Read Doyayo HINWƆ HI MITS YOHANA 7 Bible Online

HINWƆ HI MITS YOHANA 7 - Doyayo bible

HINWƆ HI MITS YOHANA 7

¹Hɔnɛyɔ anbɔ, mi wɛɛ mi gbɛn Bɛt walɛsɛrɛ nasɔ hi erk a hɛbt yoogil lɛl nas wɔ gedu gbunu gbunu; hi wa̧a̧k zɛk nas wɔ waal du a naan du an bɔhi fɛb a hɛbt di zaabe a mɛmbal gbɔɔl ha, zaabe a tɛ̧ɛ̧ za muulɛ.

²Mi wɛɛ mi gbɛn Bɛtwalsɛr za gi zaako, a ɔ̧tkazigi gi wa̧a̧k Bɛt Za̧a̧til bɔ nuŋgɔ bi̧i̧y a tustaak ha naan du, ɓoos Bɛt walɛsɛrɛ nas wɔ ya̧a̧, wɔ Bɛt gaahi tɛŋk an hi woo bɔbtin a hɛbtdi hi a mɛmbal du,

³a bɔnɛ gɔ hinbɔbtin a hɛbtdi hi mɛmbal gbɔɔl bɔ du hi tɛ̧ɛ̧ wɔ hi muulɛ, gi tuur an be gɔ gbɛɛt a Bɛt wɛ woosɔya wɔ hi ti̧i̧l du kete.

⁴Hi dɔgsim dood wɔ hi gɔsihi Bɛt gbɛɛtɔ ti̧i̧l du kitigya̧: hi gi dood duk tɛmɛrɛ hi duk dumbili nasɔ daatɔ nasɔ (144.000). Dood wɔ hi gɔsihi Bɛt gbɛɛtɔ anbɔ hi fu̧u̧ a Israhilaya dɔ̧ɔ̧t wɔ sɛw gedu.

⁵Dood wɔ hi fu̧u̧ a Yahuda dɔ̧ɔ̧t du hi gbaasihi Bɛt gbɛɛtɔ ti̧i̧l du, hi gi dood duk kooblɛ daatɔ eerɛ (12.000). A Rubɛn dɔ̧ɔ̧t du be, hi gi dood duk kooblɛ daatɔ eerɛ (12.000); a Gad dɔ̧ɔ̧t du be, hi gi dood duk kooblɛ daatɔ eerɛ (12.000); a Aazɛr dɔ̧ɔ̧t du be, hi gi dood duk kooblɛ daatɔ eerɛ (12.000);

⁶a Nɛbtali dɔ̧ɔ̧t du be, hi gi dood duk kooblɛ daatɔ eerɛ (12.000); a Manase dɔ̧ɔ̧t du be, hi gi dood duk kooblɛ daatɔ eerɛ (12.000);

⁷a Simɛyɔŋ dɔ̧ɔ̧t du be, hi gi dood duk kooblɛ daatɔ eerɛ (12.000); a Lewi dɔ̧ɔ̧t du be, hi gi dood duk kooblɛ daatɔ eerɛ (12.000); a Isakar dɔ̧ɔ̧t du be, hi gi dood duk kooblɛ daatɔ eerɛ (12.000);

⁸a Zaabulɔŋ dɔ̧ɔ̧t du be, hi gi dood duk kooblɛ daatɔ eerɛ (12.000); a Yusufu dɔ̧ɔ̧t du be, hi gi dood duk kooblɛ daatɔ eerɛ (12.000); a Bɛnzamɛ dɔ̧ɔ̧t du be, hi gi dood duk kooblɛ daatɔ eerɛ (12.000). Dood wɔ hi gbaasihi Bɛt gbɛɛtɔ ti̧i̧l du hii wɔ.

⁹Kuudu, mi see mi gbɛn saalzanɔ gbɔɔl yɔ hi ɗɛɛ ɓɛrk gɛ, dood wɔ hi fu̧u̧ a hɛbt zaadɛ du, a dɔ̧ɔ̧t zaadɛ du, a dood zaadɛ hi teesdu, hi a ya̧a̧boon yɔ gi sɛw duge, hi gi erk a waar ums ɗɔɔtillɛl bɔ dɔŋgɔdi sɛw hi a Tamwaa bɔ gi muut du hi dimnaan buudɛ muulɛ, hi wa̧a̧ gbaadaak kpas wɔ naan du,

¹⁰hi ya̧a̧ɓooluko: a za̧a̧tig gi a Bɛt wɛ yɔ ɗɔɔt a waar ums ɗɔɔtillɛl ge hi a Tamwaa bɔ ge.

¹¹Wɛɛ Bɛt walɛsɛrɛ wɔ sɛw hi er hi rɔb waar ums ɗɔɔtillɛl bɔ, hi ɗɛntɛ wɔ hi hinza̧a̧til wɔ nasɔ hi zaglik a waar ums ɗɔɔtillɛl bɔ gi muutdu, hi ɗɔbsig Bɛto hi raako:

¹²a Aanbɔ! Rɔbsɛ, gbɔlumsɛ, hinmɛɛk dubti, banti, ɗɔbsigi, tɛŋko hi ɗɛɛti hi gi a Bɛt ge faa. Aanbɔ!

¹³Ɗɛntɛ wɔ zaaya̧ gbun warimi: a bɔ dood wɔ hi heg dimnaan buudɛ muulɛ? Hi bɔ doodya̧? Hi fu̧u̧z ɔnɛ ay?

¹⁴Mi raage: a ɗɛntyɔ, mɔ mɛɛ be, mɔ warim nɔ? Gii wɛɛ raami: a dood wɔ hi fu̧u̧z a ya̧a̧rhant gbɔɔl du hiya. Hi dokt dimnaanya̧ gbɔlɛ wɔ hi wɛɛ hi buusin hi Tamwaa bɔ ga̧a̧mɔ giya.

¹⁵Ya̧a̧nɛ hi gi a Bɛt waar ums ɗɔɔtillɛl bɔ gi muutdu, hi gisig wooswook lurk du hi yɛms du sɛw a gi luk du. Za̧a̧n yɔ ɗɔɔt a waar ums ɗɔɔtillɛl bɔ ge gi hi hiya gi oohi.

¹⁶A̦a̧kil taahi zaa ha̧a̧ko, mɛm taahi zaa ha̧a̧ko, wɛɛ ɔ̧t taahi zaa haak be, lɛltɛɛtil taahi zaa tɛɛk be.

¹⁷Yɔ anbɔ Tamwaa bɔ gi a waar ums ɗɔɔtillɛl bɔ teesɔ gedu yɔ gi nɛɛrɛya̧ gi ka̧hi a mɛm za̧a̧tigya lɛl bɔ gi gburk ge, wɛɛ Bɛt gi kɔksihi mɛɛkya̧ wɔ hi lɔl du sɛw.