Read Doyayo HINWƆ HI MITS YOHANA 3 Bible Online

HINWƆ HI MITS YOHANA 3 - Doyayo bible

HINWƆ HI MITS YOHANA 3

¹Bi̧i̧sum fɔkbeya wɔ ɔksilya̧ bɔ a Sardis Bɛtwalsɛrya̧ bɔ hin an yɛrɛ lɛ: a Za̧a̧n bɔ gin Bɛt Mɔkilɔ nɔɔn-er hi sɛwaat nɔɔn-erɛ raa: a be mɛɛ woos mɔ wɔ, be mɛɛ a dood hi gim seek a mɔ gi za̧a̧tilyɔ, wɛɛ mɔ wɔr da̧a̧da̧ be!

²Rɛmha, ɓaasum hinyɔ zɛ̧ɛ̧r hi kolɛ, hinyɔ sɛ̧ɛ̧b wɔrko. Bé zɛ̄m woos mɔ bɛ̄r rɔbtɔnɔ a Bɛt be muutdu gɛ.

³Mɔkum mɔ mɛɛ hinyɔ hi goksum mɔ kɛmɔ. Fɔm hinɔ. Dɛmnaanɛ mɔ ɔɔ hinha̧a̧l mɔ. Mɔd rɛŋ gɛ, be zaa be dumrum an luuri, mɔ taa mɛɛk ɔ̧tyɔ gɔ be dum du.

⁴Yɛrɛ zɛ̧rsum dood zaadɛ kaasi a Sardis, wɔ hi ɓı̧̄ı̧̄l gbandilya̧ gɛ hi rii an hi heg gbandil buu hi ɛmb hi beya.

⁵Za̧a̧nyɔ ɗɛɛ waalɛ be hegsig gbandil buu, bé taa nuŋgɔ pugdig a za̧a̧tig ɗɛɛrwol bɔ gedu. Bé tá̧a̧ nuŋgɔ a Baa be muutɗu hi a walɛsɛrɛ ɔ̧ɔ̧ muutdu be raa a gi doo beenɛ.

⁶Za̧a̧nyɔ gin tɔnɛ gi kɛm hinyɔ Bɛt Mɔkilɔ gi dɔksig fɔkbeya wɔ hi gi lɛl sɛw.

⁷Bi̧i̧sum fɔkbeya wɔ ɔksilya̧ bɔ a Filadɛlfi Bɛtwalsɛrya̧ bɔ hin an yɛrɛ lɛ: a Za̧a̧n bɔ gi Doo gaati a Bɛt muutdu, yɔ gi doo rɔbo, za̧a̧nyɔ gin waar Dawda wɔdɔ gboorinsya naan du, za̧a̧nyɔ gɔ gboor gbɔnɔ doo za gi ɗɛɛ gbook gɛ; za̧a̧nyɔ gɔ gboo gbɔnɔ doo za gi ɗɛɛ gboorik gɛ dɔgɔ:

⁸a be mɛɛ woos mɔ. Be gborsum gbɔnɔ, doo za taan tɛŋk an gi gboo. Be mɛɛ a tɛŋk mɔ tɔɔ gɛ; yɛrɛ mɔ gi fɔk dɔgl be, mɔ́ fāā nuŋg be gɛ.

⁹Kɛmɔ! Be yaazig dood ya̧a̧gɔ̧ɔ̧nya wɔ hi gi raak a be Yahuduyayɔ, wɛɛ hi taa Yahuduya be, wɛɛ mɔksillɛlya̧ gi Saydanu mɔksilluk be, bé raahi hi zaa hi zagl mɔ dɔŋdi an hi mɛɛ a ha̧a̧b mɔ muulɛ.

¹⁰Anyɔ mɔ fɔb dɔgl be mɔ mɔm hin anyɔ be raamɔ, benɛ be oom rɔbtɔnɔ a ya̧a̧rhant ɔ̧tyɔ gɔ gi zaa gi goo dood hɛbtdi sɛw gedu.

