Read Елизаветинская Библия, 1751 Бытие 13 Bible Online

Бытие 13 - Елизаветинская Библия, 1751 bible

Бытие 13

¹Изыде же аврам от египта сам и жена его, и вся, елика его, и лот с ним в пустыню.

²Аврам же бяше богат зело скоты и сребром и златом.

³И иде отнюдуже прииде, в пустыню до вефила, до места, идеже бе ему куща первее, между вефилем и между агге,

⁴на место жертвенника, идеже сотвори его первее: и призва тамо аврам имя Господне.

⁵И лоту ходящу со аврамом бяху овцы, и волы, и кущы.

⁶И не вмещаше их земля жити вкупе, яко имения их бяху многа: и не можаху жити вкупе.

⁷И бысть распря между пастухи скота аврамля и между пастухи скота лотова: хананее же и ферезее тогда живяху на земли (той).

⁸Рече же аврам лоту: да не будет распря между мною и тобою, и между пастухи твоими и между пастухи моими, яко человецы братия мы есмы:

⁹не се ли вся земля пред тобою есть? Отлучися ты от мене: аще ты на лево, аз на десно: аще же ты на десно, аз на лево.

¹⁰И возвед лот очи свои, виде всю окрестную страну иорданскую, яко вся напаяема бяше водою, прежде неже низвратити Богу содом и гоморр, яко рай Божий, и яко земля египетска, даже приити до зогора:

¹¹и избра себе лот всю окрестную страну иорданскую, и отиде лот от востока: и разлучистася кийждо от брата своего.

¹²Аврам же вселися в земли ханаанстей, лот же вселися во граде окрестных стран и вселися в содоме.

¹³Человецы же сущии в содоме зли и грешни пред Богом зело.

¹⁴Бог же рече авраму, повнегда разлучитися лоту от него: воззри очима твоима и виждь от места, идеже ты ныне еси, к северу, и ливе, и к востоку, и морю:

¹⁵яко всю землю, юже ты видиши, тебе дам ю и семени твоему во веки,

¹⁶и сотворю семя твое, яко песок земный: аще кто может исчести песок земный, то и семя твое изочтет:

¹⁷востав проиди землю в долготу ея и в широту: яко тебе дам ю и семени твоему во век.

¹⁸И отселився аврам, пришед вселися у дуба мамврийскаго, иже бяше в хевроне: и созда ту жертвенник Господу.