Read Елизаветинская Библия, 1751 Бытие 12 Bible Online

Бытие 12 - Елизаветинская Библия, 1751 bible

Бытие 12

¹И рече Господь авраму: изыди от земли твоея, и от рода твоего, и от дому отца твоего, и иди в землю, юже ти покажу:

²и сотворю тя в язык велий, и благословлю тя, и возвеличу имя твое, и будеши благословен:

³и благословлю благословящыя тя, и кленушыя тя проклену: и благословятся о тебе вся племена земная.

⁴И иде аврам, якоже глагола ему Господь, и идяше с ним лот: аврам же бе лет седмидесяти пяти, егда изыде от (земли) харран.

⁵И поят аврам сару жену свою, и лота сына брата своего, и вся имения своя, елика стяжаша, и всякую душу, юже стяжаша в харране: и изыдоша поити в землю ханааню.

⁶И пройде аврам землю в долготу ея даже до места сихем, до дуба высокаго: хананее же тогда живяху на земли (той).

⁷И явися Господь авраму и рече ему: семени твоему дам землю сию. И созда тамо аврам жертвенник Господу явльшемуся ему.

⁸И отступи оттуду в гору на восток (лицем) прямо вефилю, и постави тамо кущу свою в вефили при мори, и агге к востоком: и созда тамо жертвенник Господу, и призва во имя Господа (явльшася ему).

⁹И воздвижеся аврам, и шед ополчися в пустыни.

¹⁰И бысть глад на земли: и сниде аврам во египет вселитися тамо, яко одоле глад на земли.

¹¹Бысть же егда приближися аврам внити во египет, рече аврам саре жене своей: вем аз, яко жена добролична еси:

¹²будет убо егда увидят тя египтяне, рекут, яко жена его есть сия: и убиют мя, тебе же снабдят:

¹³рцы убо, яко сестра ему есмь, да добро мне будет тебе ради, и будет жива душа моя тебе ради.

¹⁴Бысть же егда вниде аврам во египет, видевше египтяне жену его, яко добра бяше зело,

¹⁵и видеша ю князи фараони и похвалиша ю пред фараоном, и введоша ю в дом фараонов.

¹⁶И авраму добре бяше ея ради: и быша ему овцы и телцы и ослы, и рабы и рабыни, и мски и велблюды.

¹⁷И мучи Господь казньми великими и лютыми фараона и дом его сары ради жены аврамли.

¹⁸Призвав же фараон аврама, рече ему: что сие сотворил еси мне, яко не поведал ми еси, яко жена твоя есть?

¹⁹Вскую рекл еси, яко сестра ми есть? И поях ю себе в жену. И ныне се, жена твоя пред тобою: поемь ю отиди.

²⁰И заповеда фараон мужем о авраме, проводити его и жену его, и вся, елика быша его, и лота с ним.