Read Dulegaya Romanos 10 Bible Online

Romanos 10 - Dulegaya bible

Romanos 10

¹Kwenadgan, imi an ulubgin napírra peigujiindo, tegin an Pabzhe pela-pela kolaldabal, Israel-tulemal Pabbal abonolenonimalgal.

²Imi antin Israel-tulemalgin chogmodo, Israel-tulemal chunchunnad Pabga immal imabimalan. Tenal Israel-tulemal immal-kwen-wichulidbal immal imakaldamal.

³Tenal Israel-tulemal kwen wichulmal Pab tar-pentabi-kunain tule-iskued-nikchulidga kunonigal. Tegin Israel-tulemal aga tukin alamadi-kusmal, tule-iskued-nikchulmaladga aga imagal. Al Israel-tulemal Pab-kwen-abingaszhulmal, tule-iskued-nikchulidga kunonigal.

⁴Imi Moisés-igal-mamikid Cristobal pelgunoni, tule-pel-kwapa-Cristogin-penzhulmalad tule-iskued-nikchulmaladga kunonigal.

⁵Imi Moisés tule-iskued-nikchulidgin chunmasgu, Moisés-igal-mamikid-pallí-nanediidgin chunmadi-kus. Tenal Moisés chogzhado:Imi tule we igal-mamikid-pallí naneel,we tule tullego. Lv. 18:5

⁶Tenal tule-Cristogin-penzhulidbal-iskued-nikchulidga-kunonikid-igal chogdo:Pe melle aga ulubgin pinzhedamalo:“¿Toa Pab-negzhe togo(iti-napche Cristo-chedagal)?” Dt. 30:12

⁷“¿Toa napil-ulpal nao(purkwal-maid-akar kannan Cristo chedagal)?” Dt. 30:13 Keg kue.

⁸Tenal Pab-kartagin chogdo:Pab-kaka-nuegan pato pe-waglik kudii,pe akne-need wichul,Pab-kaka pal amigal.Imi Pab-kaka-nueganpato pe-ulubgin mai,tegin pe-uabal choglenaibal. Dt. 30:14 Tenal anmal Cristogin-penzhulidgin we kakagin chunmananimal.

⁹Imi pe aga kakagin chogzhal: “Jesús pul Tule-Tummadga mai,” tegin pe aga ulubgin kwen penguszhulbalil, Pab Tummad purkwaled-akar Jesús-otulos, pedin ilagwen-nadgu abonolego Pab Tummadzhe melle sapejul oturdalegal.

¹⁰Imi pe chunchunnad aga ulubgin Cristogin penzhulil, kep pe tule-iskued-nikchulidyob kunoniko. Tegin pe tulemal-wagin Jesúsgin chogzhal: “Jesús Pul-Tule-Tummad,” kep pe unniguo abonolegal.

¹¹Imi Pab-kartagin ampa chogmodo:Imi meke-ibi-tule we tulegin penzhulil,kwen pinkeguojul-kuo. Is. 28:16

¹²Imi Pab akal-akal tule-kwen-takchul, pel yopígwadbi Judiomal-tegin-Judiojulmalad-tak. Imi Pab pel-kwapa-tulemal e-tummadga mai. Tegin Pab tule-pel-kwapa-eje-kolmaladga wilub-okpis immal imabal. Imi Pab-kartagin chogdo:

¹³Imi meke-ibi-tule Pab Tummadzhe kolnail,we tule abonolegoPab Tummadzhe melle sapejul oturdalegal. Jl. 2:32

¹⁴Tenal tule Jesucristogin ampa ibzhejulil, ¿tede we tule igi Pab-Jesúszhe kolnoniko? Keg kue. Tenal tule ampa Jesucristo-igal kwen itodijulil, ¿tede we tule igi Jesucristogin ibzhenoniko? Keg kue. Tenal tule-kwen-nikchulil, Pab-kaka-nuegangin tulemalga chunmagal, ¿tede we tulemal igi wisgumalo Jesucristo ibi-tule? Keg kue.

¹⁵Tenal tule kwen palmileszhulil Pab-kaka-nuegangin chunmagal, ¿tede we tule igi tulemalga Jesucristo-igalgin chunmanoniko? Keg kue. Imi Pab-kartagin ampa chogmodo:Imi tule-Pab-kaka-nuegan-palchogdanikil,ibi tar-nued. Is. 52:7

¹⁶Tenal Israel-tulemal-pel-kwapa Pab-kaka-nuegan kwen abingaszhulmal. Imi akpene Pab-kaka-palchoged-Isaías ampa chogzhamodo:Pab Tummadye,¿toa pe-kaka-palmijadbal ibzhao?¿Tulemal walpókwajal pegin ibzhaojulzhí?Teobdo. Is. 53:1

¹⁷Imi tule Pab-Jesucristo-igal-itononikidbal kep Pab-Jesucristogin ibzhenoniko. Tenal Cristo-kakapurwagin tule kep wisgunoniko Pab-Jesucristo-igal, igi.

¹⁸Al an ekisbimojundo: ¿Tegil Israel-tulemal Pab-kaka-nuegan kwen itodijulmaldé? ¿Al Israel-tulemal weob chogyé? Chulá. Tenal Israel-tulemal Pab-kaka-nuegan itosmaldo. Imi Pab-kartagin chogmodo:Imi napa-naid-ugakche,Pab-kaka mimiles,tegin tule-napi-pukwamaladzhePab-kaka pel mimilesbal. Sal. 19:4

¹⁹Imi an kannan pemalzhe ekisbibaldo: ¿Imi Israel-tulemalde chunchunnad aku itomalá? Chulá. Imi kepegin Moisés chogzhado:Pab Tummad chog:“Imi an tule-pimaladga immal-nuegan imakedbal,ankin nobgu pemal-imanoniko.Tegin tulemal-an-tulejulmalad-immal-wichulmaladbal,an istar-itogal pemal-imamalbalo.” Dt. 32:21

²⁰Tegin Isaías tobzhulidgin chogzhamodo:Pab Tummad chog:“Imi tule-an-amiszhulmalad an-amismal.Tegin tule an-ekichiszhulmaladgaan oyos antin toa-tule.” Is. 65:1

²¹Tenal Isaías Israel-tulemalgin chogzhado:Pab Tummad chog:“Imi antin wakur-akar-chedojepemalzhe chunkal oyonai, anche taggal.Tenal pemal yapa anche tagmal,tegin an-choged-pallí immal kwen imaszhulmalbal.” Is. 65:2