Read Елизаветинская Библия, 1751 Бытие 30 Bible Online

Бытие 30 - Елизаветинская Библия, 1751 bible

Бытие 30

¹Видевши же рахиль, яко не роди иакову, и поревнова рахиль сестре своей и рече иакову: даждь ми чада: аще же ни, умру аз.

²Разгневався же иаков на рахиль, рече ей: еда вместо Бога аз есмь, иже лиши тя плода утробнаго?

³Рече же рахиль иакову: се, раба моя валла: вниди к ней, и да родит на коленах моих, и чадо сотворю и аз от нея.

⁴И даде ему валлу рабу свою ему в жену: и вниде к ней иаков.

⁵И зача валла раба рахилина и роди иакову сына.

⁶И рече рахиль: суди ми Бог и послуша гласа моего, и даде ми сына. Сего ради прозва имя ему дан.

⁷И зачат еще валла раба рахилина и роди сына втораго иакову.

⁸И рече рахиль: подя мя Бог, и сравнихся с сестрою моею, и возмогох. И прозва имя его неффалим.

⁹Виде же лиа, яко преста раждати, и взя зелфу рабу свою и даде ю иакову в жену: и вниде к ней.

¹⁰И зачат зелфа раба лиина и роди иакову сына.

¹¹И рече лиа: благо мне случися. И нарече имя ему гад.

¹²И зачат еще зелфа раба лиина и роди иакову сына втораго.

¹³И рече лиа: блажена аз, яко ублажат мя жены. И прозва имя ему асир.

¹⁴Иде же рувим в день жатвы пшеницы и обрете яблока мандрагорова на поли, и принесе я к лии матери своей. Рече же рахиль к лии сестре своей: даждь ми от мандрагоров сына твоего.

¹⁵Рече же лиа: не доволно ли тебе, яко взяла еси мужа моего? еда и мандрагоры сына моего возмеши? Рече же рахиль: не тако: да будет сея нощи с тобою за мандрагоры сына твоего.

¹⁶Прииде же иаков с поля в вечер, и изыде лиа во сретение ему и рече: ко мне внидеши днесь: наяла бо тя есмь за мандрагоры сына моего. И бысть с нею тоя нощи.

¹⁷И послуша Бог лию, и заченши роди иакову сына пятаго.

¹⁸И рече лиа: даде ми Бог мзду мою, зане дах рабу мою мужу моему. И прозва имя ему иссахар, еже есть мзда.

¹⁹И зачат еще лиа и роди сына шестаго иакову.

²⁰И рече лиа: дарова ми Бог дар добр в нынешнее время: возлюбит мя муж мой: родих бо ему шесть сынов. И прозва имя ему завулон.

²¹И посем роди дщерь, и прозва имя ей дина.

²²Помяну же Бог рахиль, и услыша ю Бог, и отверзе утробу ея:

²³и заченши, роди иакову сына. И рече рахиль: отя Бог укоризну мою.

²⁴И нарече имя ему иосиф, глаголющи: да придаст ми Бог сына другаго.

²⁵Бысть же яко роди рахиль иосифа, рече иаков лавану: отпусти мя, да иду на место мое и в землю мою:

²⁶отдаждь ми жены моя и дети моя, ихже ради работах тебе, да отиду: ты бо веси работу, юже работах ти.

²⁷Рече же ему лаван: аще обретох благодать пред тобою: усмотрих бо, яко благослови мя Бог пришествием твоим:

²⁸раздели мзду свою у мене, и дам ти.

²⁹Рече же иаков: ты веси, яже работах тебе, и колико бе скота твоего у мене:

³⁰мало бо бе елико твоего у мене и возрасте во множество: и благослови тя Господь пришествием моим: ныне убо когда сотворю и аз себе дом?

³¹И рече к нему лаван: что ти дам? Рече же ему иаков: не даси ми ничтоже: аще сотвориши ми глагол сей, паки пасти имам овцы твоя, и сохраню:

³²оыди вся овцы твоя ныне и разлучи оттуду всякую овцу пелесую во овцах, и всяку беловатую и пеструю в козах, будет ми мзда (и будет мое):

³³и послушает мене правда моя во утрешний день, яко есть мзда моя пред тобою: все еже аще не будет пестро и беловатое в козах, и пелесо во овцах, за украденое будет мною.

³⁴Рече же ему лаван: буди по словеси твоему.

³⁵И разлучи в той день козлы пестрыя и беловатыя, и вся козы пестрыя и беловатыя, и все еже бе пелесо во овцах, и все еже бяше белое в них: и даде в руце сыном своим:

³⁶и разстави путем трех дний, и между ими и между иаковом: иаков же пасяше овцы лавановы оставшыяся.

³⁷Взя же иаков себе жезл стиракинов зеленый, и орехов, и яворовый: и острога я иаков пестрением белым, сострогая кору: являшеся же на жезлах белое, еже острога, пестро.

³⁸И положи жезлы, яже острога, в поилных корытех воды: да егда приидут овцы пити, пред жезлы пришедшым им пити, зачнут овцы по жезлом:

³⁹и зачинаху овцы по жезлом, и раждаху овцы беловатыя и пестрыя и пепеловидныя пестрыя.

⁴⁰Агницы же разлучи иаков и постави прямо овцам овна беловатаго и всякое пестрое во агнцах: и разлучи себе стада по себе, и не смеси сих со овцами лавановыми.

⁴¹Бысть же во время, в неже зачинаху овцы во чреве приемлющя, положи иаков жезлы пред овцами в корытех, еже зачинати им по жезлом:

⁴²егда же раждаху овцы, не полагаше: быша же неназнаменаныя лавановы, а знаменаныя иаковли.

⁴³И разбогате человек зело зело: и быша ему скоти мнози, и волове, и раби, и рабыни, и велблюды, и ослы.