Read Dulegaya Mateo 27 Bible Online

Mateo 27 - Dulegaya bible

Mateo 27

¹Tegin neg-oiposgu, tule-irwal-Pabzhe-kolmalad-e-tummagan tegin Judio-chelegan-tummagan pel-kwapa igal-mezhismal Jesús-mesgal.

²Tegin tummagan Jesús-etismalgu, Romano-gobernador-Pilatoje Jesús-chesmal. Tegin Judio-tummagan Pilatoga Jesús-ukchamalzhun Jesúsga igal-itogal.

³Tegin Judas-manibal-Jesúsgin-akpitchad takchagu Judio-tummagan Jesús-mesnemal, Judas Jesús-ukchadbal peyedzhe pukib-itononi. Tegin Judas tule-irwal-Pabzhe-kolmalad-e-tummaganga tegin Judio-chelegan-tummaganga mani-chibu-tulabogiid-kwa-tulagwen-kakaambegwad kannan ukchabal. Tegin Judas Judio-tummaganga chogal:

⁴—Imi antin tule-immal-akaloszhulid-ukchadbal, iskuedgin arkwas. Tegin Judio-tummagan Judasga chogalmal: —¡Ankadin iwen-akaldoleged! Wedin pato pegin chii igi aga pe imabídin.

⁵Tegidgin Judas Pabzhe-koled-neg-yabal mani midgu, ilgwen nad. Tegin Judas nadgu, aga tukin kammu-kaal aga mechajun.

⁶Tegin tule-irwal-Pabzhe-kolmalad-e-tummagan, Judas-mani-mided, pél wesmal. Tegin Judio-tummagan chogalmal: —Imi we manigin abe-ariojadbal igal-pal-nikchul Pabga-mani-chabomaladgin chabogal. Wedin izhe.

⁷Al Judio-tummagan aga igal-mezhismal we manigin nap-neg-napcha-nikad pakegal, tule-aknemalad purkwijal, we uangin tigmalgal.

⁸Al we uan imisgwadzhe nug Abe-uan.

⁹Tenal Judasgin immal kujadbal, Pab-kaka-palchoged-Jeremías akpene chogzhagujadyob kunoni. Tenal Jeremías chogzhado:Tulemal mani-chibu-tulabogiid-kwa-tulagwen-kakaambe chusmal.Tenal Israel-tulemal weob-melgu we tulegin mani-wilub nazhismal.

¹⁰Tenal we manigin nap-neg-napcha-nikad paknonimal,Pab Tummad anka chogzhadyob. Zac. 11:12-13 Pilato Jesúsga igal-itojad

¹¹Tegin tulemal Gobernador-Pilatoje Jesús-cheinonimal Jesúsga igal-itogal. Tegin Pilato Jesúszhe ekichial: —¿Ade pede Judiomal-erreyzhí? Tegin Jesús Pilatoga chogal: —Imi pe nabir chogzhado. Antin erreydo.

¹²Tegin tule-irwal-Pabzhe-kolmalad-e-tummagan tegin Judio-chelegan-tummagan Jesús-tuktinonimal. Tenal Jesús yabli Judio-tummagan-kwen-abin-imaszhul, ilgwen yakir pes.

¹³Tegin Pilato Jesúsga chogal: —¿Imi pe itoszhulzhí, tulemal igi pegin chogmal?

¹⁴Tenal Jesús ilgwen yakír pes, kaka kwen kochajul-kus. Tegin Pilato takchagu Jesús ilgwen yakir pes, Pilatodin peyedzhe weob pakal pes.

¹⁵Tenal gobernador kusgu Pab-Najad-Itoged-ilbal Judio-tulemal-chogedbal tule-walgwen-oturdalemaid-ono.

¹⁶Imi teun takalgu, tule-nug-tummad-nikad-walgwen oturdalemai. We tuledin nug Barrabás.

¹⁷Tegin tulemal-pel-kwapa irmanonimalgu, Gobernador-Pilato tulemalzhe ekichial chogal: —¿Toa pe peimal an pega onogal, Barrabás o Jesús? Imi we Jesúsdin nugbal Cristo.

