Read Елизаветинская Библия, 1751 2-я Царств 19 Bible Online

2-я Царств 19 - Елизаветинская Библия, 1751 bible

2-я Царств 19

¹И поведаша иоаву, глаголюще: се, царь плачет и рыдает о авессаломе.

²И бысть спасение в той день в рыдание всем людем, услышаша бо людие в той день, глаголюще: яко печален есть царь о сыне своем.

³И украдахуся людие в той день еже входити во град, якоже украдаются людие посрамленнии, внегда бегати им на брани.

⁴И царь покры лице свое: и возопи царь гласом великим, глаголя: сыне мой, авессаломе, авессаломе, сыне мой.

⁵И вниде иоав к царю в дом и рече: посрамил еси днесь лица раб твоих всех иземших тя днесь и душу сынов твоих и дщерей твоих и душу жен твоих и подложниц твоих,

⁶еже любити ненавидящыя тебе и ненавидети любящыя тя: и явил еси днесь, яко не суть тебе князи, ниже отроцы: но разумех днесь, яко аще бы авессалом жив был, мы вси днесь мертвы быхом были, яко тогда право было бы пред очима твоима:

⁷и ныне востав изыди и глаголи в сердца рабов твоих, яко о Господе кляхся, яко аще не изыдеши днесь, не останет ни един муж с тобою в нощь сию: и разумей в себе, яко зло ти есть сие паче всех зол, яже приидоша на тя от юности твоея до ныне.

⁸И воста царь и седе при дверех. И возвестиша всем людем глаголюще: се, царь седит в дверех. И внидоша вси людие пред лице царево пред двери: мужие же израилевы бежаша во селения своя.

⁹И пряхуся вси людие во всех коленах израилевых, глаголюще: царь давид избави ны от всех враг наших, и се, изя нас от руки иноплеменничи, и ныне бежа от земли и от царства своего и от авессалома:

¹⁰авессалом же, егоже помазахом над нами, умре на брани: и ныне что вы молчите, еже возвратити царя? И глагол всего израиля прииде ко царю.

¹¹И царь давид посла ко садоку и ко авиафару иереом, глаголя: рцыте старейшинам иудиным, глаголюще: почто бысте последнии, еже возвратити царя в дом его? слово же всего израиля прииде к царю в дом его:

¹²братия моя вы, кости моя и плоть моя вы есте, то почто бысте последнии, еже возвратити царя в дом его?

¹³и амессаю рцыте: неси ли кость моя и плоть моя ты? и ныне сия ми да сотворит Бог и сия да приложит, аще не будеши князь силы предо мною во вся дни вместо иоава.

¹⁴И преклони сердца всех мужей иудиных яко мужа единаго. И послаша к царю, глаголюще: возвратися ты и вси раби твои.

¹⁵И возвратися царь и прииде до иордана, и мужие иудины приидоша в галгалы еже изыти на сретение царю, превести царя чрез иордан.

¹⁶И ускори семей сын гирань сына иеминиева, иже от ваурима, и сниде с мужми иудиными во сретение царю давиду,

¹⁷и тысяща мужей с ним от вениамина, и сива отрок дому сауля, и пятьнадесять сынов его с ним, и двадесять рабов его с ним: и управиша на иордан путь пред царем,

¹⁸и послужиша служением о преведении цареве. И прейде преход еже превести дом царев и сотворити правое пред очима его. И семей сын гирань паде на лицы своем пред царем, егда прехождаше иордан,

¹⁹и рече ко царю: да не вменит господин мой беззакония, и не помяни елика неправдова раб твой в день он, в оньже господин мой царь исхождаше из Иерусалима, еже содержати царю в сердцы своем:

²⁰понеже разуме раб твой, яко аз согреших, и се, аз приидох днесь первее всего израиля и дому иосифля, еже снити ми на сретение господину моему царю.

²¹И отвеща авесса сын саруин и рече: сего ли ради не умертвится семей, яко прокля христа Господня?

²²И рече давид: что мне и вам, сынове саруины, яко бысте мне днесь в навет? днесь не умертвится муж от израиля, понеже не вем ли, яко днесь царствую аз над израилем?

²³и рече царь и семею: не умреши. И клятся ему царь.

²⁴И се, мемфивосфей сын ионафана сына сауля сниде на сретение царю, и не омы ног своих, и не обреза ногтей, ниже управи брады своея, и риз своих не измы от дне того, в оньже изыде царь, до дне в оньже той возвратися с миром.

²⁵И бысть егда вниде во Иерусалим на сретение царю, и рече ему царь: что яко не пошел еси со мною, мемфивосфее?

²⁶И рече к нему мемфивосфей: господи мой царю, пренебреже мене раб мой, яко рече раб твой ему: оседлай ми осля, и всяду на не, и пойду с царем, яко хром раб твой:

²⁷и оболга раба твоего ко господину моему царю: и господин мой царь яко ангел Божий, и сотвори благое пред очима твоима:

²⁸яко не бе весь дом отца моего, разве мужие (повиннии) смерти господину моему царю, и посадил еси раба твоего с ядущими на трапезе твоей: и кое есть мне еще оправдание, и возопити мне еще к царю?

²⁹И рече ему царь: почто глаголеши еще словеса твоя? рех тебе и сиве: разделите себе села.

³⁰И рече мемфивосфей к царю: и вся да возмет, повнегда приити господину моему царю в мире в дом свой.

³¹И верзеллий галаадитин сниде из рогеллима, и прейде с царем иордан, еже превести его чрез иордан.

³²И верзеллий муж стар зело, сын осмидесяти лет, и той препита царя, егда живяше в манаиме, яко муж бе велий зело.

³³И рече царь к верзеллию: ты прейдеши со мною, и препитаю старость твою со мною во Иерусалиме.

³⁴И рече верзеллий к царю: колицы дни лет живота моего, яко да взыду с царем во Иерусалим?

³⁵сын осмидесяти лет аз днесь есмь: еда уразумею посреде блага и посреде лукава? или уразумеет еще раб твой, еже ям, или еже пию? или услышу глас еще поющих и воспевающих? и вскую будет еще раб твой в тяжесть господину моему царю?

³⁶мало прейдет раб твой иордан с царем: и почто воздает ми царь воздаяние сие?

³⁷да возвратится ныне раб твой, и умру во граде моем, у гроба отца моего и матере моея: и се, раб твой сын мой хамаам прейдет с господем моим царем, и сотвори ему благое пред очима твоима.

³⁸И рече царь: со мною да прейдет хамаам, и аз сотворю ему благое пред очима моима, и вся елика изберет себе у мене, сотворю тебе.

³⁹И преидоша вси людие иордан, и царь прейде, и целова царь верзеллиа и благослови его, и отпусти его в дом его.

⁴⁰И прейде царь в галгалы, и хамаам прейде с ним, и вси людие иудины провождаху царя и пол людий израилевых.

⁴¹И се, вси мужие израилевы приидоша к царю и реша к царю: что яко украдоша тебе братия нашя мужие иудины, и преведоша царя и дом его чрез иордан, и вси мужие давидовы с ним?

⁴²И отвещаша вси мужие иудины к мужем израилевым и реша: зане ближний нам царь: и почто тако разгневастеся от словеси сем? еда яди ядохом от царя? или дары даде нам, или дани отя от нас?

⁴³И отвещаша мужие израилстии к мужем иудиным и реша: десять рук мы у царя, и в давиде есмы паче тебе, и первенец аз, нежели ты: и почто сице укоряеши мя? и не вменися слово мое прежде мене иуде возвратити царя мне? И отягча слово мужей иудиных паче словес мужей израилевых.