Read Doyayo HINWƆ HI MITS YOHANA 5 Bible Online

HINWƆ HI MITS YOHANA 5 - Doyayo bible

HINWƆ HI MITS YOHANA 5

¹Mi gbɛn ɗɛɛrwol ka̧a̧ki a za̧a̧n bɔ ɗɔɔt a waar ums ɗɔɔtillɛl bɔ hage gi naanrɔbo. Hi bi̧i̧hin buuɔ du hi kuuha sɛw. Hi wɛɛ hi wɔb hi ba̧a̧n fa̧a̧sya lɛl nɔɔn-erɛ.

²Mi wɛɛ mi gbɛn Bɛtwalsɛr za tɛŋkya gi dɔk hi ya̧a̧ɓooti: a bɔ rii an gi taar ba̧a̧n fa̧a̧sya wɔ gi pid ɗɛɛrwol bɔ nɔ?

³Wɛɛ doo za a bɛtha, zaabe a hɛbtdi, zaabe a fɛ̧ɛ̧sdisɛ ɗɛ̄ɛ̄ an gi pid ɗɛɛrwol bɔ gi sèè hɛw gɛ.

⁴Mi kaa ha̧a̧ltɔnɔ anyɔ doo za taa an gi rii ɗɛɛrwol bɔ pidugɔ, zaabe sɔ̧ɔ̧kɔ gɛ.

⁵Ɗɛntɛ wɔ zaaya̧ gbunu raami: a bɔmɔ kaa! Yɛrɛ Yahuda dɔ̧ɔ̧tɔ naamnɔɔ bɔ Dawda ruutumɔ ɗɛɛ lɛlɛ, dag tɛŋk an gi kaatir ba̧a̧n fa̧a̧sya nɔɔn-er wɔ gi pid ɗɛɛrwol bɔ.

⁶Mi wɛɛ mi gbɛn Tamwaa bɔ gi erk a waar ums ɗɔɔtillɛl bɔ teesɔ gedu, hinza̧a̧til wɔ nasɔ hi ɗɛntɛ wɔ hi gɔ̧ɔ̧ge. Mi gbɛnig an hi gbɛɛrig nɛ gbɛɛrɔ. Gin gur nɔɔn-erɛ hi lɔl nɔɔn-er be. Hin wɔrɔ labɔ hi gi Bɛt Mɔkilɔ nɔɔn-er wɔ hi yaaz a waal du sɛw riitinsɛ.

⁷Tamwaa bɔ rek loo ɗɛɛrwol ka̧a̧k bɔ a za̧a̧n bɔ ɗɔɔt a waar ums ɗɔɔtillɛl bɔ geha gi naanrɔbo.

⁸Yɔ Tamwaa bɔ loo ɗɛɛrwol bɔ, hinza̧a̧til wɔ nasɔ hi ɗɛntɛ yɔ̧ɔ̧lgbun daatɔ nas wɔ hi zagl gi muutdu, bɔbe gi wa̧a̧k ɗɛŋɗɛŋ gi naan du, hi dak za yɔ hi wɔmn hɛɛlmɔto tɛ̧ɛ̧mɛk okt ki̧i̧lhɛmntyayɔ hi̧i̧s gedu. Tɛ̧ɛ̧mɛk okt bɔ gi Bɛt doodɔ gaatɛ zɔ̧ktya̧.

⁹Hi wɛɛ hi ɛɛ hin-ɛɛn za sego: a anyɔ hi gbɛɛrumɔ, ga̧a̧m mɔ bɔ gi wɛɛ inisɛ mɔ tuutsin Bɛt doodɔ zulya̧ aakil du, mɔ riiri an mɔ loo ɗɛɛrwol bɔ, mɔ kaatir baan fa̧a̧sya wɔ. Dood wɔ mɔ za̧a̧sihi hi fu̧u̧ a dɔ̧ɔ̧t wɔ hi gi sɛw gedu, hi a ya̧a̧boon wɔ hi gi sɛw gedu, hi a dood waabil wɔ hi gi sɛw gedu, hi a waal wɔ hɛbtdi sɛw gedu.

¹⁰Mɔ wɛɛnihi Bɛt wáát doodɛ hi Bɛtmaak wookyaadɛ an hi woos Bɛt woosɔ, hi wɛɛ waar ɛ a hɛbtdi.

¹¹Mi wɛɛ mi sɔ̧ɔ̧lɔlɛ, mi gbɛn Bɛt walɛsɛrɛ kittɔnɔ kittɔnɔ hi gɔ̧ɔ̧ waar ums ɗɔɔtillɛl bɔ hi hinza̧a̧til nas wɔ hi ɗɛntɛ wɔ, kitigya̧ tuur duk kittɔnɔ duko duko duk kooblɛ be, mi lag ya̧a̧boonya̧,

¹²hi ɛɛhin hi ya̧a̧ɓooti: a Tamwaa bɔ hi gbɛɛrige, riiri an gi dag tɛŋko, hi rɔɔsɛ, hi hinmɛɛk dubti, hi tɛŋk gbɔɔlɛ, hi ɗɔbsigi, hi gbɔlumsɛ, hi banti.

¹³Mi wɛɛ mi lag hinwɔ Bɛt ki̧hi a bɛtha sɛw, hi a hɛbtdi, hi a fɛ̧ɛ̧sdisɛ, hi a mɛmbal wɔ du, hi hinwɔ hi gi duge sɛw hi hin-ɛɛko: a banti, ɗɔbsigi, hi gbɔlumsɛ hi tɛŋk gbɔɔlɛ hi gi a za̧a̧nyɔ ɗɔɔt a waar ums ɗɔɔtillɛl bɔ hage hi Tamwaa bɔ ge wɛlɛ hi wɛlɛ!

¹⁴Hinza̧a̧til wɔ nasɔ hi ta̧a̧: a Aanbɔ! Ɗɛntɛ wɔ hi zaglɔ hi ɗɔbs Bɛt hi Tamwaa bɔ.