Read Dulegaya Filipenses 2 Bible Online

Filipenses 2 - Dulegaya bible

Filipenses 2

¹Imi pemal Pab-Jesúsbak-mes-tiidbal okannolediil, tegin pemal Pab-Jesús-pilaledbal yer-itodiil, tegin pemal Pab Purpa Nuedbak tiil, tegin pemal ankin-pinzheedgin wilejakwa an-taktiil,

²pemal pela-pela weligwal an-imako. Al pemal aga pulakwa naneenabmal, tegin pemal aga emal-emal yopí pilalguenabmal, tegin pemal aga choggwénnagwadgin yopí pinzheenabmalbal.

³Tenal pe melle tule-tummadga-togbiedyob immal imako, tegin pe melle tummarba-itogedgin immal imamalbalo. Tenal pemal melle tule-tummaganyob nanemalo, tenal pemal aga emal-emal tule-tummaganyob takmalo.

⁴Imi pemal melle aga tukinbi pinzhemalo, tenal pe tule-pimaladgin ampa pinzheenabmalmo.

⁵Tenal pemal Pab-Jesús-pinzheedyob pinzheenabmal.

⁶Imi Jesucristo Pab-chunchunnaddindo,tenal Jesucristo kwen pinzhaszhul-kus,Pab-Tummad-yopí tummadga nanegal.

⁷Tenal Jesús iti-napche tuleyob mimmilenonigu,tule-pinchegadga aga imas,tegin tule-mosyob kudigusbal.

⁸Tenal Jesús iti-napkin tuleyob tigusgu,tule-tummadzhulidyob aga imas,tenal Jesús aga e-Pab-pallí ibzhedi-kusbale nakrusgin purkwijadzhe.

⁹Al Pab Tummad pul-tule-tummadga Jesús-odos.Tegin Pab Tummad Jesúsga,egmal-tulemalga pul nug-tummad ukchabal.

¹⁰Te-ulgin tule-nikpa-negginmalad,tegin tule-iti-napkinmalad,tegin tule-napil-ulpal-mamimalad Jesús-takalmalal,Jesús egmalga-pul-tule-tummadiidbalJesúsga chimtinonimalo,

¹¹tegin we tule-chogpágwad-pel-kwapaaga tukin chogdamalo:“Pedin-Jesucristo, Pul-Tule-Tummad.”Al tulemal-Jesúsgin-chognonimaloedbal,Pab-Tummad-nug pela-pela otummolenoniko. Jesúsgin-kwenamalad oyonaid Pab-igaldin igi mai

¹²An-aimal, an-pemal-pilalmalad, imi an pemalbak maigusgu, pemal an-choged-pallí nanedi-kusmal. Imi an pemalbak tikajulgus maichulidgin pemal pul-pule an-choged-pallí nanedimalbal. Al pemal Pab-tobedgin, tegin Pabgin-atagedgin tegin pe abonolejadgin pe nuekwa takenabmal pe nued nanebukmal-dewa.

¹³Tenal Pab pemal-ulubgin e-itolegedbal arpanaidbal, pemal Pab-choged-pallí nanebi-kudamalo.

¹⁴Tenal pe melle chochoedgin immal imako, tegin pe melle tulebak abin-abinidgin immal imabalo,

¹⁵pe tule-napírragwadga kugal, tegin tulemal melle pemalgin ib-choged nikugal. Al pemal tule-iskana-abalgin, tegin tule-immal-akalosmalad-abalgin, pe Pab-nuskanyob immal-akaloszhulidgin kudigumalo. Tenal an-pemalga-chogzhadyob pe nanedimalal, iskwa neg-chichidgin kaedyob pe neg otalomalo.

¹⁶Tegin pemal Pab-Jesús-kaka-nuegangin tulemalga chunmananimalo, igi nabir purpal tullemalo. Al Cristo iti-napche kannan tanikil, antin, an yer-itogedgin pemalgin chogo: “An pinche kwen nanedi-kuszhul, tegin an pinche kwen arpaszhulbal.”

¹⁷Tenal pemal Pabgin kwen penzhulmal, tegin pemal Pabga arpamalbal Pabga-immal-ukedyob. Tenal an purkwenonikil, antin Pab-Tummadga-immal-ukchad-askin napi-nis eyonaidyob kunoniko. Al antin yer-itononiko, tegin an pemalbak mes welgunonimogo.

¹⁸Al pemal yer-itogenabmal, tegin pe anpak mes welgunonimalmogo. Pablo Filiposzhe Timoteo-palmineed

¹⁹Imi Pab anka igal-ukchal, an imichal pemalzhe Timoteo-palminatapo. Tenal an pemal-wisgujal pemal nuekwa Pab-Jesúsbak nanebukmal, an yer itononiko.

²⁰Tenal antin tule-pid-pal-nikchul pemal-pentagal. Tenal Timoteobi napírra pemal-pentabi-kunaimo.

²¹Tenal tule-pimaladdin aga tukinbi pinzhemal, Pab-Jesucristo-tulemal-pentabiedyob kwen pinzhejulmal.

²²Tenal pemal pato wismaldo, Timoteo igi nane. Imi Timoteo peyedzhe Pab-kaka-nuegan-chogedgin an-pentadi-kus, an-machi-chunchunnadyob.

²³Imi an nuekwa wisgujal anka igi kunoniko, kep an pemalzhe Timoteo-palminejun.

²⁴Tenal an penzhuldo, an imichal Pab-chogedbal pemalzhe natapmogo. Pablo kannan Epafrodito-palmijogalid

²⁵Imi an takto, an pemalzhe pul-nabir kannan kwenad-Epafrodito-palmio. Imi we machi an-pakad, tegin anpak-mes-arpagedbal. Tenal we machi anpak mes alamasbal Pab-Jesús-kaka-nuegan palchoggal. Tenal pemal nugu-pinzheedbal anka Epafrodito-palmismal an-pentagal.

²⁶Imi Epafrodito peyedzhe pemal-takpi-kudii. Tenal pemal e-wisgusmaladbal ede yegus, al Epafrodito peyedzhe pukib-itononibal.

²⁷Imi pemal nabir wisgusmaldo, Epafrodito peyedzhe-pakal yegus, iche-napi purkwenen. Tenal Pabdin wilejakwa-Epafrodito-takchadbal kannan Epafrodito-okwichisbal. Tenal Pab wilejakwa Epafroditoginbi pinzhaszhul, tenal Pab ampa wilejakwa an-takchamo, an melle twagdar peyedzhe pukib-itogal.

²⁸Al an pemalzhe kueye-kueye Epafrodito-palmine pemal Epafrodito-takalmalal, pemal weligwal itomalgal, tegin an melle pukib-pal-itogalmo.

²⁹Tenal pemal Jesúsgin aga kalgwenadyob ampokaal weligwaledgin Epafrodito-abingemalo. Tenal pemal tule-Epafroditoyobmalad pe otummoenabmalbal.

³⁰Imi Epafrodito Pab-Jesúsga arpanaid-ulgin, iche-napi purkwenen pemal-anal aga tukin igal-puledgin togzha an-pentagal.