Read Елизаветинская Библия, 1751 Бытие 20 Bible Online

Бытие 20 - Елизаветинская Библия, 1751 bible

Бытие 20

¹И пойде оттуду авраам на землю полуденную и вселися между кадисом и между суром: и обита в герарех.

²Рече же авраам о сарре жене своей, яко сестра ми есть: убояся бо рещи, яко жена ми есть, да не когда убиют его мужие градстии ея ради. Посла же авимелех царь герарский и взя сарру.

³И прииде Бог ко авимелеху нощию во сне и рече ему: се, ты умираеши жены ради сея, юже поял еси: сия же есть сожителствующая мужу.

⁴Авимелех же не прикоснуся ей и рече: Господи, язык неведущий и праведен погубиши ли?

⁵не сам ли ми рече: сестра ми есть? и сия ми рече: брат ми есть? чистым сердцем и в правде рук сотворих сие.

⁶Рече же ему Бог во сне: и аз познах, яко чистым сердцем сотворил еси сие, и пощадех тя, да не согрешиши ко мне: сего ради не попустих ти коснутися ея:

⁷ныне же отдаждь жену мужу, яко пророк есть, и помолится о тебе, и жив будеши: аще же не отдаси, веждь, яко умреши ты и вся твоя.

⁸И воста рано авимелех, и призва вся отроки своя, и глагола словеса сия вся во ушы их: убояшася же вси человецы зело.

⁹И призва авимелех авраама и рече ему: что сие сотворил еси нам? еда что согрешихом тебе, яко навел еси на мя и на царство мое грех велик? дело, еже никтоже сотвори, сотворил еси мне.

¹⁰И рече авимелех аврааму: что умыслив, сотворил еси сие?

¹¹Рече же авраам: рекох бо: негли несть благочестия на месте сем: и убиют мя жены ради моея:

¹²ибо истинно сестра ми есть по отцу, а не по матери: бысть же ми в жену:

¹³и бысть егда изведе мя Бог от дому отца моего, и рех ей: правду сию сотвориши ми: во всяко место, идеже аще приидем, тамо рцы о мне, яко брат ми есть.

¹⁴Взя же авимелех тысящу дидрахм (сребра), и овцы, и телцы, и рабы, и рабыни, и даде аврааму: и отдаде ему сарру жену его.

¹⁵И рече авимелех аврааму: се, земля моя пред тобою: идеже аще тебе угодно есть, вселися.

¹⁶Сарре же рече: се, дах тысящу дидрахм брату твоему: сия будут тебе в честь лица твоего, и всем, яже суть с тобою, и во всем истинствуй.

¹⁷Помолися же авраам Богу, и исцели Бог авимелеха и жену его и рабыни его, и начаша раждати:

¹⁸яко заключая заключи Господь от внеуду всяка ложесна в дому авимелеха, сарры ради жены авраамли.