Read Dulegaya Apocalipsis 19 Bible Online

Apocalipsis 19 - Dulegaya bible

Apocalipsis 19

¹Tegin an-immal-takchad-cholbal an itosdo, tule-ichejul-oimabukwadyob Pab-neggin sapejul kolmakalmal, chogalmal:Pab-otummomaloye.Imi anmal-Pab-Tummad, tule-abonoged,tegin kannaleged-nikad,tegin yer-takleged-nikadye.

²Imi Pab Tummad napírrategin inniki igal-itogedbal sapejul tule-oturda.Al Pab Tummad e-chogzhadbalBabilonia-neg-kwebur-ome-macherganbi-wijiidyobidoturdanoni.Tenal Babilonia-neg-kweburginmalade-iskuedbal pel-kwapa iti-napkin-pukmalad-egwasmal,tegin tule-Pabga-arpamalad-mechamalbal.Al Pab Tummad Babilonia-tolgan-abin-imasmo,tar-opelononi.

³Tegin tulemal kannan sapejul chogalmalbal:¡Pab-Tummad-otummomaloye!Imi Babilonia-neg-kwebur-kummamaid-wadin,ilagwen-nadguo pal kwen-pelguojulye.

⁴Tegin chelegan-tummagan-wala-tulagwen-kakabakegwad tegin immal-tulgan-walbakegwad, Pab-ol-kangin-chiid-assapin napche tullu-imasmal, Pab-otummoedgin Pabzhe kolalmal, chogalmal:Teobdo, Pab Tummad-otummomaloye. Oveja-chapini ome-nikuneed

⁵Tegin Pab-ol-kan-chiid-akar an tuleyob tule-kakapurwa itosbal, chogal:Pemal-Pabga-arpamalad,tegin Pab-tobe-nanemalad,tegin tule-tummagantegin tule-polgan-ugakche,pemal-pel-kwapa Pab-otummomaloye.

⁶Tegin an itosbaldo, chuked-ariokwichidyob oimabukmal, tegin tulemal mar-koledyob sapejul kote, chogalmal:¡Pab-otummomaloye!Anmal-Pab-Pul-Tummad,pel-kwapa neg-takmaiye.

⁷Imi Oveja-chapini-ome-nikuneede-wilub pato noni.Tenal ome-Oveja-chapini-nikuoedpato kuakwa chii-choggu machered-nikugal,al anmal welgunanimal,tegin anmal yer itonanimal,tegin anmal Pab-Tummad-otummonanimalbal.

⁸Tegin Oveja-chapini-e-omegamol-nued-chipúgwad-yer-kaed ukles yogal.(Imi mol-chibudin chogle,tule-Pab-Jesúsbak-akenanimalad-immal-nuegan-imajad.)

⁹Tegin angel anka chogal: “Imisgin pe nermado: ‘Imi Pab tulemalzhe kochal Oveja-chapini-ome-nikuneedgin mas-ichejul-imalejiid kunkal, we tulega ib-nuedga kunoniko.’ ” Tegin angel anka chogalbal: “Imi we kaka an pega chogzhiiddin, Pab-Tummad-kakapurwa chunchunnaddo.”

¹⁰Tegidgin antin ilgwen angel-nabal chimtis, Pab Tummadyob angel-otummogal. Tenal angel anka chogal: “Pe melle Pab Tummadyob an-otummoma. Imi antin ampa pe-yopímo Pabga-pinche-arpaged-tulemo. Imi antin Jesucristogin pe-kwenad, Pab-Jesús-chogzhadbal-nued-naigusmalad, e-pakadmo. Tenal pedin, pe Pab Tummadzhebi pe kolo. ¿Ibiga an teob chog? Nabir. Imi Jesús-chunmadiidbal, Pab-kaka-palchogmalad okannolenonimal.” Tule-moli-caballo-chibugin-chiid, tule-ebak-aichulmaladgin nakwijad

¹¹Tegin an taktegu an takal, nikpa-neg arkatku, moli-caballo-chibubi noal, tegin tule-askin-chiid nug:TULE-INNIKIGWAD-KEG-KAKANZHEED. Tenal we tule napírragwadgin chabzhul tule-oturda, tegin we tule nabiridbal pila-onobal.

¹²Tenal tule-moli-pirgin-chiid-e-imiadin cho-turmagwichidyob ka, tegin e-nonogin ichejul olo-kurkin chiji-nadbal. Tenal tule-moli-pirgin-chiid nug-abi-wijiid nermakal naibal,

¹³tenal we tule-mol-yowid abegin-odogaled. Tegin tule-moli-pirgin-chiid nugbal:PAB-TUMMAD-KAKAPURWA.

¹⁴Tegin tule-moli-chibu-askin-chiid-cholbal, e-chulubmal-pilachemalad-Pab-negginmalad, moli-caballo-chibugangin-askin chiji-irmadanimalmo. Tenal we chulubmal mol-chibu-nuegan-chwilidikid-chipúgwad yoyomal.

¹⁵Tenal tule-olo-kurkin-chijiid e-kaka-yabal-akar es-pilacheed-nugal-nikad yowi, tule-chog-akal-akal-pukmalad naklichegal. Tegin we tule kabaston-ezhagad kanikidyob kantikidgin neg-tako. Tegin Pab-Pul-Tummad urwed-kin-nakwedbal tule-olo-kurkin-chijiid-palmine peyedzhe chabzhul tulemal-oturdagal, tule uva-chan-ekurnaidgin, e-nis ariomaidyob.

¹⁶Tenal tule-moli-pirgin-chiid molgin tegin tuwagin, e-nug nermakal nai, chognai: ERREYMAL-E-TUMMAD, TEGIN TULE-TUMMAGAN-E-TUMMAD.

¹⁷Tegin an takchabal, angel tadgwagin kwichi, tegin angel sapejul neg-magadbal mulamalzhe kocha, ka chogal: “Tagmalma itije, Pab pemalga ichejul mas-kunned ukchiid kunmalgal.

¹⁸Tenal we mas-kunneddin, erreymal-e-chan, tegin wag-chulub-tummagan-e-chan, tegin tule-kal-ibgan-e-chan, tegin moli-caballo-e-chan, tegin tule-moligin-chijiid-e-chan, tegin tule-pinche-arpamalad-e-chan, tegin tule-ololchalmalad-e-chan, tegin tule-polgana-e-chan, tegin tule-tummagan-e-chanbal, pel-kwapa.”

¹⁹Tegin an takchabal, pinas-nono-maklejad-kannan-nugujad tegin erreymal-iti-napkinmalad aga e-chulubmalbak mes pulakwa pukwamal, tule-tummad-moli-caballo-chibu-pirgin-chijiid tegin e-chulubmalbak pila-onogal.

²⁰Tegin pila-imanonimaladgin, pinas-walbo kalenonimal. Kwéntin pinas-nono-maklejad-kannan-nugujad, kwéntin. Pab-kaka-palchoged-pinchegad. Tenal we pinas moli-pid-anal immal-taktijulmalad-imajadbal, tulemal-pinas-kinnid-wilub-abingasmalad, tegin Pab-Tummadyob-immal-pinasyob-chobaled-takchamalad-yardaged. Tegin we pinas-walbogid kalesmalgu, azufre-kamaid cho-matagin tulachá tar-metemal.

²¹Tenal pinas-e-chulubmal tule-moli-caballo-chibu-askin-chiid kaka-yabal-akar es-pilacheedgin purkwismal. Tegin mulamal-pel-kwapa wilub-okpis immedzhe tule-mui-chan kuchamal.