Read Елизаветинская Библия, 1751 Бытие 9 Bible Online

Бытие 9 - Елизаветинская Библия, 1751 bible

Бытие 9

¹И благослови Бог ноа и сыны его и рече им: раститеся и множитеся, и наполните землю и обладайте ею:

²и страх и трепет ваш будет на всех зверех земных (и на всех скотех земных,) на всех птицах небесных и на всех движущихся по земли и на всех рыбах морских: в руце вашы вдах (я).

³И всякое движущееся, еже есть живо, вам будет в снедь: яко зелие травное дах вам все.

⁴Точию мяса в крови души да не снесте.

⁵Крови бо вашей, душ ваших, от руки всякаго зверя изыщу (ея): и от руки человека брата изыщу ея.

⁶Проливаяй кровь человечу, в ея место его пролиется: яко во образ Божий сотворих человека.

⁷Вы же раститеся и множитеся, и наполните землю, и множитеся на ней.

⁸И рече Бог ноеви и сыном его с ним, глаголя:

⁹се, аз поставляю завет мой вам и семени вашему по вас,

¹⁰и всякой души живущей с вами от птиц и от скот и всем зверем земным, елика с вами (суть) от всех изшедших из ковчега:

¹¹и поставлю завет мой с вами: и не умрет всяка плоть ктому от воды потопныя, и ктому не будет потоп водный, еже истлити всю землю.

¹²И рече Господь Бог ноеви: сие знамение завета, еже аз даю между мною и вами, и между всякою душею живою, яже есть с вами, в роды вечныя:

¹³дугу мою полагаю во облаце, и будет в знамение завета (вечнаго) между мною и землею.

¹⁴И будет егда наведу облаки на землю, явится дуга моя во облаце:

¹⁵и помяну завет мой, иже есть между мною и вами, и между всякою душею живущею во всякой плоти, и не будет ктому вода в потоп, яко потребити всяку плоть.

¹⁶И будет дуга моя во облаце: и узрю ю, еже помянути завет вечный между мною и землею, и между всякою душею живущею во всякой плоти, яже есть на земли.

¹⁷И рече Бог ноеви: сие знамение завета, егоже положих между мною и между всякою плотию, яже есть на земли.

¹⁸Быша же сынове ноевы изшедшии из ковчега, сим, хам, иафеф: хам же бяше отец ханаань.

¹⁹Трие сии суть сынове ноевы: от сих разсеяшася по всей земли.

²⁰И начат ное человек делатель (быти) земли, и насади виноград:

²¹и испи от вина, и упися, и обнажися в дому своем.

²²И виде хам отец ханаань наготу отца своего, и изшед вон поведа обема братома своима.

²³И вземше сим и иафеф ризу, возложиша (ю) на обе раме свои, и идоша вспять зряще, и покрыша наготу отца своего: и лице их вспять зря, и наготы отца своего не видеша.

²⁴Истрезвися же ное от вина, и разуме елика сотвори ему сын его юнейший,

²⁵и рече: проклят (буди) ханаан отрок: раб будет братиям своим.

²⁶И рече: благословен Господь Бог симов: и будет ханаан отрок раб ему:

²⁷да распространит Бог иафефа, и да вселится в селениих симовых, и да будет ханаан раб ему.

²⁸Поживе же ное по потопе лет триста пятьдесят.

²⁹И быша вси дние ноевы лет девять сот пятьдесят: и умре.