¹⁸Tenal Pilato wisdo, Judio-tummagan nobedbal eje Jesús-cheinonimal, Jesúsga igal-itogal.

¹⁹Tegin Pilato ampa Jesúsga igal-itonaidgin, Pilato-e-ome aga e-macheredzhe kaka palmial chogal: “Imi we tule-immal-kwen-akaloszhulidgin pe melle yoledamogo. Tenal antin imis-oipos kabdas anmal we tulebal peyedzhe wiledii.” Tenal Pilato e-omebal kwen ibzhaszhul.

²⁰Tenal tule-irwal-Pabzhe-kolmalad-e-tummagan tegin Judio-chelegan-tummagan tulemal-pinzheed-kasmal Pilatoga choggal: “Pe Barrabás-onogo, tenal Jesúsdin pe mejo.”

²¹Tegin Pilato tulemalzhe kannan ekichialbal chogal: —¿Imi we tule-walbogid, piti pe peimal an pega ono? Tegin tulemal Pilatoga chogalmal: —Barrabás pe anmalga onogo.

²²Tegin Pilato tulemalzhe ekichialbal; —¿Imi we Jesús, tegin pemal-pimalbalid-Cristo, an igi chaojun? Tegin tulemal-pel-kwapa pulal Pilatoje kotemal chogalmal: —¡Nakrusgin pe Jesús-pioko!

²³Tegin Pilato tulemalzhe ekichial: —¿Ibigadé? ¿We tulede, ibi akalos-ade, an tar-piokkal? Tenal tulemal pul-pule pulal kigma kotemal chogalmal: —¡Nakrusgin pe Jesús-pioko!

²⁴Tegin Pilato taknoni igal-keg-pel-nudale. Tenal Pilato takchabalgu tulemal pul-pule urwedanimal, ti amis, tulemal-wagin tigin-chunkal-enukkal oyogal, ede we immalgin pal kwen yolenejul. Tegin Pilato tigin chunkal enusgu, tulemalga chogal: —Imi pe we tule-mechamalal, pato ankin chijul, wedin pato pemalgin chii.

²⁵Tegin tulemal-pel-kwapa Pilatoga chogalmal: —Imi anmal we Jesús-mechamalal, anmalgin pato chii, tegin anmal-wagwagangin pato chimalmo.

²⁶Tegin Pilato tulemalga Barrabás-onoszhun. Tegin Pilato e-chulubmalga chogzhajun peyedzhe Jesús-ebiomalgal. Tenal Pilato Judiomalga igal-ukchabal nakrusgin Jesús-piokmalgalbal. Romano-chulubmal Jesúsgin istar todosmalad

²⁷Tegin gobernador-chulubmal e-neg-tummad-yabal Jesús-odosmal. Tegin we chulubmal pel-kwapa e-pakamalad-aka-pukmaladzhe kochamal. Tegin chulubmal-pel-kwapa nonimalgu, pulal Jesús-ebiris ampagunonimal.

²⁸Tegin chulubmal Jesúsgin mol echusmalgu, erreyyob Jesúsgin mol-kinnid yosmal.

²⁹Tegin chulubmal tub-iko-nikad kwilomasmalgu, Jesús-nonogin iko-kurkin chismalzhun. Tegin chulubmal Jesús-chunkal-nuedzhik Jesúsga kabaston ukchamalbal. Tegin chulubmal yami Jesúsgin todoedgin Jesús-abir chimtinonimal chogalmal: —Judio-erreyye, imi pe ilagwen-nadgu tummadga mailen, nabirinye.

³⁰Tegin chulubmal Jesúsgin kwi mialmal. Tegin chulubmal Jesús-e-kabaston-kanikidgin kannan-kannan Jesús-nono-okosmal.

³¹Tegin chulubmal pél Jesúsgin todosmalgu, Jesúsgin mol-kinnid echusmal. Tegin chulubmal kannan Jesúsgin e-mol yosmalbal. Tegin chulubmal Jesús-chesmalzhun, nakrusgin Jesús-piokkal. Chulubmal nakrusgin Jesús-piokchamalad

³²Tegin chulubmal nakrusgin Jesús-piokkal Jerusalén-neg-kwebur-akar aknidmalgu, Cirene-tol-walgwen-abingusmal e-abin tani. Tenal we tuledin nug Simón. Tenal chulubmal kantikidgin Jesúsga-nakrus-chedgal Simón-imasmal.

