Read Елизаветинская Библия, 1751 Бытие 42 Bible Online

Бытие 42 - Елизаветинская Библия, 1751 bible

Бытие 42

¹Видев же иаков, яко купля есть (пшеницы) во египте, рече сыном своим: почто не радите?

²се, слышах, яко есть пшеница во египте: идите тамо и купите нам мало пищи, да живи будем и не умрем.

³Идоша же братия иосифовы десять купити пшеницы во египет.

⁴Вениамина же, брата иосифова, не отпусти с братиею его, рече бо: да не когда случится (на пути) ему зло.

⁵Приидоша же сынове израилевы купити с приходящими: бяше бо глад в земли ханаанстей.

⁶Иосиф же бяше князь земли: сей продаяше всем людем земли (тоя). Пришедше же братия иосифовы, поклонишася ему лицем до земли.

⁷Видев же иосиф братию свою, позна: и отчуждашеся их, и глаголаше им жестоко, и рече им: откуду приидосте? Они же реша: от земли ханаанския купити пищи.

⁸Позна же иосиф братию свою: они же не познаша его.

⁹И помяну иосиф сны своя, яже виде он: и рече им: соглядатаи есте, соглядати путий страны (сея) приидосте.

¹⁰Они же реша: ни, господине, раби твои приидохом купити пищи:

¹¹вси есмы сынове единаго человека: мирницы есмы, не суть раби твои соглядатаи.

¹²Рече же им: ни, но пути земли (сея) приидосте соглядати.

¹³Они же реша: дванадесять есмы братия раби твои в земли ханаани: и се, менший (от нас) со отцем нашим днесь, а другаго несть.

¹⁴Рече же им иосиф: сие есть, еже рекох вам, глаголя, яко соглядатаи есте:

¹⁵в сем явитеся: тако ми здравия фараоня, не изыдете отсюду, аще брат ваш менший не приидет семо:

¹⁶послите от себе единаго, и возмите брата вашего: вы же держими будите, дондеже яве будут словеса ваша, аще истинствуете, или ни: аще же ни, тако ми здравия фараоня, воистинну соглядатаи есте.

¹⁷И даде я под стражу на три дни.

¹⁸Рече же им в день третий: сие сотворите, и живи будете: Бога бо аз боюся:

¹⁹аще мирницы есте, брат ваш да удержится един под стражею: сами же идите и отвезите купленую пшеницу вашу,

²⁰и брата вашего меншаго приведите ко мне, и верна будут словеса ваша: аще же ни, умрете. И сотвориша тако.

²¹И рече кийждо к брату своему: ей, во гресех бо есмы брата ради нашего, яко презрехом скорбение души его, егда моляшеся нам, и не послушахом его: и сего ради прииде на ны скорбение сие.

²²Отвещав же рувим, рече им: не рех ли вам, глаголя: не преобидите детища? и не послушасте мене: и се, кровь его взыскуется.

²³Тии же не ведеша, яко разумеет иосиф: толмачь бо между ими бяше.

²⁴Отвратився же от них, проплакася иосиф: и паки прииде к ним и рече им. И поя симеона от них, и связа его пред ними.

²⁵Повеле же иосиф наполнити сосуды их пшеницы и возвратити сребро их комуждо во вретище свое и дати им брашно на путь. И бысть им тако.

²⁶И возложивше пшеницу на ослы своя, отидоша оттуду.

²⁷Отрешив же един вретище свое дати пищу ослом своим, идеже сташа, и виде узол сребра своего, и бе верху устия вретищнаго.

²⁸И рече братии своей: возвращено ми есть сребро, и се, сие во вретищи моем. И ужасеся сердце их: и возмятошася, друг ко другу глаголюще: что сие сотвори Бог нам?

²⁹Приидоша же ко иакову, отцу своему, в землю ханааню и поведаша ему вся случившаяся им, глаголюще:

³⁰глагола муж господин земли (оныя) к нам жестоко и вверже нас в темницу, аки соглядаюших землю:

³¹рехом же ему: мирницы есмы, несмы соглядатаи:

³²дванадесять братия есмы, сынове отца нашего: единаго несть, а менший со отцем нашим днесь в земли ханаани:

³³рече же нам муж господин земли (тоя): по сему увем, яко мирницы есте: брата единаго оставите зде у мене, а купленую пшеницу дому вашему вземше отидите

³⁴и приведите ко мне брата вашего меншаго: и увем, яко не соглядатаи есте, но яко мирницы есте: и брата вашего отдам вам, и куплю творите в земли.

³⁵Бысть же егда испраздняху вретища своя, и бяше узол сребра во вретищи коегождо их: и видеша узлы сребра своего сами и отец их, и убояшася.

³⁶Рече же им иаков отец их: мене безчадна сотвористе: иосифа несть, симеона несть, и вениамина ли поймете? на мя быша сия вся.

³⁷Рече же рувим отцу своему, глаголя: двоих сынов моих убий, аще не приведу его к тебе: даждь его в руце мои, и аз приведу его к тебе.

³⁸Он же рече: не пойдет сын мой с вами, яко брат его умре, и той един оста: и случится ему зло на пути, в оньже аще пойдете, и сведете старость мою с печалию во ад.