Read Елизаветинская Библия, 1751 Бытие 2 Bible Online

Бытие 2 - Елизаветинская Библия, 1751 bible

Бытие 2

¹И совершишася небо и земля, и все украшение их.

²И соверши Бог в день шестый дела своя, яже сотвори: и почи в день седмый от всех дел своих, яже сотвори.

³И благослови Бог день седмый, и освяти его: яко в той почи от всех дел своих, яже начат Бог творити.

⁴Сия книга бытия небесе и земли, егда бысть, в оньже день сотвори Господь Бог небо и землю,

⁵И всякий злак селный, прежде даже быти на земли, и всякую траву селную, прежде даже прозябнути: не бо одожди Господь Бог на землю, и человек не бяше делати ю:

⁶Источник же исхождаше из земли и напаяше все лице земли.

⁷И созда Бог человека, персть (взем) от земли, и вдуну в лице его дыхание жизни: и бысть человек в душу живу.

⁸И насади Господь Бог рай во едеме на востоцех, и введе тамо человека, егоже созда.

⁹И прозябе Бог еще от земли всякое древо красное в видение и доброе в снедь: и древо жизни посреде рая, и древо еже ведети разуметелное добраго и лукаваго.

¹⁰Река же исходит из едема напаяти рай: оттуду разлучается в четыри начала.

¹¹Имя единей фисон: сия окружающая всю землю евилатскую: тамо убо есть злато.

¹²Злато же оныя земли доброе: и тамо есть анфракс и камень зеленый.

¹³И имя реце вторей геон: сия окружающая всю землю ефиопскую.

¹⁴И река третия тигр: сия проходящая прямо ассириом. Река же четвертая евфрат.

¹⁵И взя Господь Бог человека, егоже созда, и введе его в рай сладости, делати его и хранити.

¹⁶И заповеда Господь Бог адаму, глаголя: от всякаго древа, еже в раи, снедию снеси:

¹⁷от древа же, еже разумети доброе и лукавое, не снесте от него: а в оньже аще день снесте от него, смертию умрете.

¹⁸И рече Господь Бог: не добро быти человеку единому: сотворим ему помощника по нему.

¹⁹И созда Бог еще от земли вся звери селныя и вся птицы небесныя, и приведе я ко адаму видети, что наречет я: и всяко еже аще нарече адам душу живу, сие имя ему.

²⁰И нарече адам имена всем скотом, и всем птицам небесным, и всем зверем земным. Адаму же не обретеся помощник подобный ему.

²¹И наложи Бог изступление на адама, и успе: и взя едино от ребр его, и исполни плотию вместо его.

²²И созда Господь Бог ребро, еже взя от адама, в жену, и приведе ю ко адаму.

²³И рече адам: се, ныне кость от костей моих и плоть от плоти моея: сия наречется жена, яко от мужа своего взята бысть сия.

²⁴Сего ради оставит человек отца своего и матерь и прилепится к жене своей, и будета два в плоть едину.

²⁵И беста оба нага, адам же и жена его, и не стыдястася.