³³Tegin chulubmal Gólgota-neg-nugadzhe nonimal. Tenal Gólgota choglege: Tule-Nono-Kal-Yal.

³⁴Tenal chulubmal Gólgota-yalzhe nonimalgu, Jesúsga immal-kakpid-vinobak-obural ukchamal kobgal, Jesús melle twagdar nakpi-itogal. Tenal Jesús íche itosgu, yapa pal kobgus.

³⁵Tegin chulubmal nakrusgin Jesús-piokchamalgu, Jesús-e-molgin todoalmal toa pul-melu aga Jesús-mol chumalo.

³⁶Tegin chulubmal aka ampagusmal Jesús-takegal.

³⁷Tenal chulubmal nakrus-tukugin nermakal karta nazhismal tulemal wisgal ibiga Jesús-purkweenab. Imi we kartagin nermakal naigusdo: WE TULE, JESÚS JUDIOMAL-E-ERREY

³⁸Imi teun chulubmal nakrus-pidgin egek walbo tule-immal-aturzhemalad-piokchamalmo, kwén Jesús-nuedzhik, kwéntin Jesús-chapilezhik.

³⁹Tenal tulemal-igalbal-irmamamimalad istar Jesúsgin chunmakaldamal, tegin Jesúsga chagla pin-pin kualdamalbal.

⁴⁰Tegin tule-irmamamimalad Jesúsga chogaldamalbal: —Imi pedin chogzhado: ‘An ilgwen Pabzhe-koled-neg eyarne, tegin an ibapágin kannan pél chobbalo.’ Imis pe weob chogzha-choggu, imisgin aga tukin pe abonodo. Imi pe Pab-Machi-chogel, pe nakrusgin-naid-akar pe aktedo.

⁴¹Tenal tule-irwal-Pabzhe-kolmalad-e-tummagan tegin Moisés-igalgin-tulemal-oturdamalad tegin Judio-chelegan-tummagan ampa istar Jesúsgin chunmakalmal chogalmalmo:

⁴²—Imi Jesús tule-pimalad-abonos. Tenal Jesús aga tukindin keg abonogus. Imi we tule anmal-Israel-tulemal-e-erreyelen, nakrusgin-naid-akar akteoen. Agin, anmal kep we tulegin ibzhenonimaloen.

⁴³Tenal we Jesús Pab Tummadgin kwen penzhul-kus, tegin chogzhabaldo, ede Pab-Machi. Al Pab Tummad yer Jesús-takel, nakrusgin-naid-akar Jesús-odeodo.

⁴⁴Tenal tule-walbo-immal-aturzhemalad-Jesúsbak-pioklesmalmogad, ampa Judio-tummagan-yopí istar Jesúsgin chunmananimalmo. Jesús nakrusgin-nai purkwijad

⁴⁵Tegin yoroku-akar wachilapáje neg-pel-kwapa chichidbi naigus.

⁴⁶Tegin wachilapágin Jesús sapejul kolmas, e-kakagin chogal:“Elí, Elí, ¿lema sabactani?” (Wedin choglege:An-Pab-Tummadye, an-Pab-Tummadye, ¿ibiga pe an-meteye?) Sal. 22:1

⁴⁷Tegin tulemal-aka-kwen-pukmalad Jesús-chogzhad itosmalgu, chogalmal: —Pe pito, we tule Pab-kaka-palchoged-Elías-akpenegwadzhe kolnai.

⁴⁸Tegidgin tule-walgwen abarmad upchanyob-immal-tutu amigal. Tegin tule immal-tutu onosgu, vino-choledgin wartichas. Tegin we tule chowal-tukugin immal-tutu yosgu, Jesúsga ukcha nugal.

⁴⁹Tenal tule-pimalad tule-Jesús-pentanaidga chogal: —Meke nai; anmal takegal Elías noniko-dewa o chul-dewa Jesús-abonogal.

