Read Doyayo HINWƆ HI MITS YOHANA 8 Bible Online

HINWƆ HI MITS YOHANA 8 - Doyayo bible

HINWƆ HI MITS YOHANA 8

¹Yɔ Tamwaa bɔ pid ba̧a̧n fa̧a̧sya nɔɔn-eesim bɔ ya̧a̧- gbarɔ, lɛl kɔm seseg a bɛtha, am kaasi, sɛ̧ɛ̧b minti dumbili taarɛ.

²Mi wɛɛ mi gbɛn Bɛt walɛsɛrɛ nɔɔn-er wɔ hi erk a Bɛt muutdu, hi gaahi pɔ̧r nɔɔn-erɛ a naandu.

³Wɛɛ Bɛtwalsɛr za zaa er a Bɛtmaaksɛŋk bɔ ge gi wa̧a̧k hɛbyɔ hi wɔmn hɛɛlmɔt a naan du, gɔ hi dɔ̧ɔ̧ts Bɛt tɛ̧ɛ̧mɛk okt ki̧i̧lhɛmntya gedu. Hi gaag tɛ̧ɛ̧mɛk okt ki̧i̧lhɛmntya gbɔɔltɔnɔ an gi gɔn maako gi ɔksin dood gaatɛ wɔ Bɛt muutdu sɛw zɔ̧kya̧ a maaksɛŋk bɔ hi gɔn hɛɛlmɔt geha a waar ums ɗɔɔtillɛl bɔ gi muutdu.

⁴Yɔ gi dɔ̧ɔ̧sig kurum ki̧i̧lhɛmntya bɔ, uusɔ gi dɔɔk bɛtha hi Bɛt doodɔ wɔ zɔ̧kya̧ lɛlgbunu a Bɛtwalsɛr bɔ gi naan du a Bɛt muutdu.

⁵Wɛɛ Bɛtwalsɛr bɔ loo hɛb bɔ hi dɔ̧ɔ̧sig kurum ki̧i̧lhɛmntya gedu hi̧i̧sin hi laa bɔ hi gɔ a maaksɛŋk bɔ ge, gbal a hɛbtdi. Bɛl sɛɛya̧a̧, lɛl dɔntɔ, bɛlya̧bs ya̧bɔ, hɛbt namɔ.

⁶Wɛɛ Bɛt walɛsɛrɛ nɔɔn-er wɔ hi gin nɛ pɔ̧r nɔɔn-er naan du be hi gɛmsig an hi ulɔ.

⁷Bɛtwalsɛr biitir bɔ ul pɔ̧rɔ bɔ, bɛlɓatiri hi laayɔ ɔksin ga̧a̧mɛ hi naŋgz hɛbtdi. Hɛbtlɛl bɔ bɛrkɔ za taasum bɔ hi tɛ̧ɛ̧ wɔ zaadɛya̧ taasumɛ hi hɛtyɛ̧s wɔ sɛw hi dɔ̧ɔ̧dɔ̧.

⁸Bɛtwalsɛr eesim bɔ ul pɔ̧rɔ, hinza tuu an golɛ, laa bige, hi loo hi bisig a mɛmbal gbɔɔl du.

⁹Mɛmbal gbɔɔl bɔ bɛrkɔ za taasum bɔ wɛɛ ga̧a̧mɛ. Hinza̧a̧til wɔ mɛm du zaadɛya̧ taasum bɔ hi wɔrɔ. Wɛɛ lɛmb wɔ zaadɛya̧ taasum hi ha̧tir be.

¹⁰Bɛtwalsɛr taasum bɔ ul pɔ̧rɔ, sɛwal sa̧a̧t an laa kɛs mɛɛz a bɛtha, wɛɛ mɛɛ a zɛɛ wɔ zaadɛya̧ taasum bɔ gedu, hi a mɛmzɔk lɛl wɔ hi du;

¹¹sɛwal bɔ nuŋgɔ a Tɛ̧ɛ̧zobtili. Mɛm wɔ zaadɛya̧ taasum bɔ hi wɛɛ zobtili; yɔ mɛm bɔ zoobɔ, dood kit wɔ hi yɔ̧ mɛm bɔ hi wɔrɔ.

¹²Bɛtwalsɛr nasum bɔ ul pɔ̧rɔ. Ɔ̧t bɔ bɛrkɔ za taasum bɔ ha̧a̧tiro, sɛɛ gbɔɔl bɔ bɛrkɔ za taasum bɔ hi sɛwaat wɔ zaadɛya̧ taasum bɔ hi ha̧a̧tiro; yɔ anbɔ, lɛlya̧ gaal taasum bɔ nimɔ, lurk bɔ bɛrkɔ za taasum bɔ gaa gɛ, yɛms bɔ an gbuna bɔ.

¹³Mi see mi gbɛn seereere gi riŋk a bɛtha tees hɛml-tɔnɔ, gi dɔko hi ya̧a̧ɓooti: a ya̧a̧rhant giro, ya̧a̧rhant giro, ya̧a̧rhant gis dood wɔ hi waak waal du. Bɛt walɛsɛrɛ wɔ hi zɛ̧ɛ̧r hi taarɛ gɔ hi midza hi ul pɔ̧rya̧, dood waal du sɛw hi gin ya̧a̧rhant gbɔɔltɔnɔ!