Read Елизаветинская Библия, 1751 Бытие 49 Bible Online

Бытие 49 - Елизаветинская Библия, 1751 bible

Бытие 49

¹Призва же иаков сыны своя и рече им: соберитеся, да возвещу вам, что срящет вас в последния дни:

²соберитеся и послушайте мене, сынове иаковли, послушайте израиля, послушайте отца вашего.

³Рувим, первенец мой, ты крепость моя и начало чад моих: жесток терпети и жесток упорник:

⁴досадил еси яко вода, да не воскипиши: возшел бо еси на ложе отца твоего, тогда осквернил еси постелю, идеже возшел еси.

⁵Симеон и левий братия совершиста обиду от воли своея:

⁶в совет их да не приидет душа моя, и к собранию их да не прилепятся внутренняя моя: яко во гневе своем избиста человеки, и в похоти своей пререзаста жилы юнца:

⁷проклята ярость их, яко упорна, и гнев их, яко ожесточися: разделю их во иакове и разсею их во израили.

⁸Иудо, тебе похвалят братия твоя, руце твои на плещу враг твоих: поклонятся тебе сынове отца твоего:

⁹скимен львов иуда: от леторасли, сыне мой, возшел еси: возлег уснул еси яко лев и яко скимен: кто возбудит его?

¹⁰не оскудеет князь от иуды и вождь от чресл его, дондеже приидут отложеная ему, и той чаяние языков:

¹¹привязуяй к лозе жребя свое и к винничию жребца осляте своего, исперет вином одежду свою и кровию гроздия одеяние свое:

¹²радостотворны очи его паче вина, и белы зубы его паче млека.

¹³Завулон при мори вселится, и той на пристанищи кораблей, и прострется даже до сидона.

¹⁴Иссахар доброе возжела, почивая посреде пределов,

¹⁵и видев покой, яко добр, и землю, яко тучна, подложи рамы свои на труд, и бысть муж земледелец.

¹⁶Дан судити имать люди своя, яко и едино племя во израили,

¹⁷и да будет дан змий на пути, седяй на распутии, угрызая пяту конску:

¹⁸и падет конник вспять, спасения ждый Господня.

¹⁹Гад, искушение искусит его: он же искусит того при ногах.

²⁰Асир, тучен его хлеб, и той даст пищу князем.

²¹Неффалим стебль распущающаяся, издаяй во отрасли доброту.

²²Сын возращен иосиф, сын возращен мой ревностный, сын мой юнейший, ко мне обратися:

²³на негоже советующе укоряху и наляцаху нань господие стреляний,

²⁴и сотрошася с крепостию луки их, и разслабеша жилы мышцей рук их, рукою сильнаго иакова: оттуду укрепися израиль от Бога отца твоего,

²⁵и поможе тебе Бог мой, и благослови тя благословением небесным свыше и благословением земли и имущия вся: благословения ради сосцев и ложесн,

²⁶благословения отца твоего и матере твоея: преодоле паче благословения гор пребывающих и благословения холмов вечных: будут на главе иосифове и на версе (главы) братий, имиже обладаше.

²⁷Вениамин волк хищник, рано яст еще и на вечер дает пищу.

²⁸Вси сии сынове иаковли дванадесять: и сия глагола им отец их, и благослови их: коегождо по благословению его благослови их,

²⁹и рече им: аз прилагаюся к людем моим: погребите мя со отцы моими в пещере, яже есть в селе ефрона хеттеанина,

³⁰в пещере сугубей, яже прямо мамврии в земли ханаани, юже стяжа авраам пещеру у ефрона хеттеанина в стяжание гроба.

³¹Тамо погребоша авраама и сарру жену его, тамо погребоша исаака и ревекку жену его, тамо погребоша лию,

³²в стяжании села и пещеры, яже есть в нем у сынов хеттеовых.

³³И преста иаков завещая сыном своим, и возложив иаков нозе свои на одр умре, и приложися к людем своим.