Read Елизаветинская Библия, 1751 2-я Царств 22 Bible Online

2-я Царств 22 - Елизаветинская Библия, 1751 bible

2-я Царств 22

¹И глагола давид ко Господу словеса песни сея в день, в оньже избави и Господь из руки всех враг его и из руки сауловы,

²и рече песнь: Господи, каменю мой и утверждение мое, и избавляяй мя мне:

³Бог мой, хранитель мой будет мне, уповая буду на него: защитник мой и рог спасения моего, заступник мой и прибежище мое спасения моего, от неправеднаго спасеши мя.

⁴Хвальнаго призову Господа, и от враг моих спасуся:

⁵яко одержаша мя болезни смертныя и потоцы беззакония смятоша мя,

⁶болезни смертныя обыдоша мя, предвариша мя жестокости смертныя.

⁷Внегда скорбети ми призову Господа, и к Богу моему воззову, и услышит от храма святаго своего глас мой, и вопль мой внидет во ушы его.

⁸И смятеся и трепетна бысть земля, и основания небесе смятошася и подвигошася, яко прогневася на ня Господь:

⁹взыде дым гневом его, и огнь из уст его пояст: углие возгорешася от него,

¹⁰и преклони небеса и сниде, и мрак под ногама его,

¹¹и вседе на херувимы и лете, и явися на крилу ветреню,

¹²и положи тму закров свой: окрест его селение его, темноту вод огусти во облацех воздушных:

¹³от сияния пред ним разгорешася углие огненнии.

¹⁴И возгреме с небесе Господь, и вышний даде глас свой,

¹⁵и посла стрелы, и расточи их: и блесну молнию, и устраши я:

¹⁶и явишася источницы морстии, и открышася основания вселенныя от запрещения Господня, от дохновения духа гнева его:

¹⁷посла с высоты и прият мя, извлече мя от вод многих:

¹⁸избави мя от враг моих сильных и от ненавидящих мя, яко укрепишася паче мене:

¹⁹предвариша мя в день печали моея. И бысть Господь утверждение мое,

²⁰и изведе мя на широту, и избави мя, яко благоволи во мне.

²¹И воздаде ми Господь по правде моей, и по чистоте руку моею воздаде ми,

²²яко сохраних пути Господни и не нечествовах от Бога моего,

²³яко вся судбы его предо мною, и оправдания его не отступиша от мене,

²⁴и буду непорочен ему, и сохранюся от беззакония моего.

²⁵И воздаст ми Господь по правде моей и по чистоте руку моею пред очима его.

²⁶С преподобным преподобен будеши, и с мужем неповинным неповинен будеши:

²⁷и со избранным избран будеши, и со строптивым развратишися:

²⁸люди же смиренныя спасеши, и очи гордых смириши.

²⁹Яко ты просвещаеши светилник мой, Господи, и Господь просветит ми тму мою:

³⁰яко тобою потеку препоясан, и о Бозе моем прелезу стену.

³¹Крепок, непорочен путь его: глагол Господень державен, разжжен: защитник есть всем уповающым на него.

³²Яко кто крепок разве Господа? и кто творец разве Бога нашего?

³³Крепок укрепляяй мя силою, и положи непорочен путь мой:

³⁴положивый нозе мои яко елени, и на высоких поставляяй мя:

³⁵научаяй руце мои на брань, и положивый лук медян мышца моя.

³⁶И дал ми еси защищение спасения моего, и кротость твоя умножи мя.

³⁷Разширил еси стопы моя подо мною, и не позыбнустеся голени мои.

³⁸Пожену враги моя и потреблю я, и не возвращуся дондеже скончаю их:

³⁹и сокрушу их, и не востанут, и падут под ногама моима.

⁴⁰И укрепиши мя силою на брань, подклониши востающыя на мя под мя.

⁴¹И враги моя дал ми еси хребет, ненавидящыя мя, и умертвил еси их:

⁴²возопиют, и несть помощника, ко Господу, и не услыша их:

⁴³и истних я яко прах земный, яко брение путий истончих я.

⁴⁴И избавиши мя от пререкания людий моих, сохраниши мя в главу языков. И людие, ихже не ведях, работаша ми.

⁴⁵Сынове чуждии солгаша ми, в слух уха услыша мя:

⁴⁶сынове чуждии отвержени будут, и вострепещут во градех своих.

⁴⁷Жив Господь, и благословен хранитель мой, и вознесется Бог мой, хранитель спасения моего.

⁴⁸Крепкий Господь даяй отмщения мне и наказуяй люди под мя,

⁴⁹и изводяй мя от враг моих, и от востающих на мя вознесеши мя, от мужа неправедна избавиши мя.

⁵⁰Сего ради исповемся тебе, Господи, во языцех, и имени твоему воспою:

⁵¹величаяй спасения царя своего, и творяй милость христу своему давиду и семени его до века.