Read Елизаветинская Библия, 1751 Бытие 14 Bible Online

Бытие 14 - Елизаветинская Библия, 1751 bible

Бытие 14

¹Бысть же в царство амарфала царя сеннаарска, и ариох царь елласарск, и ходоллогомор царь еламск, и фаргал царь языческий

²сотвориша рать с валлою царем содомским и с варсою царем гоморрским, и с сеннааром царем адамы и с симовором царем севоимским, и с царем валаки: сия есть сигор.

³Вси сии совещашася на юдоль сланую: сие есть море сланое.

⁴Дванадесять лет тии работаша ходоллогомору: третияго же надесять лета отступиша.

⁵И в четвертое надесять лето, прииде ходоллогомор, и цари иже с ним, и изсекоша исполинов сущих во астарофе и в карнаине, и языки крепки вкупе с ними, и омеов, иже в сави граде,

⁶и хорреов, иже в горах сиирских, даже до теревинфа фарана, иже есть в пустыни.

⁷И возвратившеся приидоша ко источнику судному, иже есть кадис: и ссекоша вся князи амаликовы, и аморреов живущих во асасанфамаре.

⁸Изыде же царь содомский и царь гоморрский, и царь адаманский и царь севоимский, и царь валаки, сия есть сигор: и ополчишася противу их на брань во юдоли сланой,

⁹на ходоллогомора царя еламска и фаргала царя языческа, и амарфала царя сеннаарска и ариоха царя елласарска: четыри цари на пять.

¹⁰Юдоль же сланая имяше кладязи смоляныя. И побеже царь содомский и царь гоморрский, и падоша тамо: оставшиися же бежаша в горняя (и одержаша я).

¹¹Взяша же вся конныя содомския и гоморрския и вся брашна их, и отидоша.

¹²Взяша же и лота сына брата аврамова и имение его, и отидоша: бе бо в содомех живый.

¹³Пришед же един от уцелевших, возвести авраму пришелцу, иже живяше у дуба мамврийскаго, аморреа брата есхоля и брата авнаня, иже беша союзницы аврамовы.

¹⁴Слышав же аврам, яко пленен бысть лот братаничь его, сочте домочадцы своя триста и осмьнадесять, и погна вслед их даже до дана.

¹⁵И нападе на ня нощию сам и отроцы его (с ним): и порази их и гони их даже до ховала, иже есть ошуюю дамаска:

¹⁶и возврати вся конныя содомския, и лота сына брата своего возврати, и вся имения его, и жены, и люди.

¹⁷Изыде же царь содомский в сретение ему, повнегда возвратитися ему от сеча ходоллогоморскаго, и царей сущих с ним, в юдоль савину: сие же бяше поле царево:

¹⁸и мелхиседек царь салимский изнесе хлебы и вино: бяше же священник Бога вышняго.

¹⁹И благослови аврама, и рече: благословен аврам Богом вышним, иже созда небо и землю:

²⁰и благословен Бог вышний, иже предаде враги твоя под руки тебе. И даде ему десятину аврам от всего.

²¹Рече же царь содомский ко авраму: даждь ми мужы, а кони возми себе.

²²Рече же аврам к царю содомску: воздвигну руку мою ко Господу Богу вышнему, иже сотвори небо и землю:

²³аще от нити до ременя сапожнаго возму от всего твоего, да не речеши, яко аз обогатих аврама:

²⁴кроме сих, яже снедоша отроцы, и части мужей, иже ходиша со мною, есхол, авнан, мамврий: сии да возмут части (своя).