Read Елизаветинская Библия, 1751 Бытие 50 Bible Online

Бытие 50 - Елизаветинская Библия, 1751 bible

Бытие 50

¹И припад иосиф на лице отца своего, плакася (горько) о нем и облобыза его:

²и повеле иосиф рабом своим погребателем погребсти отца своего. И погребоша погребателие израиля.

³И исполнишася ему четыредесять дний: тако бо исчисляются дние погребения: и плакася его египет седмьдесят дний.

⁴Егда же преидоша дние плача, глагола иосиф ко вельможам фараоновым, глаголя: аще обретох благодать пред вами, рцыте о мне во ушы фараону, глаголюще:

⁵отец мой закля мя прежде скончания (своего), глаголя: во гробе, егоже ископах себе в земли ханаани, тамо мя погреби: ныне убо возшед погребу отца моего и возвращуся. И рекоша фараону по словеси иосифову.

⁶И рече фараон ко иосифу: взыди, погреби отца твоего, якоже закля тя.

⁷И взыде иосиф погребсти отца своего. И совзыдоша с ним вси раби фараони и старейшины дому его, и вси старейшины земли египетския,

⁸и весь дом иосифов и братия его, и весь дом отца его и сродницы его: овцы же и волы оставиша в земли гесем.

⁹И совзыдоша с ним и колесницы и конницы, и бысть полк велик зело.

¹⁰И приидоша на гумно атадово, еже есть об он пол иордана, и рыдаша его рыданием велиим и крепким зело: и сотвори плачь отцу своему седмь дний.

¹¹И видеша жителие земли ханаанския плачь на гумне атадове и реша: плачь велик сей есть египтяном. Сего ради наречеся имя месту тому плачь египетск, еже есть об он пол иордана.

¹²И сотвориша ему тако сынове его, якоже заповеда им.

¹³И взяша его сынове его в землю ханааню и погребоша его в пещере сугубей, юже стяжа авраам пещеру в стяжание гроба от ефрона хеттеанина, прямо мамврии.

¹⁴И возвратися иосиф во египет, сам и братия его и вси совозшедшии погребсти отца его.

¹⁵Видевше же братия иосифовы, яко умре отец их, реша: да не когда воспомянет злобу нашу иосиф и воздаянием воздаст нам за вся злая, яже показахом ему.

¹⁶И пришедше ко иосифу рекоша: отец твой закля прежде кончины своея, глаголя:

¹⁷тако рцыте иосифу: остави им неправду и грех их, яко лукавая тебе показаша: и ныне приими неправду рабов Бога отца твоего. И плакася иосиф, глаголющим им к нему.

¹⁸И пришедше к нему рекоша: се, мы тебе раби.

¹⁹И рече к ним иосиф: не бойтеся, Божий бо есмь аз:

²⁰вы совещасте на мя злая, Бог же совеща о мне благая, дабы было якоже днесь, и препиталися бы людие мнози.

²¹И рече им: не бойтеся, аз препитаю вас и домы вашя. И утеши их, и глагола им по сердцу их.

²²И вселися иосиф во египте сам и братия его и весь дом отца его: и поживе иосиф лет сто десять.

²³И виде иосиф ефремли дети до третияго рода: и сынове махира сына манассиина родишася при бедрех иосифовых.

²⁴И рече иосиф братии своей, глаголя: аз умираю, посещением же посетит вас Бог и изведет вас от земли сея в землю, о нейже клятся Бог отцем нашым аврааму, исааку и иакову.

²⁵И закля иосиф сыны израилевы, глаголя: в посещении, имже посетит вас Бог, совознесите и кости моя отсюду с вами.

²⁶И скончася иосиф сый лет ста десяти: и погребоша его, и положиша в раце во египте.