Read Елизаветинская Библия, 1751 Бытие 41 Bible Online

Бытие 41 - Елизаветинская Библия, 1751 bible

Бытие 41

¹Бысть же по двою лету дний, фараон виде сон: мняшеся стояти при реце:

²и се, аки из реки исхождаху седмь крав добры видом и избранны телесы, и пасяхуся по брегу:

³другия же седмь крав изыдоша по сих из реки, злы видом и телесы худы, и пасяхуся с кравами по брегу речному:

⁴и поядоша седмь кравы злыя и худыя телесы седмь крав добрых видом и избранных телесы: (и сия невидимы быша, яко внидоша в чресла их). Воста же фараон.

⁵И виде сон вторый: и се, седмь класи исхождаху из стеблия единаго избранны и добры:

⁶друзии же седмь класи тонцыи, истончени ветром, израстаху по них:

⁷и пожроша седмь класи тонцыи и истончени ветром седмь класов избранных и полных. Воста же фараон, и бяше сон.

⁸Бысть же заутра, и возмутися душа его: и послав, созва вся сказатели египетския и вся мудрыя его: и поведа им фараон сон свой: и не бяше сказуяй того фараону.

⁹И рече старейшина винарск к фараону, глаголя: грех мой воспоминаю днесь:

¹⁰фараон разгневася на рабы своя и вверже нас в темницу в дому архимагира, мене и старейшину житарска:

¹¹и видехом сон оба единыя нощи аз и он, кийждо свой сон видехом:

¹²бяше же тамо с нами юноша, отрок евреин архимагиров, и поведахом ему, и разсуди нам:

¹³бысть же, якоже сказа нам, тако и случися, мне паки быти во своем старейшинстве, а оному повешену.

¹⁴Послав же фараон, призва иосифа: и изведоша его из твердыни, и остригоша его, и измениша ризы ему, и прииде к фараону.

¹⁵Рече же фараон иосифу: сон видех, и сказуяй его несть: аз же слышах о тебе глаголющих, яко слышав сны разсуждаеши тыя.

¹⁶Отвещав же иосиф фараону, рече: без Бога не отвещается спасение фараону.

¹⁷Рече же фараон иосифу, глаголя: во сне моем мняхся стояти на брезе речнем:

¹⁸и аки из реки исхождаху седмь кравы добры видом и избранны телесы, и пасяхуся по брегу:

¹⁹и се, другия седмь крав исхождаху вслед их из реки, злы и недобры видом и худы телесы, яковых не виде таковых во всей земли египетстей хуждших:

²⁰и изядоша седмь кравы злыя и худыя седмь крав первых добрых и избранных:

²¹и внидоша во утробы их, и не явишася, яко внидоша во утробы их: и обличия их зла быша, яко и исперва. Востав же, (паки) уснух,

²²и видех паки во сне моем, и аки седмь класи исхождаху из единаго стеблия полны и добры:

²³друзии же седмь класи тонцыи и ветром истончени изницаху вслед их:

²⁴и пожроша седмь класи тонцыи и ветром истончени седмь класов добрых и полных. Рех убо сказателем, и не бысть поведаяй мне того.

²⁵И рече иосиф фараону: сон фараонов един есть: елика Бог творит, показа фараону:

²⁶седмь кравы добрыя седмь лет суть: и седмь класи добрии седмь лет суть: сон фараонов един есть:

²⁷и седмь кравы худыя, яже изыдоша по сих, седмь лет суть, и седмь класи тонцыи и истончени ветром седмь лет суть: будут седмь лет глада:

²⁸слово же еже рех фараону, елика Бог творит, показа фараону:

²⁹се, седмь лет приходит, обилность многа во всей земли египетстей:

³⁰приидут же седмь лет глада по сих, и забудут сытости будущия во всем египте, и погубит глад землю,

³¹и не познается обилие на земли от глада будущаго по сих: силен бо будет зело:

³²повторися же сон фараону дважды, яко истинно будет слово еже от Бога, и ускорит Бог сотворити оно:

³³ныне убо усмотри человека мудра и смыслена и постави его над землею египетскою:

³⁴и да сотворит фараон и поставит местоначалники по земли, и да собирают пятую часть от всех плодов земли египетския седми лет обилных,

³⁵и да соберут всякую пищу седми лет грядущих добрых сих: и да соберется пшеница под руку фараоню, пища во градех да хранится:

³⁶и будет пища соблюдена земли на седмь лет гладных, яже имут быти в земли египетстей, да не потребится земля в гладе.

³⁷Угодно же бысть слово пред фараоном и пред всеми рабы его.

³⁸И рече фараон всем рабом своим: еда обрящем человека сицеваго, иже имать духа Божия в себе?

³⁹Рече же фараон иосифу: понеже показа Бог тебе вся сия, несть человека мудрейша и смысленнейша паче тебе:

⁴⁰ты будеши в дому моем, и уст твоих да послушают вси людие мои, разве престолом аз более тебе буду.

⁴¹Рече же фараон иосифу се, поставляю тя днесь над всею землею египетскою.

⁴²И снем фараон перстень с руки своея, возложи его на руку иосифову, и облече его в ризу червлену, и возложи гривну злату на выю его,

⁴³и всади его на колесницу свою вторую, и проповеда пред ним проповедник: и постави его над всею землею египетскою.

⁴⁴Рече же фараон иосифу: аз фараон: без тебе не воздвигнет руки своея никтоже во всей земли египетстей.

⁴⁵И нарече фараон имя иосифу псонфомфаних: и даде ему асенефу, дщерь петефриа жреца илиопольскаго, ему в жену.

⁴⁶Иосиф же бяше лет тридесяти, егда предста фараону царю египетскому. Изыде же иосиф от лица фараоня и пройде всю землю египетскую.

⁴⁷И сотвори земля в седми летех обилну жатву.

⁴⁸И собра всякую пищу седми лет, в нихже бяше обилность в земли египетстей: и положи пищу во градех: пищы поль града, сущих окрест его, положи в нем.

⁴⁹И собра иосиф пшеницу яко песок морский многу зело, дондеже не можаху исчести: без числа бо бяше.

⁵⁰Иосифу же беста два сына, прежде пришествия седми лет гладных, ихже роди ему асенефа, дщерь петефриа жреца илиопольска:

⁵¹нарече же иосиф имя первенцу манассиа, (глаголя:) яко забыти мне сотвори Бог вся болезни моя, и вся, яже отца моего.

⁵²Имя же второму нарече ефраим, (глаголя:) яко возрасти мя Бог в земли смирения моего.

⁵³Минуша же седмь лет обилных, яже быша в земли египетстей,

⁵⁴и начаша седмь лет гладных приходити, якоже рече иосиф. И бысть глад по всей земли: во всей же земли египетстей быша хлебы.

⁵⁵И взалка вся земля египетская: возопи же народ к фараону о хлебех. Рече же фараон всем египтяном: идите ко иосифу, и еже речет вам, сотворите.

⁵⁶И глад бяше на лицы всея земли. Отверзе же иосиф вся житницы, и продаяше всем египтяном:

⁵⁷и вся страны прихождаху во египет, куповати ко иосифу: обдержаше бо глад всю землю.