Read Елизаветинская Библия, 1751 Бытие 27 Bible Online

Бытие 27 - Елизаветинская Библия, 1751 bible

Бытие 27

¹Бысть же, повнегда состаретися исаакови, и притупишася очи его еже видети: и призва исава сына своего старейшаго, и рече ему: сыне мой. И рече: се, аз.

²И рече исаак: се, состарехся, и не вем дне скончания моего:

³ныне убо возми орудие твое, тул же и лук, и изыди на поле, и улови ми лов:

⁴и сотвори ми снеди, якоже люблю аз: и принеси ми, да ям, яко да благословит тя душа моя, прежде даже не умру.

⁵Ревекка же слыша глаголюща исаака ко исаву сыну своему. Изыде же исав на поле уловити лов отцу своему.

⁶Ревекка же рече ко иакову сыну своему меншему: се, аз слышах отца твоего беседующа ко исаву брату твоему, глаголюща:

⁷принеси ми лов, и сотвори ми снеди, да ядый благословлю тя пред Господем, прежде неже умрети ми:

⁸ныне убо, сыне мой, послушай мене, якоже аз заповедаю ти:

⁹и шед во овцы, поими мне оттуду два козлища мягка и добра, и сотворю я снеди отцу твоему, якоже любит:

¹⁰и внесеши отцу твоему, и будет ясти, яко да благословит тя отец твой, прежде даже не умрет.

¹¹Рече же иаков к ревекце матери своей: исав брат мой есть муж космат, аз же муж гладкий:

¹²да не како осяжет мя отец мой, и буду пред ним яко презираяй, и наведу на себе клятву, а не благословение.

¹³Рече же ему мати: на мне клятва твоя, чадо: точию послушай гласа моего, и шед принеси ми.

¹⁴Шед же взя и принесе матери, и сотвори мати его снеди, якоже любляше отец его.

¹⁵И вземши ревекка одежду исава сына своего старейшаго добрую, яже бысть у нея в дому, облече оною иакова сына своего меншаго,

¹⁶и кожицами козлячими обложи мышцы его, и нагое выи его:

¹⁷и даде снеди и хлебы, яже сотвори, в руце иакову сыну своему.

¹⁸И внесе отцу своему и рече: отче. Он же рече: се, аз: кто еси ты, чадо?

¹⁹И рече иаков отцу: аз исав первенец твой, сотворих, якоже рекл ми еси: востав сяди и яждь от лова моего, яко да благословит мя душа твоя.

²⁰Рече же исаак сыну своему: что сие, еже скоро обрел еси, о чадо? Он же рече: еже даде Господь Бог твой предо мною.

²¹Рече же исаак иакову: приближися ко мне, и осяжу тя, чадо, аще ты еси сын мой исав, или ни.

²²Приближися же иаков ко исааку отцу своему, и осяза его и рече: глас убо глас иаковль, руце же руце исавове.

²³И не позна его: бесте бо руце его, яко руце исава брата его космате. И благослови его

²⁴и рече: ты ли еси сын мой исав? Он же рече: аз.

²⁵И рече: принеси ми, и ям от лова твоего, чадо, да благословит тя душа моя. И принесе ему, и яде, и принесе ему вино, и пи.

²⁶И рече ему исаак отец его: приближися ко мне и облобызай мя, чадо.

²⁷И приближився лобыза его: и обоня воню риз его, и благослови его и рече: се, воня сына моего, яко воня нивы исполнены, юже благослови Господь:

²⁸и да даст тебе Бог от росы небесныя и от тука земли, и множество пшеницы и вина:

²⁹и да поработают тебе языцы, и да поклонятся тебе князи, и буди господин брату твоему, и поклонятся тебе сынове отца твоего: проклинаяй тя проклят, благословляяй же тя благословен.

³⁰И бысть по еже престати исааку благословляющу иакова сына своего: и бысть егда изыде иаков от лица исаака отца своего, и исав брат его прииде с ловитвы.

³¹Сотвори же и той снеди и принесе отцу своему, и рече отцу: да востанет отец мой, и да яст от лова сына своего, яко да благословит мя душа твоя.

³²И рече ему исаак отец его: кто еси ты? Он же рече: аз есмь сын твой первенец исав.

³³Ужасеся же исаак ужасом велиим зело и рече: кто убо уловивый мне лов и принесый ми? и ядох от всех, прежде неже приити тебе, и благослових его, и благословен будет.

³⁴Бысть же егда услыша исав глаголы отца своего исаака, возопи гласом велиим и горьким зело, и рече: благослови убо и мене, отче.

³⁵Рече же ему: пришед брат твой с лестию, взя благословение твое.

³⁶И рече (исав): праведно наречеся имя ему иаков: запя бо мя се уже вторицею, и первенство мое взя, и ныне взя благословение мое. И рече исав отцу своему: не оставил ли еси (и) мне благословения, отче?

³⁷Отвещав же исаак, рече исаву: аще господина его сотворих тебе, и всю братию его сотворих рабы ему, пшеницею и вином утвердих его: тебе же что сотворю, чадо?

³⁸Рече же исав ко отцу своему: еда едино есть благословение у тебе, отче? благослови убо и мене, отче. Умилившуся же исааку, возопи гласом велиим исав и восплакася.

³⁹Отвещав же исаак отец его, рече ему: се, от тука земли будет вселение твое, и от росы небесныя свыше:

⁴⁰и мечем твоим жити будеши, и брату твоему поработаеши: будет же (время) егда низложиши и отрешиши ярем его от выи твоея.

⁴¹И враждоваше исав на иакова о благословении, имже благослови его отец его. Рече же исав во уме своем: да приближатся дние плача отца моего, да бых убил иакова брата моего.

⁴²Возвещена же быша ревекце словеса исава сына ея старейшаго: и пославши призва иакова сына своего юнейшаго и рече ему: се, исав брат твой грозит тебе убити тя:

⁴³ныне убо, чадо, послушай моего гласа, и востав бежи в месопотамию к лавану брату моему в харран,

⁴⁴и поживи с ним дни некия, дондеже отвратится ярость и гнев брата твоего от тебе,

⁴⁵и забудет яже ему сотворил еси, и пославши приведу тя оттуду, да не когда безчадна буду от обоих вас в день един.

⁴⁶Рече же ревекка ко исааку: стужих си жизнию моею дщерей ради сынов хеттейских: аще поймет иаков жену от дщерей земли сея, то вскую ми жити?