Read Елизаветинская Библия, 1751 Бытие 33 Bible Online

Бытие 33 - Елизаветинская Библия, 1751 bible

Бытие 33

¹Воззрев же иаков очима своима, виде: и се, исав брат его идый, и четыриста мужей с ним. И раздели иаков дети лии и рахили и двум рабыням,

²и постави обе рабыни и сыны их в первых, лию же и дети ея позади, а рахиль и иосифа в последних:

³сам же изыде первее пред ними и поклонися до земли седмижды, дондеже приближися к брату своему.

⁴И притече исав во сретение ему: и о‹емь его, припаде на выю его и облобыза его: и плакастася оба.

⁵И воззрев исав, виде жены и дети и рече: что сии тебе суть? Он же рече: дети, имиже помилова Бог раба твоего.

⁶И приступиша рабыни и дети их и поклонишася:

⁷и приступи лиа и дети ея и поклонишася: посем же приступи рахиль и иосиф и поклонистася.

⁸И рече: что сия тебе суть, полцы сии вси, яже сретох? Он же рече: да обрящет раб твой благодать пред тобою, господине.

⁹Рече же исав: суть мне многа, брате: да будут тебе твоя.

¹⁰И рече иаков: аще обретох благодать пред тобою, приими дары от руку моею: сего ради видех лице твое, яко бы аще кто видел лице Божие: и возблаговолиши о мне:

¹¹приими благословение мое, еже принесох тебе, яко помилова мя Бог, и суть ми вся. И принуди его, и взя.

¹²И рече: воставше пойдем прямо.

¹³Рече же ему: господин мой весть, яко дети мои юны, овцы же и говяда бременны у мене: аще убо пожену я един день, измрет весь скот:

¹⁴да предидет господин мой пред рабом своим: аз же укреплюся на пути умедлением шествия моего, еже предо мною, и якоже возмогут ити дети, дондеже прииду к господину моему в сиир.

¹⁵И рече исав: оставлю с тобою от людий сущих со мною. Он же рече: вскую сие? довлеет, яко обретох благодать пред тобою, господине.

¹⁶Возвратися же исав в том дни путем своим в сиир:

¹⁷и иаков пойде в кущы, и постави себе тамо храмины, и скоту своему сотвори кущы: сего ради нарече имя месту тому кущы.

¹⁸И прииде иаков в салим град сикимск, иже есть в земли ханаанстей, егда прииде от месопотамии сирския, и ста пред лицем града:

¹⁹и купи часть села, идеже постави кущу свою тамо, у еммора отца сихемля, стома агнцы:

²⁰и постави тамо жертвенник, и призва Бога израилева.