⁵⁰Tegin Jesús kannan sapejul kotegu, ilgwen purkwis.

⁵¹Tegidgin Pabzhe-koled-neggin mol-naid apallala islis, nikpa-akar ulpalidzhe. Tegin neg pela-pela tutumas, tegin akwa-tummagan mamarisbal.

⁵²Tegin uangin akwa-yamal arkas-nadmal. Tegin tule-Pab-nued-wismalad-akpene-pato-purkwismalad-ichejul kannan tullesmal.

⁵³Tegin tulemal-kannan-tullesmalad uan-akar aknismal. Tenal Jesús kannan-tullejad-cholbal, tule-kannan-tullesmalad kep neg-kwebur-chwilidikid-Jerusalénzhe togzhamal. Tenal tule-kannan-tullesmalad ichejul tulemal-pukmaladga nononimal.

⁵⁴Tegin chulub-tummad-Jesús-takkwichid e-pakamaladbak neg-tutumaked itosmalgu, tegin pél immal-kunaid takchamalbalgu, peyedzhe kwakialmal. Tegin chulubmal chogalmal: —¡Imi we tule chunchunnad Pab-Machi-taklebalí!

⁵⁵Tenal teun takalgu, omegan-ichejul panna Jesús-takpukmal. Tenal we omegan Jesúsbak Galilea-akar nonimal Jesús-pentagal.

⁵⁶Tenal we omegan-nonimalad-abalgin, María Magdalena, Santiago-tegin-José-e-nan-María, tegin Zebedeo-machimal-e-nan pukwamalmo. Tulemal Jesús-mui-tigzhamalad

⁵⁷Tegin tad-arkwandanigu, Arimatea-tol-mani-ibed-walgwen noni. We tuledin nug José. Tenal we Josédin Jesúsbal-turdaked-tulemo.

⁵⁸Tenal José nad, Pilatoje Jesús-mui ekisgal. Tegin José Pilatoje Jesús-mui ekichisgu, Pilato chulubmalga kaka-palmialzhun Joséga Jesús-mui uko.

⁵⁹Tegin José nakrusgin-naid Jesús-mui odesgu, mol-chibugin Jesús-mui ebirmas.

⁶⁰Tegin José Jesús-mui ches uanzhe. Tenal José akpene aga akwa-ya akis, ede purkwijal, aka-tégin e-tigmalgal. Tenal José we akwa-ya-pingin Jesús-mui tigzha. Tegin José akwa-tummadgin ya chaktisgu, nadzhun.

⁶¹Tenal José Jesús-mui-tignaigu, María Magdalena tegin María-pid uan-abin-opakal takpuk-kusmalmo. Tummagan chulubmal-urpijad uan takegal

⁶²Tegin te pangin, Immalmal-Nudaked-Ibe-cholbal, tule-irwal-Pabzhe-kolmalad-e-tummagan tegin Pariseomal Pilatoje nadmal.

⁶³Tegin Judio-tummagan Pilatoga chogalmal: —Tummad, imi anmal ampa wismaldo, we tule-kakanchili-imis-purkwijad ampa tuladgin chogzhagusdo, ede ibapágin kannan tullebalo.

⁶⁴Al anmal pei, pedin ibapá uangin chulubmal-urpo Jesús-mui-takegal. Chulil, Jesús-e-chapingan mutik e-mui-aturzhenoniko-dewa. Tenal Jesús-e-chapingan Jesús-mui-aturzhajal, tulemalga chognonimalo: ‘Jesúsde kannan tulles.’ Imi an-chogzhadyob kunonikil, akpene-immal-kujadga pul-pule tulemal yardalenonimalo.

⁶⁵Tegin Pilato Judio-tummaganga chogal: —Nabir. Tegil pe chulubmal-chedmaldo uanzhe. Tenal pemal nue takenabmal tulemal melle Jesús-mui-aturzhegal.

⁶⁶Tegin Judio-tummagan chulubmal-chesmal uan takegal. Tegin Judio-tummagan akwa-tummadgin sello nazhis melle akwa onirmalgal. Tegin Judio-tummagan pukwa chulubmal-ebesmalzhun uan takegal.