Read Елизаветинская Библия, 1751 2-я Царств 1 Bible Online

2-я Царств 1 - Елизаветинская Библия, 1751 bible

2-я Царств 1

¹И бысть егда умре саул, и давид возвратися победив амалика, и пребысть давид в секелазе дни два.

²И бысть в третий день, и се, муж прииде от полка людий сауловых, ризы же его (бяху) раздраны, и персть на главе его: и бысть егда вниде к давиду (отрок), и пад на земли поклонися ему.

³И рече ему давид: откуду ты пришел еси? И рече ему: от полка израилева аз избегох.

⁴И рече ему давид: что слово сие? возвести ми. И рече: яко побегоша людие от брани, и падоша мнози от людий, и измроша, и саул и ионафан сын его умре.

⁵И рече давид отроку возвестившему ему: како знаеши, яко умре саул и ионафан сын его?

⁶И рече отрок возвещаяй ему: по случаю приидох в гору гелвуйскую, и се, саул нападаше на копие свое, и се, колесницы и вельможи собрашася нань:

⁷и обозреся вспять (саул) и виде мя, и призва мя, и рех: се, аз:

⁸и рече ми: кто ты еси? и рех: амаликитин есмь аз:

⁹и рече ми: прииди убо на мя и убий мя, яко объят мя тма лютая, яко еще душа моя во мне:

¹⁰и стах над ним, и убих его: ведех бо, яко не будет жив по падении своем: и взяв венец царский, иже бе на главе его, и нарамницу, яже бе на плещу его, и принесох сия к господину моему семо.

¹¹И емься давид за ризы своя, и раздра я, и вси мужие иже с ним раздраша ризы своя,

¹²и рыдаша и плакашася, и постишася до вечера о сауле, и о ионафане сыне его, и о людех иудиных и о доме израилеве, яко избиени быша мечем.

¹³И рече давид отроку возвестившему ему: откуду ты еси? И рече: сын мужа пришелца амаликитина есмь аз.

¹⁴И рече ему давид: како не убоялся еси воздвигнути руку твою погубити христа Господня?

¹⁵И призва давид единаго от отрок своих и рече: иди, убий его. И уби его, и умре.

¹⁶И рече ему давид: кровь твоя на главе твоей, яко уста твоя на тя возвещаша, глаголюще: яко аз убих христа Господня.

¹⁷И плакася давид плачем сим о сауле и о ионафане сыне его,

¹⁸и рече еже научити сыны иудины стрелянию. Се написано в книзе праведнаго.

¹⁹И рече: воздвигни столп, израилю, над умершими на высоких твоих язвеными: како падоша сильнии?

²⁰не возвещайте в гефе, ниже поведайте на исходищих аскалоних, да не возвеселятся дщери иноплеменничи, ни да возрадуются дщери необрезанных.

²¹Горы гелвуйския, да не снидет роса ниже дождь на вас: и села начатков (житных), яко тамо повержен бысть щит сильных: щит саулов не быти помазан елеем:

²²от крове язвеных и от тука сильных лук ионафанов не возвратися тощь вспять, и мечь саулов не возвратися тощь:

²³саул и ионафан возлюбленнии и прекраснии неразлучни, благолепни в животе своем, и в смерти своей не разлучишася: паче орлов легцы и паче львов крепцы:

²⁴плачите по сауле, дщери израилевы, иже вас облачаше в червленицы со украшением вашим, и возлагаше украшение злато на ризы вашя:

²⁵како падоша сильнии посреде брани? ионафане, до смерти на высоких твоих язвен еси:

²⁶болезную о тебе, брате мой ионафане, красный ми зело, удивися любовь твоя от мене паче любве женския:

²⁷како падоша сильнии, и погибоша оружия бранная?