Read Елизаветинская Библия, 1751 Бытие 45 Bible Online

Бытие 45 - Елизаветинская Библия, 1751 bible

Бытие 45

¹И не можаше иосиф удержатися всем предстоящым ему, но рече: отослите всех от мене. И не предстояше ни един иосифу, егда познавашеся братии своей.

²И испусти глас с плачем: слышаша же вси египтяне, и слышано бысть в дому фараонове.

³Рече же иосиф братии своей: аз есмь иосиф: еще ли отец мой жив есть? И не могоша братия отвещати ему: смутишася бо.

⁴Рече же иосиф братии своей: приближитеся ко мне. И приближишася. И рече: аз есмь иосиф, брат ваш, егоже продасте во египет:

⁵ныне убо не скорбите, ниже жестоко вам да явится, яко продасте мя семо: на жизнь бо посла мя Бог пред вами:

⁶сие бо второе лето глад на земли, и еще пять лет оста, в нихже не будет орания, ни жатвы:

⁷посла бо мя Бог пред вами оставити вам останок на земли и препитати ваш останок велий:

⁸ныне убо не вы посласте мя семо, но Бог: и сотвори мя яко отца фараону и господина всему дому его и князя всей земли египетстей:

⁹потщавшеся убо, взыдите ко отцу моему и рцыте ему: сия глаголет сын твой иосиф: сотвори мя Бог господина всей земли египетстей: сниди убо ко мне и не умедли:

¹⁰и вселишися в земли гесемли аравийстей, и будеши близ мене ты и сынове твои, и сынове сынов твоих, овцы твоя и волове твои, и елика суть твоя:

¹¹и препитаю тя тамо, еще бо пять лет будет глад на земли, да не погибнеши ты и сынове твои, и вся имения твоя.

¹²Се, очи ваши видят, и очи вениамина брата моего, яко уста моя глаголющая к вам:

¹³возвестите убо отцу моему всю славу мою сущую во египте, и елика видите: и ускоривше, приведите отца моего семо.

¹⁴И напад на выю вениамина, брата своего, плакася над ним, и вениамин плакася на выи его.

¹⁵И облобызав всю братию свою, плакася над ними: и по сих глаголаша к нему братия его.

¹⁶И пронесеся глас в дому фараонове, глаголюще: приидоша братия иосифова. Возрадовася же фараон и раби его.

¹⁷Рече же фараон ко иосифу: рцы братии своей: сие сотворите: наполните сосуды вашя (пшеницы) и идите в землю ханааню,

¹⁸и вземше отца вашего и имения ваша, приидите ко мне: и дам вам от всех благ египетских, и снесте тук земли:

¹⁹ты же заповеждь сия: взяти им колесницы от земли египетския, детем их и женам их: и поимше отца своего, приидите:

²⁰и не пощадите очима сосудов ваших: вся бо благая египетская вам будут.

²¹Сотвориша же тако сынове израилевы: даде же им иосиф колесницы по повелению фараона царя (египетска), и даде им брашно на путь:

²²и всем даде сугубы ризы, вениамину же даде триста златниц и пятеры ризы пременныя:

²³и отцу своему посла такожде, и десять ослов везущих от всех благ египетских, и десять мсков везущих хлебы на путь отцу его.

²⁴И отпусти братию свою. И отидоша. И рече им: не гневайтеся на пути.

²⁵Изыдоша же из египта и приидоша в землю ханааню ко иакову отцу своему

²⁶и поведаша ему глаголюще: яко сын твой иосиф жив есть, и он владеет над всею землею египетскою. И ужасеся в мысли иаков: не вероваше бо им.

²⁷Глаголаша же ему вся реченная от иосифа, елика рече им. Узрев же колесницы, яже посла иосиф, еже взяти его, оживе дух иакова, отца их,

²⁸и рече израиль: велико ми есть (сие), аще еще иосиф сын мой жив есть: шед узрю его, прежде неже умрети ми.