Read Елизаветинская Библия, 1751 Бытие 47 Bible Online

Бытие 47 - Елизаветинская Библия, 1751 bible

Бытие 47

¹Пришед же иосиф, поведа фараону глаголя: отец мой и братия моя, и скоти и волове их, и вся сущая их приидоша из земли ханаани: и се, суть в земли гесем.

²От братий же своих поя пять мужей и постави их пред фараоном.

³И рече фараон к братиям иосифовым: что дело ваше? Они же реша фараону: пастуси овчии, раби твои, и мы и отцы наши отдетска и доселе.

⁴Рекоша же фараону: обитати в земли приидохом, несть бо пажити скотом раб твоих: одоле бо глад на земли ханаани: ныне убо да вселимся раби твои в земли гесем.

⁵И рече фараон иосифу, глаголя: отец твой и братия твоя приидоша к тебе:

⁶се, земля египетская пред тобою есть: на лучшей земли посели отца твоего и братию твою, да вселятся в земли гесем: аще же веси, яко суть в них мужие сильнии, постави их старейшины скотом моим. (Приидоша же во египет ко иосифу иаков и сынове его: и услыша фараон царь египетский).

⁷Введе же иосиф иакова отца своего и постави его пред фараоном, и благослови иаков фараона.

⁸Рече же фараон ко иакову: колико лет дний жития твоего?

⁹И рече иаков фараону: дние лет жития моего, яже обитаю, сто тридесять лет: малы и злы быша дние лет жития моего: не достигоша во дни лет жития отец моих, яже дни обиташа.

¹⁰И благословив иаков фараона, отиде от него.

¹¹И всели иосиф отца своего и братию свою, и даде им обдержание в земли египетстей, на лучшей земли, в земли рамессийстей, якоже повеле фараон.

¹²И деляше иосиф пшеницу отцу своему и братии своей и всему дому отца своего по числу лиц.

¹³Пшеницы же не бяше во всей земли, одоле бо глад зело: скончавашеся же земля египетская и земля ханааня от глада.

¹⁴Собра же иосиф все сребро обретшееся в земли египетстей и в земли ханаани, за пшеницу, юже куповаху, и размеряше им пшеницу, и внесе иосиф все сребро в дом фараонов.

¹⁵И оскуде все сребро от земли египетския и от земли ханаанския: приидоша же вси египтяне ко иосифу, глаголюще: даждь нам хлебы, и вскую умираем пред тобою? скончася бо сребро наше.

¹⁶Рече же им иосиф: пригоните скоты вашя, и дам вам хлебы за скоты вашя, аще скончася сребро ваше.

¹⁷Пригнаша же скоты своя ко иосифу, и даде им иосиф хлебы за кони и за овцы, и за волы и за ослы, и прекорми их хлебами за вся скоты их в том лете.

¹⁸Прейде же то лето, и приидоша к нему во второе лето и рекоша ему: да не како погибнем от господина нашего? аще бо скончася сребро наше, и имение и скоты пред тобою, господине, и не остася нам пред господином нашим, точию едино тело и земля наша:

¹⁹да не умрем убо пред тобою, и земля опустеет, купи нас и землю нашу хлебами: и будем мы и земля наша раби фараону: даждь семя, да посеем и живи будем, и не умрем, и земля не опустеет.

²⁰И купи иосиф всю землю египетскую фараону: продаша бо египтяне землю свою фараону, ибо одоле им глад: и бысть земля фараону.

²¹И люди поработи ему в рабы, от края предел египетских даже до краев,

²²кроме земли жреческия токмо, тоя бо не купи иосиф: даянием бо даде в дар жерцем фараон, и ядяху даяние, еже даде им фараон: сего ради не продаша земли своея.

²³Рече же иосиф всем египтяном: се, купих вас и землю вашу днесь фараону: возмите себе семена и сейте на земли:

²⁴и будут плоды ея, и да дасте пятую часть фараону, четыри же части будут вам самем в семена земли и на препитание вам и всем сущым в домех ваших.

²⁵И рекоша: оживил ны еси, обретохом благодать пред господином нашим, и будем раби фараону.

²⁶И устави им иосиф заповедь даже до сего дне на земли египетстей пятую часть даяти фараону, кроме земли жреческия: та точию не бяше фараоня.

²⁷Вселися же израиль в земли египетстей, на земли гесем, и наследствоваше ю: и возрастоша, и умножишася зело.

²⁸Поживе же иаков в земли египетстей седмьнадесять лет: и быша дние иаковли лет жизни его, сто четыредесять седмь лет.

²⁹Приближишася же дние израилю еже умрети, и призва сына своего иосифа и рече ему: аще обретох благодать пред тобою, подложи руку твою под стегно мое и сотвориши надо мною милость и истину, еже не погребсти мене во египте,

³⁰но да почию со отцы моими: и изнесеши мя из египта, и погребеши мя во гробе их. Он же рече: аз сотворю по словеси твоему.

³¹Рече же: кленися мне. И клятся ему. И поклонися израиль на конец жезла его.