Read Елизаветинская Библия, 1751 Бытие 19 Bible Online

Бытие 19 - Елизаветинская Библия, 1751 bible

Бытие 19

¹Приидоста же два ангела в содом в вечер: лот же седяше пред враты содомскими. Видев же лот, воста в сретение им и поклонися лицем на землю

²и рече: се, господие, уклонитеся в дом раба вашего и почийте, и омыйте ноги вашя, и обутреневавше отидете в путь свой. Реша же: ни, но на стогне почием.

³И принуди я, и уклонишася к нему, и внидоша в дом его: и сотвори им учреждение, и опресноки испече им, и ядоша.

⁴Пред спанием же мужие града содомляне оыдоша дом, от юноши даже до старца, весь народ вкупе:

⁵и иззываху лота, и глаголаху к нему: где суть мужие вшедшии к тебе нощию? изведи я к нам, да будем с ними.

⁶Изыде же лот к ним в преддверие, двери же затвори за собою.

⁷Рече же к ним: никакоже, братие, не дейте зла:

⁸суть же ми две дщери, яже не познаша мужа: изведу их к вам, и творите им, якоже угодно есть вам: точию мужем сим не сотворите обиды, того бо ради внидоша под кров дому моего.

⁹Реша же ему: отиди отсюду: пришел еси (семо) обитати, еда ли и суд судити? ныне убо тя озлобим паче, нежели оных. И насилствоваша мужа лота зело, и приближишася разбити двери.

¹⁰Простерше же мужие руки, вовлекоша лота к себе в храмину, и двери храмины заключиша:

¹¹мужы же, сущыя пред дверми дому, поразиша слепотою от мала даже до велика: и разслабишася ищуще дверий.

¹²Реша же мужие к лоту: суть ли тебе зде зятие или сынове или дщери? или аще кто тебе ин есть во граде, изведи (я) от места сего:

¹³яко мы погубляем место сие, понеже возвысися вопль их пред Господем, и посла нас Господь истребити его.

¹⁴Изыде же лот и глагола к зятем своим, поимшым дщери его, и рече: востаните и изыдите от места сего, яко погубляет Господь град. Возмнеся же играти пред зятьми своими.

¹⁵Егда же утро бысть, понуждаху ангели лота, глаголюще: востав, поими жену твою и две дщери твоя, яже имаши, и изыди, да не и ты погибнеши со беззаконми града.

¹⁶И смутишася, и взяша ангели за руку его, и за руку жену его, и за руки двух дщерей его, понеже пощаде и Господь.

¹⁷И бысть егда изведоша я вон, и реша: спасая спасай твою душу: не озирайся вспять, ниже постой во всем пределе (сем): в горе спасайся, да не когда купно ят будеши.

¹⁸Рече же лот к ним: молюся, Господи,

¹⁹понеже обрете раб твой милость пред тобою, и возвеличил еси правду твою, юже твориши на мне, еже жити души моей: аз же не возмогу спастися в горе, да не когда постигнут мя злая, и умру:

²⁰се, град сей близ еже убежати ми тамо, иже есть мал, и тамо спасуся: не мал ли есть? и жива будет душа моя тебе ради.

²¹И рече ему: се, удивихся лицу твоему, и о словеси сем, еже не погубити града, о немже глаголал еси:

²²потщися убо спастися тамо: не возмогу бо сотворити дела, дондеже внидеши тамо: сего ради прозва имя граду тому сигор.

²³Солнце взыде над землю, лот же вниде в сигор.

²⁴И Господь одожди на содом и гоморр жупел, и огнь от Господа с небесе.

²⁵И преврати грады сия, и всю окрестную страну, и вся живущыя во градех, и вся прозябающая от земли.

²⁶И озреся жена его вспять, и бысть столп слан.

²⁷Востав же авраам заутра (иде) на место, идеже стояше пред Господем,

²⁸и воззре на лице содома и гоморра, и на лице окрестныя страны, и виде: и се, восхождаше пламень от земли, аки дым пещный.

²⁹И бысть егда преврати Бог вся грады страны тоя, помяну Бог авраама и изсла лота от среды превращения, егда преврати Господь грады, в нихже живяше лот.

³⁰Изыде же лот от сигора, и седе в горе сам, и две дщери его с ним: убояся бо жити в сигоре: и вселися в пещеру сам и дщери его с ним.

³¹Рече же старейшая к юнейшей: отец наш стар, и никтоже есть на земли, иже внидет к нам, якоже обычно всей земли:

³²гряди убо, упоим отца нашего вином и преспим с ним, и возставим от отца нашего семя.

³³Упоиша же отца своего вином в нощи оней: и вшедши старейшая, преспа со отцем своим тоя нощи: и не поразуме он, егда преспа и егда воста.

³⁴Бысть же наутрие, и рече старейшая к юнейшей: се, (аз) преспах вчера со отцем нашим: упоим его вином и в сию нощь, и вшедши преспи с ним, и возставим от отца нашего семя.

³⁵Упоиша же и в ту нощь отца своего вином: и вшедши юнейшая преспа со отцем своим: и не поразуме он, егда преспа и егда воста.

³⁶И зачаша обе дщери лотовы от отца своего:

³⁷и роди старейшая сына и нарече имя ему моав, глаголющи: от отца моего. Сей отец моавитом даже до нынешняго дне.

³⁸Роди же юнейшая сына и нарече имя ему амман, глаголющи: сын рода моего. Сей отец амманитом до нынешняго дне.