Read Елизаветинская Библия, 1751 Бытие 46 Bible Online

Бытие 46 - Елизаветинская Библия, 1751 bible

Бытие 46

¹Востав же израиль сам и вся сущая его, прииде ко кладязю клятвенному и пожре жертву Богу отца своего исаака.

²Рече же Бог ко израилю в видении нощию, глаголя: иакове, иакове. Он же рече: что есть?

³Он же рече ему: аз есмь Бог отцев твоих, не убойся изыти во египет: в язык бо велий сотворю тя тамо:

⁴и аз сниду с тобою во египет, и аз возведу тя до конца: и иосиф возложит руки своя на очи твои.

⁵Воста же иаков от кладязя клятвеннаго, и взяша сынове израиля отца своего, и стяжание, и жены своя на колесницы, яже посла иосиф, взяти его:

⁶и вземше имения своя и все стяжание, еже стяжаша в земли ханаанстей, внидоша во египет иаков и все семя его с ним:

⁷сынове и сынове сынов его с ним, дщери и дщери дщерей его, и все семя свое введе во египет.

⁸Сия же имена сынов израилевых вшедших во египет купно со иаковом отцем своим: иаков и сынове его: первенец иаковль рувим.

⁹Сынове же рувимли: енох и фаллос, асрон и харми.

¹⁰Сынове же симеони: иемуил и иамин, и аод и ахин, и саар и саул, сын хананитидин.

¹¹Сынове же левиини: гирсон, кааф и мерарий.

¹²Сынове же иудины: ир и авнан, и силом и фарес и зара: умроша же ир и авнан в земли ханаани. Быша же сынове фаресу: есром и иемуил.

¹³Сынове же иссахаровы: фола и фуа, и асум и самвран.

¹⁴Сынове же завулони: серед и аллон и ахоил.

¹⁵Сии сынове лиини, ихже роди иакову в месопотамии сирстей, и дину дщерь его: всех душ сынов и дщерей тридесять три.

¹⁶Сынове же гадовы: сафон и ангис, и саннис и фасован, и аидис и ароидис и ареилис.

¹⁷Сынове же асировы: иемна и ессуа, и иеул и вариа, и сара сестра их. Сынове же вариины: ховор и мелхиил.

¹⁸Сии сынове зелфины, юже даде лаван лии, дщери своей, яже роди сих иакову, шестьнадесять душ.

¹⁹Сынове же рахили, жены иаковли: иосиф и вениамин.

²⁰Быша же сынове иосифу в земли египетстей, ихже роди ему асенефа, дщи петефриа жреца илиопольска, манассию и ефрема. Быша же сынове манассиины, ихже роди ему наложница сира, махира. Махир же роди галаада. Сынове же ефраима, брата манассиина: суталаам и таам. Сынове же суталаамли, едом.

²¹Сынове же вениамини: вала и ховор и асфил. Быша же сынове валовы: гира и ноеман, и анхис и рос, и мамфим и офимим. Гира же роди арада.

²²Сии сынове рахилины, ихже роди иакову, всех душ осмьнадесять.

²³Сынове же дановы: асом.

²⁴Сынове же неффалимли: асиил и гони, и иссаар и селлим.

²⁵Сии сынове валлины, юже даде лаван рахили дщери своей, яже роди сих иакову: всех душ седмь.

²⁶Всех же душ вшедших со иаковом во египет, яже изыдоша из чресл его, кроме жен сынов иаковлих, всех душ шестьдесят шесть.

²⁷Сынове же иосифовы, иже быша ему в земли египетстей, душ девять: всех душ дому иаковля, яже приидоша со иаковом во египет, душ седмьдесят пять.

²⁸Иуду же посла пред собою ко иосифу срести его у иройска града в земли рамессийстей.

²⁹Впряг же иосиф колесницы своя, изыде во сретение израилю, отцу своему, ко ироону граду: и явився ему, нападе на выю его и плакася плачем великим.

³⁰И рече израиль ко иосифу: да умру отныне, понеже видех лице твое: еще бо ты еси жив.

³¹Рече же иосиф ко братии своей: шед повем фараону и реку ему: братия моя и дом отца моего, иже быша в земли ханаани, приидоша ко мне:

³²они же суть мужие пастуси, мужие бо скотопитателие быша: и скоты, и волы, и вся своя приведоша:

³³аще убо призовет вас фараон и речет вам: что дело ваше есть?

³⁴рцыте: мужие скотопитателие есмы, раби твои, издетска даже до ныне, и мы и отцы наши: да вселитеся в земли гесем аравийстей: мерзость бо есть египтяном всяк пастух овчий.