ lɛl gi a dood teesdu ma! Gi waa hi hiya, hii be hi wɛɛ doodɔ. Bɛt hi zulɔ gi waa hi hiya, gii be gi wɛɛsihi Bɛtya̧.

⁴Gi kɔksihi mɛɛkya̧ lɔl du sɛw. Wɔrk gi taa ma, wɔrk ya̧a̧rumsɔ hi kaalɛ hi kosgumnɛ gi taa ma, hin amntɛ wɔ be hi wagɔ.

⁵Yɔ anbɔ, Za̧a̧n bɔ ɗɔɔt a waar ums ɗɔɔtillɛlɛ dɔgɔ: a yɛrɛ be gɔk hin sɛw sego. Wɛɛ raami: a bi̧i̧m hin wɛrɛ: a yɔ anbɔ, dɔgl wɛrɛ hi rɔb dɔglɛ; rii an dood hi gbaa kpoosya̧ hage.

⁶Wɛɛ raam ɓɛ: a hinɔ wooy da̧a̧da̧. Bee gi A hi Z-di, raakɔ a bee gi yɛɛliki hi da̧a̧ki. Za̧a̧nyɔ mɛm gig ha̧a̧ko, be gaag mɛm za̧a̧tigya bɔ gi gburk ya̧a̧rtɔs gi yɔ̧.

⁷Za̧a̧nyɔ ɗɛɛ lɛlɛ gi dag rɔɔs yɛrɛ a beege, bee be wɛɛ Bɛtɔ, gii be gi wɛɛ waa be.

⁸Hɔnɛ dood hoobɛ wɔ, kpoos ɓaatilya wɔ, ɓi̧i̧limya wɛ, zulgbɔŋkya wɛ, mansnaakya wɛ, seesya wɛ, yaaya wɛ, maakfɔkya wɛ hi ya̧a̧gɔ̧ɔ̧nya wɛ sɛw, lɛlya̧ gi gi a laazɛŋk uus ha̧a̧lya bɔ gedu yɔ gi wɔrk eesimɛ.

⁹Bɛt walɛsɛrɛ nɔɔn-er wɔ hi wa̧a̧k nɛ dak wɔ hi hi̧i̧s hi hin ya̧a̧rhantya nɔɔn-er wɔ naan du zaaya̧ gbun bɔ zaa raami: a zaamɔ be zunsum Tamwaa bɔ nisɔ lool bɔ.

¹⁰Yɔ anbɔ, Bɛt Mɔkilɔ kam mɔkil mi, wɛɛ Bɛtwalsɛr bɔ kami a gol za hɔɔt ha̧a̧l zulha, zunsim waal gbɔɔl gaat bɔ Urusalima yɔ gi sizig bɛtha a Bɛt dɔŋdi.

¹¹Waal gbɔɔl bɔ gi gaak hi Bɛt gbɔlumsɔ. Gaakilɔ riitin an zasbayɔ, an bet za yɔ ya̧a̧ gbɛŋkɔ ha̧a̧ltɔnɔ. Gin gbɛɛtɔ kittɔnɔ, lɔl daa du an bɛlɓatiri.

¹²Wɔmnt bɔ hi wɔm hi gɔ̧ɔ̧nig gi hɔɔttɔnɔ, hi ya̧a̧gbar lɛl kooblɛ daa eerɛ. Bɛt walɛsɛrɛ koobl daatɔ eerɛ hi ook ya̧a̧gbarɔ wɔ gbunu gbunu, wɛɛ hi bi̧i̧ Israhila dɔ̧ɔ̧t koobl daa eer wɔ nuŋgya̧ a ya̧a̧gbar koobl daa eer wɔ muulɔge gbunu gbunu a wɛɛha.

¹³Bɛrkɔya̧ wɔ nas sɛw hi gin ya̧a̧gbar taarɛ taarɛ; ya̧a̧gbar taarɛ hi gi a ɔ̧tkazigi, zaadɛ taarɛ hi gi a ɔ̧tkazig-naanrɔbo, zaadɛ taarɛ hi gi a ɔ̧tkazig-naanyɛ̧li, wɛɛ zaadɛ taarɛ a ɔ̧tleki.

¹⁴Waal gbɔɔl bɔ Urusalima wɔmntɔ bɔ hi gɔ̧̄ɔ̧̄nige, ɗɔɔt a sɛŋk koobl daa eer ha. Hi bi̧i̧ Tamwaa bɔ tɔmsɔya wɔ koobl daa eer nuŋgya̧ a sɛŋk wɔ hi muulɛ.

¹⁵Bɛtwalsɛr bɔ gim boozugo, wa̧a̧ bɔ̧ɔ̧kkok yɔ hi wɔmn hɛɛlmɔt gi wɛɛ lɛlgoonikya a naan du, an gi goon waal gbɔɔl bɔ ya̧a̧gbarɔ wɔ, hi wɔmntɔ wɔ hi gɔ̧ɔ̧nɔ.

