Read Елизаветинская Библия, 1751 Бытие 35 Bible Online

Бытие 35 - Елизаветинская Библия, 1751 bible

Бытие 35

¹Рече же Бог ко иакову: востав взыди на место вефиль, и живи тамо, и сотвори тамо жертвенник Богу явльшемуся тебе, егда бежал еси от лица исава брата твоего.

²Рече же иаков дому своему и всем иже с ним: поверзите боги чуждыя, иже с вами, от среды вас и очиститеся, и измените ризы своя:

³и воставше взыдем в вефиль и сотворим тамо жертвенник Богу послушавшему мене в день скорбения, иже бе со мною и спасе мя на пути, в оньже ходих.

⁴И вдаша иакову боги чуждыя, иже бяху в руках их, и усерязи яже во ушесех их: и скры я иаков под теревинфом иже в сикимех: и погуби я до днешняго дне.

⁵И воздвижеся израиль от сикимов, и бысть страх Божий на градех, иже окрест их: и не гнаша вслед сынов израилевых.

⁶Прииде же иаков в лузу, яже есть в земли ханаанстей, яже есть вефиль, сам и вси людие, иже бяху с ним,

⁷и созда тамо жертвенник, и прозва имя месту тому вефиль: тамо бо явися ему Бог, егда бежаше он от лица исава брата своего.

⁸Умре же девора, доилица ревеккина, и погребоша ю ниже вефиля под дубом, и прозва имя ему дуб плача.

⁹Явися же Бог иакову еще в лузе, егда прииде от месопотамии сирския, и благослови его Бог

¹⁰и рече ему Бог: имя твое не прозовется ктому иаков, но израиль будет имя тебе. И нарече имя ему израиль.

¹¹Рече же ему Бог: аз Бог твой: расти и множися: языцы и собрания языков будут от тебе, и царие из чресл твоих изыдут:

¹²и землю, юже дах аврааму и исааку, тебе дах ю, тебе будет, и семени твоему по тебе дам землю сию.

¹³Взыде же Бог от него от места, идеже глагола с ним:

¹⁴и постави иаков столп на месте, идеже глагола с ним Бог, столп каменный, и пожре на нем жертву и возлия на него елей:

¹⁵и прозва иаков имя месту тому, идеже глагола с ним Бог, вефиль.

¹⁶(Востав же (иаков) от вефиля, и постави кущу свою далее столпа гадер.) Бысть же егда приближися к хаврафе приити до земли ефрафа, роди рахиль и возбедствова в рождении:

¹⁷бысть же внегда жестоко ей родити, рече ей баба: дерзай, ибо сей тебе есть сын.

¹⁸Бысть же егда оставляше ю душа, умираше бо, прозва имя ему сын болезни моея: отец же прозва имя ему вениамин.

¹⁹Умре же рахиль, и погребоша ю на пути ипподрома ефрафы: сия есть вифлеем:

²⁰и постави иаков столп на гробе ея: сей есть столп над гробом рахилиным даже до дне сего.

²¹Изыде же оттуду израиль и постави кущу свою за столпом гадер.

²²Бысть же егда вселися израиль в земли той, иде рувим и спа с валлою, наложницею отца своего иакова. И слыша израиль, и зло явися пред ним. Беша же сынове иаковли дванадесять.

²³Сынове лиины: рувим, первенец иаковль, симеон, левий, иуда, иссахар, завулон.

²⁴Сынове же рахилины: иосиф и вениамин.

²⁵Сынове же валлы, рабы рахилины: дан и неффалим.

²⁶Сынове же зелфы, рабы лиины: гад и асир. Сии сынове иаковли, иже родишася ему в месопотамии сирстей.

²⁷Прииде же иаков ко исааку отцу своему (еще живу сущу ему) в мамврию, во град польный: сей есть хеврон в земли ханаанстей, идеже обита авраам и исаак.

²⁸Быша же дние исааковы, яже поживе, сто осмьдесят лет:

²⁹и ослабев исаак умре, и приложися к роду своему стар исполнь дний: и погребоста его исав и иаков, сынове его.