Read Dulegaya Hebreos 3 Bible Online

Hebreos 3 - Dulegaya bible

Hebreos 3

¹Kwenadgan-Pabzhikmalad, imi Pabdin ampa pemal-chusmalmo-choggu, al pemal Jesúsginbi pinzheenabmal. Tegin anmal chogmalbal: “Jesús, anmal-Tummad.” Tenal Jesús, Pab-Tummad-nuggin-palmilegalid tegin tule-irwal-Pabzhe-koled-pul-tummadbal.

²Imi Moisés Pab-neg-yaginmalad-abalgin inniki nanedi-kujad-yopí, Jesúsdin Pab-choged-pallí nanedi-kusmo, akal-akal kwen nanaszhul-kus.

³Imi tule-neg-chobed pul nug-okannoleged-wilub, pul neg-choblejadga. Al Jesús Moisésga pul nug okannoleged-wilubmo.

⁴Imi pe takalil, neg pato chobal chii, pe wiis tule-walgwen we neg chobzha. Tenal Pabdin pel-kwapa immalmal opinnis.

⁵Imi Moisés Pab-neg-yaginmalad-abalgin mosga inniki arpadi-kus. Tenal Moisés chogzhagusdo, we kakade kujal-choglenoniko.

⁶Tenal Cristo Pab-Machidbal inniki Pab-neg-yaginmalad-takchii. Al anmal Pabgin pengunonijulil anmal-tobzhulidgin-tulemalga-chogzhadyob Pab anmal-abonogo, anmaldin Pab-neg-yaginmaladmo. Pe nuekwa aga takermal melle Pabgin pengugal

⁷Al pe Pab-Purpa-Nued-chogedyob pe imakenabmal. Tenal Pab Purpa Nued Pab-kartagin chogdo:Imis pe Pab-kakapurwa itogel,

⁸pedin, pe melle chogo: “Chul.”Pedin Pab-kakapurwa abingeenabmal.Tenal pe-tadgan akpene neg-nikchulidbalPab Tummadgin abin-kwisgunonikidyob,pe melle kumalo.Tenal pemal-tadgan Pab-Tummad-wilub-takchadyob,pe melle kumalbalo. Sal. 95:7-9

⁹Tenal Pab Purpa Nued Pab-kartagin tadgangin chogbaldo:Imi teun pe-tadgan pirka-tulaboan-immal-imajad takchamal,tenal pe-tadgan yabli an-wilub-takti-kusmal,tegin an-kwen-itoszhulmalbal.

¹⁰Al antin pe-tadganbak sae-itononigu,an chogdejun:“Imi we tulemal keg-chulguimmal-akaloedgin pinzhemal.Tenal we tadgan an-igal-mezhijadbalkwen nanebijulmalbal.”

¹¹Al an ulubgin sae-itogedginan-napírra-chogzhadginpe-tadgangin an chogdebalzhun:“We tulemal meke-igian-ulukued-neggin kwen togojul-kuo.” Sal. 95:9-11

¹²Kwenadgan, pe nuekwa aga takermal, pe melle aga ulubgin iskuedgin pinzhemalo, tegin pe melle Pabgin ibzhejul-kuo, pe melle Pab-Tula-Maid-ebegal.

¹³Imis ampa we ibe-naidgin, pe pane-pane aga muchub-muchub okannomalo, pe melle iskuedgin-yardalejadbal pe Pabgin pengunonigal.

¹⁴Tenal anmal kepe-saglagin Pab-penzhul-kudigujadyob anmal ampa ukin-ukin ilgwen-naneel, anmal Cristobak mecha kudigumalo.

¹⁵Imi Pab-karta chogzhadyob an kannan chogbaldo:Imis pe Pab-kakapurwa itogel,pedin, pe melle chogo: “Chul.”Pedin Pab-kakapurwa abingeenabmal.Imi akpene pe-tadganPab Tummadgin abin-kwisgunonikidyob,pe melle kumalo. Sal. 95:7-8

¹⁶¿Tede toa-tulemalzhun Pab-kakapurwa itosmalgu, Pab-Tummad-abin-kwisgunonimaladdé? ¿Moisés-Egipto-akar-tadgan-onismaladzhulzhí? Teobdo.

¹⁷¿Tenal Pab Tummad pirka-tulabo toa-tulemalbak sae-itodi-kusdé? ¿Tule-iskuedgin-tiidbal neg-nikchulidbal purkwismaladzhulzhí? Teobdo.

¹⁸¿Tenal Pab toa-tulegin napírra chogzhabaldé: “We tulemal meke-igi an-ulukued-neggin kwen togojul-kuo?” ¿Tadgan-Pab-chogzhad-pallí-kwen-nanejulmaladzhulzhí? Teobdo.

¹⁹Al anmal takchamaldo, anmal-tadgan Pabgin-ibzhejulidbal keg Pab-ulukued-neggin toggusmal.