Read Елизаветинская Библия, 1751 Бытие 48 Bible Online

Бытие 48 - Елизаветинская Библия, 1751 bible

Бытие 48

¹Бысть же по глаголех сих, и поведано бысть иосифу, яко отец твой изнемогает: и поим два сына своя, манассию и ефрема, прииде ко иакову.

²Поведаша же иакову, глаголюще: се, сын твой иосиф грядет к тебе. И укрепився израиль седе на одре,

³и рече иаков ко иосифу: Бог мой явися мне в лузе, в земли ханаани, и благослови мя

⁴и рече ми: се, аз возращу тя и умножу тя, и сотворю тя в собрания языков: и дам ти землю сию и семени твоему по тебе во одержание вечное.

⁵Ныне убо два сына твоя, иже быша тебе в земли египетстей прежде пришествия моего к тебе во египет, мои суть: ефрем и манассиа, аки рувим и симеон будут мне:

⁶сыны же, яже аще родиши по сих, будут тебе: во имя братии своея призовутся ко жребиям оных:

⁷аз же егда идях от месопотамии сирския, умре рахиль мати твоя в земли ханаани, приближающуся ми ко ипподрому хаврафы земли, еже приити во ефрафу: и погребох ю на пути ипподрома: сей есть вифлеем.

⁸Видев же израиль сыны иосифовы, рече: что тебе сии?

⁹Рече же иосиф отцу своему: сынове мои суть, яже даде ми Бог зде. И рече иаков: приведи ми я, да благословлю их.

¹⁰Очи же израилю тяжко видеста от старости, и не можаше видети: и приближи их к нему, и лобза их, и объят я.

¹¹И рече израиль ко иосифу: се, лица твоего не лишихся, и се, показа ми Бог и семя твое.

¹²И отведе их иосиф от колен его, и поклонишася ему лицем до земли.

¹³Поим же иосиф два сына своя, ефрема в десницу, прямо левицы израиля, манассию же в левую, прямо десницы израилевы, приближи их к нему.

¹⁴Простер же израиль руку десную, возложи на главу ефремлю, сей же бяше менший, а левую на главу манассиину, пременив руце,

¹⁵и благослови я и рече: Бог, емуже благоугодиша отцы мои пред ним, авраам и исаак, Бог, иже питает мя измлада даже до дне сего,

¹⁶ангел, иже мя избавляет от всех зол, да благословит детища сия, и прозовется в них имя мое, и имя отец моих, авраама и исаака, и да умножатся во множество многое на земли.

¹⁷Видев же иосиф, яко возложи отец его руку десную свою на главу ефремлю, тяжко ему явися: и прия иосиф руку отца своего отяти ю от главы ефремли на главу манассиину,

¹⁸и рече иосиф отцу своему: не тако, отче: сей бо (есть) первенец, возложи руку десную твою на главу его.

¹⁹И не хотяше, но рече: вем, чадо, вем: и сей будет в люди, и сей вознесется: но брат его менший болий его будет, и семя его будет во множество языков.

²⁰И благослови я в том дни, глаголя: в вас благословится израиль, глаголюще: да сотворит тя Бог якоже ефрема и яко манассию. И постави ефрема вышше манассии.

²¹Рече же израиль иосифу: се, аз умираю, и будет Бог с вами, и возвратит вас от земли сея на землю отец ваших:

²²аз же даю ти сикиму избранную свыше братии твоея, юже взях из руки аморрейски мечем моим и луком.