Read Елизаветинская Библия, 1751 2-я Царств 16 Bible Online

2-я Царств 16 - Елизаветинская Библия, 1751 bible

2-я Царств 16

¹И давид прейде мало что от роса, и се, сива отрок мемфивосфеов в сретение ему: и супруг ослят оседланых, и на них двести хлебов, и сто гроздий, и сто фиников, и мех вина.

²И рече царь к сиве: что сия тебе? И рече сива: ослята на яждение дому цареву, а хлебы и финики на снедение отроком, и вино пити ослабевшым в пустыни.

³И рече царь: и где сын господина твоего? И рече сива ко царю: се, седит во Иерусалиме, яко рече: днесь возвратят ми весь дом израилев царство отца моего.

⁴И рече царь к сиве: се, тебе вся елика суть мемфивосфеова. И рече сива поклонився: да обрящу благодать пред очима твоима, господи мой царю.

⁵И прииде давид царь до вафирима, и се, оттуду муж исхождаше от рода дому сауля, имя же ему семей сын гирань: изыде же исходя и проклиная

⁶и камением метая на давида и на вся отроки царя давида: и вси людие и вси сильнии одесную и ошуюю царя бяху.

⁷И тако рече семей проклиная его: изыди, изыди, мужу кровей и мужу беззаконный:

⁸возврати на тя Господь вся крови дому сауля, понеже воцарился еси вместо его: и даде Господь царство в руце авессалома сына твоего: и се, ты в злобе твоей, яко муж кровей ты.

⁹И рече авесса сын саруин ко царю: почто проклинает пес умерший сей господина моего царя? ныне пойду, и отиму главу его.

¹⁰И рече царь ко авессе: что мне и вам, сынове саруины? оставите его, и тако да проклинает, яко Господь рече ему проклинати давида: и кто речет: почто сотворил еси тако?

¹¹И рече давид ко авессе и ко всем отроком своим: се, сын мой изшедый из чрева моего ищет души моея, а кольми паче сын иеминиев: оставите его проклинати мя, яко рече ему Господь:

¹²негли призрит Господь на смирение мое, и возвратит ми благая вместо клятвы его во днешний день.

¹³И идяше давид и вси мужие его путем: а семей идяше со страны горы близ его идый и проклиная, и камением меща со страны его, и перстию сыпая.

¹⁴И прииде царь и вси людие иже с ним утруждени, и препочиша ту.

¹⁵Авессалом же и вси мужие израилевы внидоша во Иерусалим, и ахитофел с ним.

¹⁶И бысть егда прииде хусий первый друг давидов ко авессалому: и рече хусий ко авессалому: да живет царь.

¹⁷И рече авессалом к хусию: сия ли милость твоя со другом твоим? почто не отшел еси со другом твоим?

¹⁸И рече хусий ко авессалому: ни, но вслед (иду), егоже избра Господь и людие сии и вси мужие израилевы, того есмь, и с тем буду:

¹⁹и второе, кому аз поработаю? не пред сыном ли его? якоже работах пред отцем твоим, тако буду и пред тобою.

²⁰И рече авессалом ко ахитофелу: дадите себе совет, что сотворим?

²¹И рече ахитофел ко авессалому: вниди к подложницам отца твоего, яже остави стрещи дом свой, и услышат вси израилтяне, яко посрамил еси отца твоего, и возмогут руки всех сущих с тобою.

²²И поставиша авессалому шатер на палате, и вниде авессалом к подложницам отца своего пред очима всех израилтян.

²³И совет ахитофелев, егоже совещаваше во дни первыя, имже образом вопросил бы кто Бога о словеси, тако всяк совет ахитофелев, и иже давиду, и иже авессалому.