¹⁶Waal gbɔɔl bɔ tɔlɔya̧ wɔ nas sɛw hi riitin her her, zaa daar zaa gɛ. Bɛtwalsɛr bɔ goo waal gbɔɔl bɔ hi bɔ̧ɔ̧kkok bɔ: waal gbɔɔl bɔ zi̧i̧bilɔ hi fɛɛtigɔ sɛw gi kilomɛɛtre duk eerɛ hi tɛmɛrɛ eerɛ (2200). Fɛɛtigɔ hi hɔɔtigɔ hi zi̧i̧bilɔ hi riitinu.

¹⁷Bɛtwalsɛr bɔ be goo wɔmnt bɔ hi wɔm hi gɔ̧ɔ̧n waal gbɔɔl bɔ, hɔɔtigɔ gi mɛɛtre dumbili nɔɔn-erɛ daatɔ eerɛ (72) anyɔ dood gɔ hi gooko. (Bɛt walsɛr bɔ goo anyɔ dood gɔ hi gooko. )

¹⁸Waal gbɔɔl bɔ wɔmntɔ bɔ hi gɔ̧ɔ̧nɔ, hi wɔmn bet gbɛɛtyaadɛ sɔmsɔm nuŋgya̧ a Zasbayɔ. Waal gbɔɔl bɔ rɔbɔ ɔnɛ hi wɔm hɛɛlmɔto, gaatigɔ an daarugali.

¹⁹Waal gbɔɔl bɔ wɔmntɔ hi wɔmɔ hi gɔ̧ɔ̧nige, sɛŋkɔ bɔ hi wɔŋg hi bet rɔbɛ. sɔmsɔm: sɛŋk biitir bɔ hi wɔmn bet bɔ nuŋgɔ a Zasbayɔ; eesim bɔ betɔ bɔ hi wɔmnɔ gaa an bɛtha, nuŋgɔ a Safirayɔ; taasum bɔ, betɔ bɔ hi wɔmnɔ nuŋgɔ a Agatayɔ; nasum bɔ, hi wɔmn bet bɔ nuŋgɔ Imɛraadyɔ;

²⁰nɔɔntums bɔ, nuŋgɔ a Onikisyɔ; nɔɔn-gbun bɔ, nuŋgɔ a Sardɔnayɔ; nɔɔn-er bɔ, nuŋgɔ a Hirisolidyɔ; gɛ̧ɛ̧sim bɔ, nuŋgɔ a Beerilyɔ; naanza bɔ, Topasyɔ; koobl bɔ, Kirsopareyɔ; koobl daa gbun bɔ, Bettiiko; koobl daa eer bɔ, hi bet bɔ nuŋgɔ a Amɛtiste giya.

²¹Ya̧a̧gbar koobl daa eerɛ hi gin root buudɛ gaatɛ fɛr fɛr koobl daa eer be. Ya̧a̧gbar yɔ gi sɛw gin root gbunu gbunu. Waal gbɔɔl bɔ gbɔnɔɔ gbɔɔl bɔ hi tààn hi hɛɛlmɔt yɔ hi ɔksin hinza dɔɔm du gɛ, gaakɔ an daarugali.

²²Mí gbɛ̄n Bɛtluk za a waal gbɔɔl bɔ gedu gɛ, Waar Bɛt Tɛŋkya-Sɛw hi Tamwaa bɔ hii gi Bɛtluk bɔ hi zulya̧.

²³Waal gbɔɔlɔ be ɛr ɔ̧t gɛ, zaabe ɛr an sɛɛ gi gaa gedu gɛ, Bɛt gbɔlumsɔ bɔ gii gig gaasugo. Tamwaa bɔ be, gii gi laayɔ gi gaasig lɛlɛ.

²⁴Dood waal du hi ɛmb waal gbɔɔl bɔ gi lɛlgaal du, waar ɛ gbɔlɛ wɔ hɛbtdi be hi kamz rɔɔsya̧ a gedu.

²⁵A ɔ̧t du sɛw, waal gbɔɔl bɔ gbɔnɔ wɔ hi kɔŋk aasil anbɔ, yɛms taa hinɔ duhɔ; gɔ hi gboohi gɛ nɛ zaŋ.

²⁶Hi kamz hɛbt wɔ rɔɔsya̧ hi gbɔlumsya̧ duge.

²⁷Yɛrɛ hinza ɓi̧i̧limya taa hinɔ talk a gedu, zaabe za̧a̧nyɔ gi wook hinbɔbtini, zaabe gi gi wook hin ya̧a̧gɔ̧ɔ̧nya. Dood wɔ hi bi̧i̧ nuŋgya̧ a Tamwaa bɔ gi za̧a̧tig ɗɛɛrwol du hii gi gulk a waal gbɔɔl bɔ gedu kpɔd.