Read Елизаветинская Библия, 1751 Бытие 21 Bible Online

Бытие 21 - Елизаветинская Библия, 1751 bible

Бытие 21

¹И Господь посети сарру, якоже рече: и сотвори Господь сарре, якоже глагола.

²И заченши сарра роди аврааму сына в старости, во время, якоже глагола ему Господь:

³и нарече авраам имя сыну своему рождшемуся ему, егоже роди ему сарра, исаак:

⁴обреза же авраам исаака во осмый день, якоже заповеда ему Бог.

⁵Авраам же бе ста лет, егда бысть ему исаак сын его.

⁶Рече же сарра: смех мне сотвори Господь: иже бо аще услышит, обрадуется со мною.

⁷И рече: кто возвестит аврааму, яко млеком питает отроча сарра, яко родих сына в старости моей?

⁸И возрасте отроча, и отдоено бысть: и сотвори авраам учреждение велие, в оньже день отдоися исаак сын его.

⁹Видевши же сарра сына агари египтяныни, иже бысть аврааму, играюща со исааком сыном своим,

¹⁰и рече аврааму: изжени рабу сию и сына ея: не наследит бо сын рабы сея с сыном моим исааком.

¹¹Жесток же явися глагол сей зело пред авраамом о сыне его исмаиле.

¹²И рече Бог аврааму: да не будет жестоко пред тобою о отроце и о рабыни: вся елика аще речет тебе сарра, слушай гласа ея: яко во исааце наречется тебе семя:

¹³сына же рабыни сея в язык велик сотворю его, яко семя твое есть.

¹⁴Воста же авраам заутра и взя хлебы и мех воды, и даде агари: и возложи на плещы ея отроча и отпусти ю. Отшедши же заблуждаше в пустыни, у кладязя клятвеннаго:

¹⁵оскуде же вода из меха: и поверже отроча под елию единою.

¹⁶Отшедши же седяше прямо ему издалече, якоже дострелити из лука: рече бо: да не вижду смерти детища моего. И седе прямо ему издалече. Воскричав же отроча, восплакася:

¹⁷услыша же Бог глас отрочате от места, идеже бяше: и воззва ангел Божий агарь с небесе и рече ей: что есть, агарь? не бойся: услыша бо Бог глас отрочища от места, идеже есть:

¹⁸востани и поими отроча, и ими рукою твоею его: в язык бо велик сотворю его.

¹⁹И отверзе Бог очи ея, и узре кладязь воды живы: и иде, и налия мех воды, и напои отроча.

²⁰И бяше Бог со отрочатем, и возрасте, и вселися в пустыни, и бысть стрелец.

²¹И поселися в пустыни фаран: и поят ему мати его жену от земли египетския.

²²Бысть же в то время, и рече авимелех, и охозаф невестоводитель его, и фихол воевода силы его, ко аврааму, глаголя: Бог с тобою во всех, яже твориши:

²³Ныне убо кленися ми Богом, не обидети мене, ниже семене моего, ниже имене моего: но по правде, юже сотворих с тобою, сотвориши со мною и земли, идеже ты вселился еси на ней.

²⁴И рече авраам: аз кленуся.

²⁵И обличи авраам авимелеха о кладязех водных, яже отяша отроцы авимелеховы.

²⁶И рече ему авимелех: не ведех, кто сотвори тебе вещь сию: ниже ты ми поведал еси, ниже аз слышах, токмо днесь.

²⁷И взя авраам овцы и юнцы и даде авимелеху: и завещаста оба завет.

²⁸И постави авраам седмь агниц овчих единых.

²⁹И рече авимелех аврааму: что суть седмь агницы овец сих, яже поставил еси едины?

³⁰И рече авраам: яко седмь сих агниц возмеши у мене, да будут ми во свидетелство, яко аз ископах кладязь сей.

³¹Сего ради наименова имя месту тому кладязь клятвенный: яко тамо клястася оба

³²и завещаста завет у кладязя клятвеннаго. Воста же авимелех, и охозаф невестоводитель его, и фихол воевода силы его, и возвратишася в землю филистимску.

³³И насади авраам ниву у кладязя клятвеннаго, и призва ту имя Господа, Бога вечнаго.

³⁴Обита же авраам в земли филистимстей дни многи.