Read Елизаветинская Библия, 1751 Бытие 17 Bible Online

Бытие 17 - Елизаветинская Библия, 1751 bible

Бытие 17

¹Бысть же авраму лет девятьдесят девять: и явися Господь авраму и рече ему: аз есмь Бог твой, благоугождай предо мною и буди непорочен:

²и положу завет мой между мною и между тобою: и умножу тя зело.

³И паде аврам на лицы своем, и рече ему Бог, глаголя:

⁴и аз се, завет мой с тобою, и будеши отец множества языков:

⁵и не наречется ктому имя твое аврам, но будет имя твое авраам: яко отца многих языков положих тя:

⁶и возращу тя зело зело, и положу тя в народы, и царие из тебе изыдут:

⁷и поставлю завет мой между мною и между тобою, и между семенем твоим по тебе в роды их, в завет вечен, да буду тебе Бог и семени твоему по тебе:

⁸и дам тебе и семени твоему по тебе землю, в нейже обитаеши, всю землю ханааню во одержание вечное, и буду им Бог.

⁹И рече Бог ко аврааму: ты же завет мой соблюдеши, ты и семя твое по тебе в роды их.

¹⁰И сей завет, егоже соблюдеши между мною и вами, и между семенем твоим по тебе в роды их: обрежется от вас всяк мужеск пол,

¹¹и обрежете плоть крайнюю вашу, и будет в знамение завета между мною и вами.

¹²И младенец осми дний обрежется вам, всяк мужеский пол в родех ваших: и домочадец, и купленый от всякаго сына чуждаго, иже несть от семене твоего: обрезанием обрежется домочадец дому твоего и купленый.

¹³И будет завет мой на плоти вашей в завет вечен.

¹⁴Необрезаный же мужеский пол, иже не обрежет плоти крайния своея в день осмый, погубится душа та от рода своего: яко завет мой разори.

¹⁵И рече Бог аврааму: сара жена твоя не наречется имя ея сара, но сарра будет имя ей:

¹⁶благословлю же ю и дам тебе от нея чадо: и благословлю е, и будет в языки, и царие языков из него будут.

¹⁷И паде авраам на лице свое, и посмеяся, и рече в мысли своей, глаголя: еда столетному (мужу) родится сын? еда и сарра девятидесяти лет (сущи) родит?

¹⁸Рече же авраам к Богу: исмаил сей да живет пред тобою.

¹⁹Рече же Бог ко аврааму: воистинну, се, сарра жена твоя родит тебе сына, и наречеши имя ему исаак: и поставлю завет мой с ним в завет вечен, да буду ему в Бога и семени его по нем.

²⁰О исмаиле же се послушах тебе: и се благослових его, и возращу его, и умножу его зело: дванадесять языки родит: и дам его в язык велий.

²¹Завет же мой поставлю со исааком, егоже родит тебе сарра, во время сие, в лето второе.

²²Сконча же (Бог) глаголя к нему, и взыде Бог от авраама.

²³И поя авраам имаила сына своего, и вся домочадцы своя и вся купленыя, и весь мужеск пол мужей, иже в дому авраамли, и обреза плоть крайнюю их во время дне того, якоже глагола ему Бог.

²⁴Авраам же девятидесяти девяти лет бяше, егда обреза плоть крайнюю свою.

²⁵Исмаил же сын его бяше лет трехнадесяти, егда обреза плоть крайнюю свою.

²⁶Во время (же) дне онаго обрезася авраам и исмаил сын его,

²⁷и вси мужие дому его, и домочадцы (его) и куплении от инородных языков, и обреза я.