Read Елизаветинская Библия, 1751 2-я Царств 5 Bible Online

2-я Царств 5 - Елизаветинская Библия, 1751 bible

2-я Царств 5

¹И приидоша вся племена израилева к давиду в хеврон и глаголаша ему: се, кости твоя и плоть твоя мы есмы:

²и вчера и третияго дне саулу сущу царю над нами, ты был еси вводяй и изводяй израиля, и рече Господь к тебе: ты упасеши люди моя израиля и ты будеши вождь людем моим израилю.

³И приидоша вси старейшины израилевы к царю в хеврон, и положи им царь давид завет в хевроне пред Господем: и помазаша давида на царство над всем израилем.

⁴Сын тридесяти лет давид внегда воцаритися ему, и царствова четыредесять лет:

⁵седмь лет и месяцей шесть царствова в хевроне над иудою, и тридесять три лета царствова над всем израилем и иудою во Иерусалиме.

⁶И пойде давид и вси мужие его во Иерусалим ко иевусею, живущему на земли той. И реша давиду: не внидеши семо, яко восташа хромии и слепии глаголюще: яко не внидет давид семо.

⁷И взя давид крепость сионю: сия есть град давидов.

⁸И рече давид в день той: всяк поражаяй иевусеа да касается мечем и хромых и слепых и ненавидящих души давидовы. Сего ради рекут: слепии и хромии не внидут в дом Господень.

⁹И седе давид в крепости, и наречеся сия град давидов: и созда той град около от краеградия, и дом свой.

¹⁰И идяше давид идый и величаемь, и Господь вседержитель с ним.

¹¹И посла хирам царь тирский послы к давиду, и древа кедрова, и древоделей, и каменоделателей, и создаша дом давиду.

¹²И уразуме давид, яко уготова его Господь в царя над израилем, и яко вознесеся царство его людий его ради израиля.

¹³И поят давид еще жены и подложницы от Иерусалима по пришествии своем от хеврона: и быша давиду еще сынове и дщери.

¹⁴И сия имена родившымся ему во Иерусалиме: самус и совав, и нафан и соломон,

¹⁵и евеар и елисуе, и нафек и иефие,

¹⁶и елисама и елидае и елифалаф, самае, иесиваф, нафан, галамаан, иеваар, феисус, елифалаф, нагеф, нафек, ианафан и леасамис, ваалимаф, елифааф.

¹⁷И услышаша иноплеменницы, яко помазася давид царь над израилем, и взыдоша вси иноплеменницы искати давида. И услыша давид, и сниде в крепость.

¹⁸Иноплеменницы же приидоша и соединишася во юдоли титанстей.

¹⁹И вопроси давид Господа, глаголя: взыду ли ко иноплеменником? и предаси ли я в руце мои? И рече Господь к давиду: взыди, яко предая предам иноплеменники в руце твои.

²⁰И прииде давид с вышних сечей и посече иноплеменники тамо. И рече давид: изсече Господь враги моя иноплеменники предо мною, якоже пресекаются воды. Сего ради наречеся имя места того свыше сечей.

²¹И оставиша тамо (иноплеменницы) боги своя, и взя их давид и мужие иже с ним (и рече давид сожещи их во огни).

²²И приложиша паки приити иноплеменницы и собрашася на юдоли титанстей.

²³И вопроси давид Господа: взыду ли ко иноплеменником? и предаси ли их в руце мои? И рече ему Господь: не исходи на сретение им, но уклонися от них, и приступиши к ним близ дубравы плача:

²⁴и будет, егда услышиши глас шума от дубравы плача, тогда снидеши к ним, яко тогда изыдет Господь пред тобою сещи на брани иноплеменники.

²⁵И сотвори давид, якоже заповеда ему Господь, и изби иноплеменники от гаваона даже до земли газира.