Read Елизаветинская Библия, 1751 Бытие 16 Bible Online

Бытие 16 - Елизаветинская Библия, 1751 bible

Бытие 16

¹Сара же жена аврамля не раждаше ему: бяше же ей раба египтяныня, ейже имя агарь.

²Рече же сара ко авраму: се, заключи мя Господь, еже не раждати: вниди убо к рабе моей, да чада сотворю от нея. Послуша же аврам гласа сарина.

³И поимши сара жена аврамля агарь египтяныню рабу свою, по десяти летех вселения аврамля в земли ханаани, даде ю в жену авраму мужу своему.

⁴И вниде ко агари, и зачат: и виде, яко во чреве имать, и укорена бысть госпожа (ея) пред нею.

⁵И рече сара ко авраму: обида ми от тебе: аз дах рабу мою в недро твое: она же видевши, яко во чреве имать, укорена бых пред нею: суди Бог между мною и тобою.

⁶Рече же аврам к саре: се, раба твоя в руку твоею: твори ей, якоже ти есть угодно. И озлоби ю сара: и отбеже от лица ея.

⁷И обрете ю ангел Господень у источника воды в пустыни, у источника на пути сур.

⁸И рече ей ангел Господень: агарь, рабо сарина, откуду идеши и камо грядеши? И рече: от лица сары госпожи моея аз бегу.

⁹Рече же ей ангел Господень: возвратися к госпоже своей и покорися под руку ея.

¹⁰И рече ей ангел Господень: умножая умножу семя твое, и не сочтется от множества.

¹¹И рече ей ангел Господень: се, ты во чреве имаши и родиши сына, и наречеши имя ему исмаил: яко услыша Господь смирение твое:

¹²сей будет селный человек: руце его на всех, и руки всех на него, и пред лицем всея братии своея вселится.

¹³И призва агарь имя Господа глаголющаго к ней: ты Бог призревый на мя: яко рече: ибо предо мною видех Явльшагося мне.

¹⁴Сего ради прозва кладязь той: кладязь, идеже предо мною видех: се между кадисом и между варадом.

¹⁵И роди агарь авраму сына, и нарече аврам имя сыну своему, егоже роди ему агарь, исмаил.

¹⁶Аврам же бе лет осмидесяти шести, егда роди агарь авраму исмаила.