Read Елизаветинская Библия, 1751 2-я Царств 21 Bible Online

2-я Царств 21 - Елизаветинская Библия, 1751 bible

2-я Царств 21

¹И бысть глад на земли во дни давидовы три лета, лето по лету. И вопроси давид лица Господня и рече Господь: над саулом и над домом его обида в смерти кровей его, понеже умертви гаваониты.

²И призва царь давид гаваониты и рече к ним: и гаваонитяне не суть сынове израилевы, но токмо от остатков аморрейских, и сынове израилевы кляшася им: саул же взыска поразити я, внегда поревновати ему по сынех израилевых и иудиных.

³И рече давид ко гаваонитяном: что сотворю вам? и чим умолю, да благословите достояние Господне?

⁴И реша ему гаваонитяне: несть нам сребра или злата со саулом и с домом его, и несть нам мужа умертвити от всего израиля. И рече: что вы глаголете, и сотворю вам?

⁵И реша ко царю: мужа, иже соверши над нами и погна ны, иже умысли потребити ны, потребим его, да не будет во всех пределех израилевых:

⁶дадите нам седмь мужей от сынов его, и повесим их на солнце Господеви в гаваоне саули избранных Господних. И рече царь: аз дам.

⁷И пощаде царь мемфивосфеа, сына ионафаня сына сауля, клятвы ради Господни, яже посреде их и посреде давида и посреде ионафана сына сауля.

⁸И взя царь два сына ресфы дщере аиа, подложницы саули, ихже роди саулу, ермониа и мемфивосфеа, и пять сынов мелхолы дщере саули ихже роди есдриилу сыну верзеллиа моулафиева,

⁹и даде их в руки гаваонитом. И повесиша я на солнце на горе пред Господем, и падоша тамо сии седмь вкупе: тии же умроша во днех жатвы первых, в начале жатвы ячменя.

¹⁰И взя ресфа дщи аиина вретище, и потче е себе при камени, в начале жатвы ячменя дондеже снидоша на них воды Божия с небесе, и не даде птицам небесным днем почити на них, ниже зверем земным нощию.

¹¹И поведаша давиду вся елика сотвори ресфа дщерь аиа, подложница сауля. И истлеша, и взя я дан сын иой, иже от исчадий исполиновых.

¹²И иде давид, и взя кости саули и кости ионафана сына его от мужей сынов иависа галаадскаго, иже украдоша их от стогны вефсани, зане повесиша их тамо иноплеменницы в день, в оньже поразиша иноплеменницы саула в гелвуи.

¹³И вознесе давид кости саули оттуду и кости ионафана сына его, и собра кости повешеных на солнце:

¹⁴и погребоша кости саули и кости ионафана сына его, и кости повешеных на солнце, в земли вениаминове, при краи во гробе киса отца его, и сотвориша вся елика заповеда царь. И послуша Бог земли по сих.

¹⁵И бысть паки брань иноплеменником со израилтяны. И сниде давид и отроцы его с ним, и бишася со иноплеменники: и утрудися давид.

¹⁶И иесвий, иже бе от внук рафаних, (у негоже) бе вес копия его триста сикль веса медяна, и той бе препоясан оружием, и хотяше поразити давида.

¹⁷И поможе ему авесса сын саруин, и избави давида авесса, и порази иноплеменника, и умертви его. Тогда кляшася мужие давидовы, глаголюще: не изыдеши ктому с нами на брань, да не угасиши светилника израилева.

¹⁸И бысть по сих еще брань в гефе со иноплеменники: тогда порази совохей иже от асофы собранныя внуки гигантовы.

¹⁹И бысть паки брань в роме со иноплеменники: и порази елеанан сын ариоргима вифлеемлянин голиафа иже от геффеа, и древо копия его бысть аки навой ткущих.

²⁰И бысть паки брань в гефе: и бе муж от мадона, и персты рук его и персты ног его по шести, числом двадесять четыри: и той родися от рафы,

²¹и уничижи израиля: и уби его ионафан сын сафая брата давидова.

²²Четыри сии родишася внуцы гигантовы рафе в гефе, и падоша от руку давидову и от руку рабов его.