Read Елизаветинская Библия, 1751 Бытие 15 Bible Online

Бытие 15 - Елизаветинская Библия, 1751 bible

Бытие 15

¹По глаголех же сих, бысть слово Господне ко авраму в видении нощию, глаголя: не бойся, авраме: аз защищаю тя, мзда твоя многа будет зело.

²Глагола же аврам: Владыко Господи, что ми даси? аз же отпущаюся безчаден: сын же масек домочадицы моея, сей дамаск елиезер.

³И рече аврам: понеже мне не дал еси семене, домочадец же мой наследник мой будет.

⁴И абие глас Господень бысть к нему, глаголющий: не будет сей наследник твой, но иже изыдет из тебе, той будет наследник тебе.

⁵Изведе же его вон и рече ему: воззри на небо и изочти звезды, аще возможеши исчести я. И рече: тако будет семя твое.

⁶И верова аврам Богу, и вменися ему в правду.

⁷Рече же к нему: аз (есмь) Бог изведый тя от страны халдейския, яко дати тебе землю сию наследствовати.

⁸И рече: Владыко Господи, по чесому уразумею, яко наследити ю имам?

⁹Рече же к нему: возми мне юницу трилетну и козу трилетну и овна трилетна, и горлицу и голубя.

¹⁰Взя же он вся сия и раздели я на полы, и положи я противолична едина ко другому: птиц же не раздели.

¹¹Слетеша же птицы на телеса растесаная их: и седе близу их аврам.

¹²Заходящу же солнцу, ужас нападе на аврама, и се, страх темен велий нападе нань.

¹³И речено бысть ко авраму: ведый увеси, яко преселно будет семя твое в земли не своей, и поработят я, и озлобят я, и смирят я лет четыриста:

¹⁴языку же, емуже поработают, сужду аз: по сих же изыдут семо со имением многим:

¹⁵ты же отидеши ко отцем твоим в мире, препитан в старости добрей:

¹⁶в четвертем же роде возвратятся семо: не бо исполнишася греси аморреов до ныне.

¹⁷Егда же бысть солнце на западе, пламень бысть: и се, пещь дымящися, и свещы огненны, яже проидоша между растесании сими.

¹⁸В день той завеща Господь авраму завет, глаголя: семени твоему дам землю сию от реки египетския даже до реки великия евфрата:

¹⁹кенеов и кенезеов и кедмонеов,

²⁰и хеттеов и ферезеов и рафаинов,

²¹и аморреов и хананеов, и евеов и гергесеов и иевусеов.