¹¹Be zaak nɔɔko; wa̧a̧m hinyɔ mɔ gin rɔbtɔnɔ an bɔ doo za gi zaa gi wɔɔ waar ums kal mɔ.

¹²Za̧a̧nyɔ ɗɛɛ waalɛ, be wɛɛnig tɛ̧ɛ̧ tɛŋkya yɔ gɔ hi esig a Bɛt be lukɔ bɔ gedu giya, hi taag ha̧sig a lɛl bɔ ge. Be bi̧i̧ Bɛt be nuŋgɔ a gi muulɛ hi Bɛt be waal gbɔɔlɔ bɔ Urusalima seg bɔ gi fu̧u̧zig a bɛtha a Bɛt be ge. Be wɛɛ be bi̧i̧ nuŋg be seg a gi muulɛ.

¹³Za̧a̧nyɔ gin tɔnɛ gi kɛm hinyɔ Bɛt Mɔkilɔ gi dɔksig fɔkbeya wɔ lɛl sɛw.

¹⁴Bi̧i̧sum fɔkbeya wɔ ɔksilya̧ bɔ a Lawdikiya Bɛtwalsɛrya̧ bɔ hin an yɛrɛ lɛ: a za̧a̧n bɔ nuŋgɔ a Aanbɔ, yɔ gi segya gi wook hinyɔ raa sɛw, wɛɛ yɔ gi raak rɔbo, za̧a̧nyɔ gi nɛ hin biitir a hinyɔ Bɛt kim gedu sɛw dɔgɔ:

¹⁵a be mɛɛ woos mɔ, be mɛɛ a mɔ taa saŋti wɛɛ mɔ taa sa̧a̧ti! À mɔ gi nɛ saŋti, zaabe sa̧a̧ti, yɔ bɛsibe.

¹⁶Yɛrɛ anyɔ mɔ gi teesdu geli, mɔ taa saŋti wɛɛ mɔ taa sa̧a̧ti, be gidi bed an be wɛ̧mɔ.

¹⁷Mɔ gi raak a be gin rɔɔsɛ, be dag hin rɔbtɔnɔ, hinza ha̧a̧b taa du, kol yaab hinza ma gɛ, yɔ mɔ́ mɛ̄ɛ̄ a mɔ ya̧a̧rha̧a̧k gɛ, a mɔ rii ya̧a̧rmɛɛk gɛ, a mɔ gı̄ ya̧a̧rya gɛ, a mɔ gı̄ yɔ̧ɔ̧ri hi ɔ̧l gɛ giya.

¹⁸Yɔ anbɔ, be gisum raak an mɔ zeb hɛɛlmɔt yɔ hi gaasig laa du a beege an mɔ wɛɛ doo rɔɔsya. Zem gbandil buu an mɔ hegɔ mɔ yaatin ɔ̧lums seemɛ. Wɛɛm mɔ zebs lɔl mɔ yɛ̧ɛ̧sɛ an gɔ mɔ ka̧a̧ gedu mɔ gbɛnlɔl bɛttɔnɔ.

¹⁹Dood wɔ ha̧a̧be hi muulɛ be gisihi hinbɔ̧ɔ̧ko be gihi ya̧a̧rgaako. Rɛmha! Dɛmnaanɛ!

²⁰Yɛrɛ kɛmɔ! Be erk a lukgbarya̧ be ɓaako. Doo gi lag ya̧a̧ be gi gborsib gbɔnɔ, be tal a ge be letinhin hi giya, gii be gi letin hi bee be.

²¹Za̧a̧nyɔ ɗɛɛ waalɛ, bé gaag gbɔnɔ an gi ɗɔɔt be dɔŋdi a be waar ums ɗɔɔtillɛlɛ an bee yɔ be ɗɛɛ waal be ɗɔɔtig a Baa be dɔŋdi a gi waar ums ɗɔɔtillɛlɛ.

²²Za̧a̧nyɔ gin tɔnɛ gi kɛm hinyɔ Bɛt Mɔkilɔ gi dɔksig fɔkbeya wɔ lɛl sɛw.