Read Елизаветинская Библия, 1751 Бытие 6 Bible Online

Бытие 6 - Елизаветинская Библия, 1751 bible

Бытие 6

¹И бысть егда начаша человецы мнози бывати на земли, и дщери родишася им:

²видевше же сынове Божии дщери человечи, яко добры суть, пояша себе жены от всех, яже избраша.

³И рече Господь Бог: не имать Дух мой пребывати в человецех сих во век, зане суть плоть: будут же дние их лет сто двадесять.

⁴Исполини же бяху на земли во дни оны: и потом, егда вхождаху сынове Божии к дщерем человеческим, и раждаху себе: тии бяху исполини, иже от века, человецы именитии.

⁵Видев же Господь Бог, яко умножишася злобы человеков на земли: и всяк помышляет в сердцы своем прилежно на злая во вся дни:

⁶и помысли Бог, яко сотвори человека на земли, и размысли.

⁷и рече Бог: потреблю человека, егоже сотворих, от лица земли, от человека даже до скота, и от гад даже до птиц небесных: зане размыслих, яко сотворих я.

⁸Ное же обрете благодать пред Господем Богом.

⁹Сия же бытия ноева: ное человек праведен совершен сый в роде своем, Богу угоди ное.

¹⁰Роди же ное три сыны, сима, хама, иафефа.

¹¹Растлеся же земля пред Богом, и наполнися земля неправды.

¹²И виде Господь Бог землю, и бе растленна: яко растли всяка плоть путь свой на земли.

¹³И рече Господь Бог ною: время всякаго человека прииде пред мя, яко исполнися земля неправды от них: и се, аз погублю их и землю.

¹⁴Сотвори убо себе ковчег от древ (негниющих) четвероуголных: гнезда сотвориши в ковчезе, и посмолиши его внутрьуду и внеуду смолою.

¹⁵И тако сотвориши ковчег: трех сот лактей долгота ковчега, и пятидесяти лактей широта, и тридесяти лактей высота его.

¹⁶Собирая сводом сотвориши ковчег, и в лакоть свершиши его свыше: дверь же ковчега сотвориши от страны: обиталища двокровна и трекровна сотвориши в нем.

¹⁷Аз же, се, наведу потоп, воду на землю, погубити всяку плоть, в нейже есть дух жизни под небесем: и елика суть на земли, скончаются.

¹⁸И поставлю завет мой с тобою: внидеши же в ковчег ты и сынове твои, и жена твоя и жены сынов твоих с тобою.

¹⁹И от всех скотов и от всех гад, и от всех зверей, и от всякия плоти, два два от всех введеши в ковчег, да питаеши с собою: мужеский пол и женский будут.

²⁰От всех птиц пернатых по роду, и от всех скотов по роду, и от всех гадов ползающих по земли по роду их, два два от всех внидут к тебе, питатися с тобою, мужеский пол и женский.

²¹Ты же возми себе от всех брашен, яже имате ясти, и собереши к себе, и будут тебе и оным брашно.

²²И сотвори ное вся елика заповеда ему Господь Бог, тако сотвори.