Read Елизаветинская Библия, 1751 Бытие 37 Bible Online

Бытие 37 - Елизаветинская Библия, 1751 bible

Бытие 37

¹Вселися же иаков в земли, идеже обита исаак, отец его, в земли ханаани.

²Сии же роди иаковли. Иосиф же бяше седминадесяти лет, пасый овцы отца своего с братиею своею, юн сый, с сынми валлы и с сынми зелфы, жен отца своего: нанесоша же на иосифа злу клевету ко израилю отцу своему.

³Иаков же любляше иосифа паче всех сынов своих, яко сын в старости ему бысть: и сотвори ему ризу пестру.

⁴Видевше же братия его, яко любит его отец паче всех сынов своих, возненавидеша его и не можаху глаголати к нему ничтоже мирно.

⁵Видев же иосиф сон, поведа и братии своей

⁶и рече им: послушайте сна сего, егоже видех:

⁷мнех вас вяжущих снопы среде поля: и воста мой сноп и ста прямо, ваши же снопы обратившеся поклонишася моему снопу.

⁸Реша же ему братия его: еда царствуя царствовати будеши над нами, или господствуя господствовати будеши над нами? И приложиша еще ненавидети его снов ради его и ради словес его.

⁹Виде же сон другий и поведа его отцу своему и братии своей, и рече: се, видех другий сон: аки бы солнце и луна и единонадесять звезд покланяхуся мне.

¹⁰И запрети ему отец его и рече ему: что сон сей, егоже еси видел? еда пришедше приидем аз и мати твоя и братия твоя поклонитися тебе до земли?

¹¹Позавидеша же ему братия его: отец же его соблюде слово сие.

¹²Отидоша же братия его пасти овцы отца своего в сихем.

¹³И рече израиль ко иосифу: еда братия твоя не пасут в сихеме? гряди да послю тя к ним. Рече же ему: се, аз.

¹⁴Рече же ему израиль: шед, виждь, аще здравствуют братия твоя и овцы, и повеждь ми. И посла его от юдоли хеврони. И прииде в сихем:

¹⁵и обрете его человек заблуждающа на поли: вопроси же его человек глаголя: чесого ищеши?

¹⁶Он же рече: братии моея ищу: повеждь ми, где пасут.

¹⁷Рече же ему человек: отидоша отсюду: слышах бо их глаголющих: пойдем в дофаим. И иде иосиф вслед братии своея и обрете я в дофаиме.

¹⁸Предузреша же его издалече, прежде приближения его к ним, и зле умыслиша убити его:

¹⁹рече же кийждо к брату своему: се, сновидец оный идет:

²⁰ныне убо приидите, убием его и ввержим его во един от рвов, и речем: зверь лют снеде его: и узрим, что будут сония его.

²¹Слышав же рувим, отя его из рук их и рече: не убием его на души.

²²Рече же им рувим: не пролийте крове, вверзите его во един от рвов сих, иже в пустыни, руки же не возложите на него: (тщашеся бо) яко да изымет его от рук их и отдаст его отцу своему.

²³Бысть же егда прииде иосиф к братии своей, совлекоша со иосифа ризу пеструю, яже на нем,

²⁴и поемше его ввергоша в ров: ров же тощь, воды не имяше.

²⁵И седоша ясти хлеб, и воззревше очима видеша, и се, путницы исмаилтяне идяху от галаада, и велблюды их полны фимиама и ритины и стакти: идяху же везуще во египет.

²⁶Рече же иуда ко братии своей: кая польза, аще убием брата нашего и скрыем кровь его?

²⁷грядите продадим его исмаилтяном сим: руце же наши да не будут на нем, яко брат наш и плоть наша есть. Послушаша же братия его.

²⁸И мимоидоша человецы мадиамстии купцы: и извлекоша и возведоша иосифа из рова, и продаша иосифа исмаилтяном на двадесять златниц. И поведоша иосифа во египет.

²⁹Возвратися же рувим к рову и не узре иосифа в рове: и растерза ризы своя,

³⁰и прииде ко братии своей и рече: отрочища несть, аз же камо иду ктому?

³¹Вземше же ризу иосифову, заклаша козлище от коз и помазаша ризу кровию:

³²и послаша ризу пеструю, и принесоша ко отцу своему и рекоша: сию обретохом: познавай, аще риза сына твоего есть, или ни?

³³И позна ю и рече: риза сына моего есть: зверь лют снеде его: зверь восхити иосифа.

³⁴И растерза иаков ризы своя, и возложи вретище на чресла своя, и плакашеся сына своего дни многи.

³⁵Собрашася же вси сынове его и дщери и приидоша утешити его: и не хотяше утешитися, глаголя: яко сниду к сыну моему сетуя во ад. И плакася о нем отец его.

³⁶Мадиане же продаша иосифа во египет пентефрию евнуху фараонову, архимагиру.