Read Dulegaya Hebreos 8 Bible Online

Hebreos 8 - Dulegaya bible

Hebreos 8

¹Imi anmal chunmananimaldo: anmal tule-irwal-Pabzhe-koled-pul-tummad-nikamal. Wedin Jesús, tenal Jesús nikpa-neggin Pab-Pul-Tummad-kan-nuedzhik pato tule-tummadga chii.

²Tenal Jesús Pab-maid-neggin arpamai. Tenal we negdin Pab-maid-neg-chunchunnad, tenal Pab Tummad we neg opinnis, tulemal kwen chobzhajulmal.

³Imi tule-irwal-Pabzhe-koled-pul-tummagan-pel-kwapa nugzhales Pab Tummadga immal ukegal, tegin Pabga immal-okuggalbal. Al Jesús Pab Tummadga immal uked-wilubmo.

⁴Tenal iti-napkin tule-irwal-Pabzhe-kolmalad íchejul nika Moisés-igal-mamikidbal Pabga immal ukegal. Al Jesús imis iti-napkin mailen, tule-irwal-Pabzhe-koledga kwen kuszhulin.

⁵Tenal tule-irwal-Pabzhe-kolmaladdin iti-napkin Pab-Tummad-megwed-neggin arpananimal. Tenal we negdin pinche wilub-oyonai, nikpa Pab-maid-neggin igi arpale. Al Moisés Pab-megwed-neg chobbi-kualgu, Pab Tummad Moisésga chogzhado:Tenal pedin nue taker,imi an akpene pega yalgin oyojad-yopípe an-neg chobmogo. Ex. 25:40

⁶Tenal Jesúsdin tule-irwal-Pabzhe-kolmalad-pimaladga pul arpaged-nued nika. Tenal Pab Tummad pul kaka-nuegan-ukcha-choggu, al Pab Tummad Jesúsbal pul igal-nued mezhis, Pab-akpene-Moisésbal-pul-igal-mezhijadga.

⁷Imi Pab kepegin tulemalbak aga igal-mezhijad nuedilen, igal-kwapid pal kwen mezhiszhulin.

⁸Tenal Pab Tummad takchagu tulemal kwen unnijulmal nuekwa nanegal, al Pabdin chogalzhun: “Antin igal-pid mesnebal.” Imi Pab-kartagin chogdo:Pab Tummad chog:“Imi ibe noniko,an Israel-tulemalbaktegin Judá-tulemalbak igal-pin mesnebal.

⁹Tenal an-Egipto-akar tadgan-onosmaladginan igal-mezhijadyob an igal pal kwen mesnejul.Imi teun tadgan an-igal-mezhijadyobinniki kwen nanaszhulmal.Al an we tulemal-ebeszhun.Al tegidbal an igal-pin mesnejun.”

¹⁰Tegin Pab Tummad chogbal:“Imi an Israel-tulemalbak igal mesne.Tenal te-cholbal,antin igal-mezhijadgin pinzhedi-kugalIsrael-tulemal-imako.Tegin an Israel-tulemal-imabaloaga ulubgin-akar we igalgin nued nanegal.Tegin antin Israel-tulemalgae-Pab-Tummadga kunoniko.Tegin Israel-tulemal an-tulemalga kunonimalbalo.

¹¹Tenal te ibegin Israel-tulemalginan-chogzhadyob kunonikil,Israel-tule e-neg-tikalbal-mamimalad-keg-pal-oturdakel,tegin e-kwenadganga keg palchogbalil:‘Pedin Pab-Tummad-wisguenab.’Imi tulemal-pel-kwapa an-wisgunonimalotule-tummagan-ugakchetegin tule-polgana-ugakchemo.

¹²Tenal antin Israel-tulemal-iskued elio,tegin antin Israel-tulemal-iskuedginpinzhedii pal kwen kuojul.” Jer. 31:31-34

¹³Imi Pab-igal-pin-mezhijadbal, choglenaido, we igal-chereddin pato ibga keg pal ku. Al Pab-Tummad-igal-chered-mezhijad pulejul pelgunoniko.