Read Doyayo HINWƆ HI MITS YOHANA 22 Bible Online

HINWƆ HI MITS YOHANA 22 - Doyayo bible

HINWƆ HI MITS YOHANA 22

¹Bɛtwalsɛr bɔ wɛɛ zunsim zɛɛ mɛm za̧a̧tigya bɔ gi gaak an daarugali, fu̧u̧ a Bɛt waar ums ɗɔɔtillɛl bɔ ge hi Tamwaa bɔ,

²gi zɔk a waal gbɔɔl bɔ gbɔnɔɔ gbɔɔl bɔ teesɔ gedu. Tɛ̧ɛ̧za̧a̧tigya hi gi a kasiŋ eerɛ wɔ ge sɛw, hi huŋk dɔɔ koobl daa eerɛ wɛl nuŋgo; hi huŋk dɔɔ gbunu a sɛɛ nuŋgo, tɛ̧ɛ̧ bɔ kpasɔ wɔ hi wɛɛ yɛ̧ɛ̧sɛ an hi za̧a̧sin dood hɛbt sɔmsɔm.

³Hinwɔ Bɛt bootɔ zɛ̧hi sɛw zaaɔ taa nɛ duhɔ zaŋ. Bɛt waar umsɔ ɗɔɔtillɛlɛ hi Tamwaa bɔ ɔnɛ hi gi waal gbɔɔl bɔ gedu, wɛɛ woosɔyaadɛ hi gisig hinwooko.

⁴Hí gbɛn Bɛt muutɔ, wɛɛ nuŋgɔ gi bi̧i̧y a hi ti̧i̧l du.

⁵Yɛms hinɔ taaro, wɛɛ hi ɛr laa, zaabe ɔ̧ti an gi gààhi lɛlgaal gɛ. Bɛt gii gi lɛlgaalya̧, hi wɛɛ hi gin waar ums wɛlɛ hi wɛlɛ.

⁶Bɛtwalsɛr bɔ raami: a dɔgl wɛrɛ hi gi rɔbdɔglɛ, rii an hi gbaa kpoosya̧ hage. Waar Bɛt yɔ gi ya̧a̧kɛŋkɔya wɔ mɔkilya̧ wɔ Bɛtya̧, yaaz walsɛrɔ an gi zuns woosɔya wɔ hinyɔ gɔ gi tuur kuudu kaasi.

⁷Yeesu raa: a lagumɔ, kaasi be zaako! Hat gi a za̧a̧nyɔ wa̧a̧ Bɛtya̧a̧kɛŋkya dɔgl bɔ hi bi̧i̧ a ɗɛɛrwol yɛrɛ duge!

⁸Mii Yohana, mi lagɔ mi gbɛn hin wɔrɔ. Wɛɛ yɔ mi da̧a̧s lakɔ hi gbɛnkɔ, mi zagl a Bɛtwalsɛr bɔ zunsim hin wɔrɔ gi dɔɔ dɔŋdi an mi ɗɔbsige.

⁹Hɔnɛ wɛɛ raami: a oom zul mɔ, bɔmɔ woo hin anbɔ! Be gi woosya an mɔɔ hɛw an yɛ̧ɛ̧dɛ mɔ Bɛtya̧a̧kɛŋkya wɔ, hi an dood wɔ hi wa̧a̧k Bɛt dɔglɔ wɔ gi a ɗɛɛrwol bɔ gedu. Ɗɔbsum Bɛto!

¹⁰Wɛɛ raami: a bɔmɔ a̧a̧ Bɛtya̧a̧kɛŋkya Bɛt dɔgl wɔ hi gi a ɗɛɛrwol yɛrɛ gedu sɛw. Ya̧a̧nɛ, ɔ̧tyɔ hi dɛ̧ɛ̧s hin wɔrɔ an gɔ hi midza du sɛ̧ɛ̧bɔ.

¹¹An za̧a̧nyɔ ha̧a̧lɔ, gi gbor hinha̧a̧lɔ bɔ gii wooki; an za̧a̧nyɔ gi libto, gi gbor kɔŋk libto; an za̧a̧nyɔ gi doo riiti, gi gbor hin wook hi gbɔnɔ; an za̧a̧nyɔ gaa a Bɛt muutdu, gi gbor gaaki a Bɛt muutdu.

¹²Yeesu raa: a kaasi be zaako! Be kamzig dɔɔrɔɔsɛ an be gaa za̧a̧nyɔ gi sɛw an woosɔyɔ fɔbɔ.

¹³Bee gi A hi Z-di, bee gi biitiri hi kuudi, bee gi yɛɛliki hi da̧a̧ki.

¹⁴Dood wɔ gɔ hi dokt gbandilya̧ gaattɔnɔ fɛr, hi gin hato; hi dag tɛŋk an hi le tɛ̧ɛ̧ za̧a̧tigya bɔ humlɔ, hi gul a waal gbɔɔl bɔ ya̧a̧gbarɔ bɔ gedu.

¹⁵Yɔ anbɔ kaa wɛ, seesya wɛ, ya̍āya wɛ, mansnaakya wɛ, zulgbɔŋkya wɛ, maakɗɔbsigya wɛ, hi dood wɔ ha̧a̧hi ya̧a̧gɔ̧ɔ̧n woos sɛw, hi kɔm ma ya̧nɛ a waal gbɔɔl bɔ lakɔ ge.

¹⁶Bee Yeesu , be yaa walsɛr be an gi zunsin hin wɔrɔ lab sɛw an nɛ wɛɛ nɛ boo dɔglɔ a lɛlyɔ fɔkbeya wɔ hi mɔksig ge. Be fu̧u̧ a Dawda zaŋg du. Be gi sɛwal yɔ gɔ gaas bi̧i̧l giya.

¹⁷Bɛt Mɔkilɔ hi nis lool bɔ hi dɔgɔ: a zaamɔ! An za̧a̧nyɔ lag anbɔ gi raa hɛw: a zaamɔ! An za̧a̧nyɔ mɛm gig ha̧a̧ko gi zaa. An za̧a̧nyɔ ha̧a̧g mɛm za̧a̧tigya bɔ yɔ̧ko, gi zaa gi yɔ̧ ya̧a̧rtɔs.

¹⁸Mii Yohana, mi dɔgɔ: a za̧a̧nyɔ kɛm Bɛtya̧a̧kɛŋkya Bɛt dɔgl bɔ bi̧i̧y a ɗɛɛrwol bɔ gedu gi wɛɛ gi goo zaa ha hi zulɔ, Bɛt gi gaag ya̧a̧rhant wɔ hi bi̧i̧ a ɗɛɛrwol bɔ gedu.

¹⁹Wɛɛ za̧a̧n za gi ha̧s hinza a Bɛtya̧a̧kɛŋkya Bɛt dɔgl bɔ hi bi̧i̧ a ɗɛɛrwol yɛrɛ gedu Bɛt gi ha̧s za̧a̧tig ɔnɛ bɔ dag nɛ a tɛ̧ɛ̧za̧a̧tigya bɔ gedu hi gulkɔ bɔ a waal gbɔɔl gaat bɔ hi bi̧i̧ dɔglɔ a ɗɛɛrwol yɛrɛ gedu.

²⁰Za̧a̧nyɔ boo hin wɛrɛ, raa: a hɔɔ, kaasi, be zaako! Aanbɔ! Waar Yeesu , zaamɔ!

²¹An Waar Yeesu gɛmsilɔ gigi hi doodɔ sɛw! Aanbɔ!