Read Елизаветинская Библия, 1751 Бытие 31 Bible Online

Бытие 31 - Елизаветинская Библия, 1751 bible

Бытие 31

¹Слыша же иаков словеса сынов лавановых, глаголющих: взя иаков вся яже отца нашего, и от сущих отца нашего сотвори всю славу сию.

²И виде иаков лице лаване, и се не бяше к нему, яко вчера и третияго дне.

³Рече же Господь ко иакову: возвратися в землю отца твоего и в род твой, и буду с тобою.

⁴Послав же иаков, призва лию и рахиль на поле, идеже бяху стада,

⁵и рече им: вижду аз лице отца вашего, яко несть ко мне, якоже вчера и третияго дне: Бог же отца моего бе со мною:

⁶и вы сами весте, яко всею силою моею работах отцу вашему:

⁷отец же ваш обиде мя и измени мзду мою десяти агнцев, но не даде ему Бог зла сотворити мне.

⁸Аще сице речет: пестрыя, будет твоя мзда: и родятся вся овцы пестрыя. Аще же речет: белыя, будет твоя мзда: и родятся вся овцы белыя.

⁹И отя Бог вся скоты отца вашего и даде я мне.

¹⁰И бысть егда зачинаху овцы во чреве приемлющя, и видех очима моима во сне: и се, козлы и овны восходяще бяху на овцы и козы, беловатыя и пестрыя и пепеловидныя пестрыя.

¹¹И рече ми ангел Божий во сне: иакове. Аз же рех: что есть?

¹²И рече: воззри очима твоима и виждь козлы и овны восходящыя на овцы и козы, белыя и пестрыя и пепеловидныя пестрыя: видех бо, елика тебе лаван творит:

¹³аз есмь Бог явивыйся тебе на месте Божии, идеже помазал ми еси тамо столп, и обетовал ми еси тамо обет: ныне убо востани и изыди от земли сея, и иди в землю рождения твоего, и буду с тобою.

¹⁴И отвещавши рахиль и лиа, рекосте ему: еда есть нам еще часть или наследие в дому отца нашего?

¹⁵не яко ли чужыя вменихомся ему? продаде бо нас и снеде снедию сребро наше:

¹⁶все богатство и слава, юже отя Бог от отца нашего, нам будет и чадом нашым: ныне убо, елика тебе рече Бог, твори.

¹⁷Востав же иаков, взя жены своя и дети своя на велблюды,

¹⁸и забра вся имения своя и вся стяжания, яже притяжа в месопотамии, и вся своя, еже отити ко исааку отцу своему в землю ханаанскую.

¹⁹Лаван же отиде острищи овцы своя: украде же рахиль идолы отца своего.

²⁰Утаи же иаков от лавана сирина, не поведати ему, яко уходит,

²¹и отбеже сам, и вся яже его, и прейде реку, и взыде на гору галаад.

²²Поведася же лавану сирину в третий день, яко бежа иаков:

²³и поим сыны и братию свою с собою, гна вслед его путем седмь дний: и достиже его на горе галаад.

²⁴Прииде же Бог к лавану сирину нощию во сне и рече ему: блюди себе, да не когда возглаголеши ко иакову зла.

²⁵И постиже лаван иакова: иаков же постави кущу свою на горе: лаван же разстави братию свою на горе галаад.

²⁶Рече же лаван иакову: что сотворил еси? вскую тайно ушел еси и окрал еси мя, и отвел дщери моя, яко пленницы оружием?

²⁷и аще бы ми поведал еси, отпустил бых тя с веселием и с мусикиею, и тимпаны и гусльми:

²⁸и не сподобихся целовати детей моих и дщерей моих: ныне же несмысленно сотворил еси:

²⁹и ныне рука моя может озлобити тя. Но Бог отца твоего вчера рече ко мне, глаголя: блюди себе, да не когда возглаголеши ко иакову зла.

³⁰Ныне убо отшел еси: желанием бо возжелал еси отити в дом отца твоего: вскую украл еси боги моя?

