Read Елизаветинская Библия, 1751 Бытие 29 Bible Online

Бытие 29 - Елизаветинская Библия, 1751 bible

Бытие 29

¹И востав иаков на нозе, иде в землю восточную к лавану сыну вафуила сирина, брату же ревекки матере иаковли и исавли.

²Узре же, и се, кладязь на поли: и бяху тамо три стада овец, почивающе при нем: от того бо кладязя напаяхуся стада. Камень же велий бяше над устием кладязя.

³И собирахуся тамо вся стада: и отваляху камень от устия кладязя и напаяху овцы: и паки полагаху камень на устии кладязя на месте своем.

⁴Рече же им иаков: братия, откуду есте вы? Они же реша: от харрана есмы.

⁵Рече же им: знаете ли лавана сына нахорова? Они же реша: знаем.

⁶Рече же им: здравствует ли? Они же реша: здравствует. И се, рахиль дщи его идяше со овцами.

⁷И рече иаков: еще есть дне много, не у час собирати скота: напоивше овцы, шедше пасите.

⁸Они же реша: не можем, дондеже соберутся вси пастуси и отвалят камень от устия кладязя, и напоим овцы.

⁹Еще ему глаголющу к ним, и се, рахиль дщи лаваня грядяше со овцами отца своего: она бо пасяше овцы отца своего.

¹⁰Бысть же яко узре иаков рахиль дщерь лавана брата матере своея и овцы лавана брата матере своея, и приступив иаков отвали камень от устия кладязя:

¹¹и напои овцы лавана брата матере своея, и целова иаков рахиль, и возопив гласом своим, восплакася:

¹²и поведа рахили, яко брат отца ея есть и яко сын ревеккин есть. И текши поведа отцу своему по словесем сим.

¹³Бысть же яко услыша лаван имя иакова сына сестры своея, тече во сретение ему и о‹емь его лобза, и введе его в дом свой. И поведа лавану вся словеса сия.

¹⁴И рече ему лаван: от костей моих и от плоти моея еси ты. И бе с ним месяц дний.

¹⁵Рече же лаван иакову: понеже брат мой еси ты, да не поработаеши мне туне: повеждь ми, что мзда твоя есть?

¹⁶У лавана же бесте две дщери: имя старейшей лиа, имя же юнейшей рахиль.

¹⁷Очи же лиины болезненны: рахиль же бе добра видом и красна взором зело.

¹⁸Возлюби же иаков рахиль. И рече: поработаю тебе седмь лет за рахиль дщерь твою меншую.

¹⁹Рече же ему лаван: лучше ми тебе дати ю, нежели иному отдати мужеви: со мною живи.

²⁰И работа иаков за рахиль седмь лет: и быша пред ним яко малы дни, занеже любяше ю.

²¹Рече же иаков лавану: даждь ми жену мою, понеже совершишася дние, да вниду к ней.

²²Собра же лаван вся мужы места того, и сотвори брак.

²³И бысть вечер, и поемь лаван лию дщерь свою, введе ко иакову: и вниде к ней иаков.

²⁴Даде же лаван лии дщери своей зелфу рабыню свою, ей в рабу.

²⁵Бысть же заутра, и се, бяше лиа, и рече иаков лавану: что сие сотворил ми еси? не рахили ли ради работах у тебе? вскую же обидел мя еси?

²⁶Отвеща же лаван: несть тако в нашем месте вдати меншую прежде старейшия.

²⁷Скончай убо седмины сея, и дам ти и сию за дело, еже делаеши у мене еще седмь лет другия.

²⁸Сотвори же иаков тако: и исполни седмины сея: и даде ему лаван рахиль дщерь свою ему в жену.

²⁹Даде же лаван рахили дщери своей валлу рабу свою, ей в рабу.

³⁰И вниде (иаков) к рахили: возлюби же рахиль паче, неже лию: и работа ему седмь лет другия.

³¹Видев же Господь Бог, яко ненавидима бяше лиа, отверзе ложесна ея: рахиль же бяше неплоды.

³²И зачат лиа и роди сына иакову: нарече же имя ему рувим, глаголя: яко призре Господь на мое смирение и даде ми сына: ныне убо возлюбит мя муж мой.

³³И зачат паки лиа и роди сына втораго иакову и рече: зане услыша Господь, яко ненавидима есмь, и придаде ми и сего. И нарече имя ему симеон.

³⁴И зачат еще и роди сына и рече: в нынешнее время у мене будет муж мой, родих бо ему три сыны. Сего ради нарече имя ему левий.

³⁵И заченши еще роди сына и рече: ныне еще сие исповем Господу. Сего ради нарече имя ему иуда, и преста раждати.