³¹Отвещав же иаков рече к лавану: понеже убояхся: рех бо, да не како отимеши дщери твоя от мене, и вся моя.

³²И рече иаков: у негоже аще обрящеши боги твоя, да не будет жив пред братиею нашею: узнавай, что есть твоего у мене, и возми. И не позна у него ничтоже: не ведяше же иаков, яко рахиль жена его украде я.

³³Вшед же лаван, оыска в кущи лиине, и не обрете. И изыде из кущи лиины, и оыска кущу иаковлю и в кущи двоих рабынь, и не обрете. Вниде же и в кущу рахилину.

³⁴Рахиль же взя идолы и положи оныя под седло велблюже и седе на них,

³⁵и рече отцу своему: не имей себе тяжко, господине: не могу востати пред тобою, яко обычная женская ми суть. Иска же лаван по всей кущи, и не обрете идолов.

³⁶Разгневася же иаков и пряшеся с лаваном. Отвещав же иаков рече лавану: кая неправда моя? и кий грех мой, яко погнал еси вслед мене,

³⁷и яко оыскал еси вся сосуды дому моего? что обрел еси от всех сосудов дому твоего? положи зде пред братиею твоею и братиею моею, и да разсудят между обема нама:

³⁸се, двадесять лет аз есмь с тобою: овцы твоя и козы твоя не быша без плода: овнов овец твоих не поядох:

³⁹звероядины не принесох к тебе: аз воздаях тебе от мене самаго татбины денныя и татбины нощныя:

⁴⁰бых во дни жегомь зноем, и студению в нощи, и отхождаше сон от очию моею:

⁴¹се, мне двадесять лет аз есмь в дому твоем, работах тебе четыренадесять лет двух ради дщерей твоих и шесть лет за овцы твоя, и преобидел еси мзду мою десятию агницами:

⁴²аще не бы Бог отца моего авраама, и страх исаака был мне, ныне тща отпустил бы мя еси: смирение мое и труд руку моею увиде Бог, и обличи тя вчера.

⁴³Отвещав же лаван, рече ко иакову: дщери дщери моя и сынове сынове мои, и скоти скоти мои, и вся елика ты видиши моя суть и дщерей моих: что сотворю им днесь, или чадом их, яже родиста?

⁴⁴ныне убо гряди, завещаим завет аз и ты: и будет во свидетелство между мною и тобою. Рече же ему иаков: се, никтоже с нами есть: виждь, Бог свидетель между мною и тобою.

⁴⁵И взем иаков камень, постави его в столп.

⁴⁶Рече же иаков братии своей: соберите камение. И собраша камение и сотвориша холм: и ядоша, и пиша тамо на холме. Рече же ему лаван: холм сей свидетелствует между мною и тобою днесь.

⁴⁷И прозва его лаван холм свидетелства: иаков же прозва холм свидетель.

⁴⁸Рече же лаван ко иакову: се, холм сей и столп, егоже поставих между мною и тобою, свидетелствует холм сей и свидетелствует столп сей: сего ради прозвася имя холм свидетелствует,

⁴⁹и видение, еже рече: да видит Бог между мною и тобою, яко отидем друг от друга:

⁵⁰аще смириши дщери моя, аще поймеши жены над дщери моя виждь, никтоже с нами есть видяй: Бог свидетель между мною и между тобою.

⁵¹И рече лаван иакову: се, холм сей свидетель и столп сей:

⁵²аще бо аз не прейду к тебе, ниже ты да прейдеши ко мне холма сего и столпа сего со злобою:

⁵³Бог авраамль и Бог нахоров да судит между нама. И кляся иаков страхом отца своего исаака,

⁵⁴и пожре иаков жертву на горе и воззва братию свою: ядоша же и пиша и спаша на горе.

⁵⁵Востав же лаван заутра, лобыза сыны и дщери своя и благослови я: и возвратився лаван, отиде на место свое.