Read Елизаветинская Библия, 1751 4-я Царств 17 Bible Online

4-я Царств 17 - Елизаветинская Библия, 1751 bible

4-я Царств 17

¹В лето второенадесять ахаза царя иудина, царствова осиа сын илы в самарии над израилем девять лет,

²и сотвори лукавое пред очима Господнима, обаче не якоже царие израилевы, иже беша прежде его.

³И взыде нань саламанассар царь ассирийск . И бысть ему осиа раб и даваше ему дань.

⁴И обрете царь ассирийск во осии неправду, занеже посла послы к сигору царю египетску и не принесе дани царю ассирийску лета того. И осади его царь ассирийский и связа его в храмине темничней.

⁵И прииде царь ассирийск во всю землю (его), и взыде в самарию, и воева ю три лета.

⁶В лето девятое осии взя царь ассирийский самарию, и заведе израилтян во ассирию, и посели их на алаи и на аворе, реках гозанских, и в пределех мидских.

⁷И (сие) бысть, яко согрешиша сынове израилевы Господу Богу своему изведшему их из земли египетския, из под руки фараона царя египетска, и убояшася богов инех,

⁸и ходиша по преданием языков, ихже истреби Господь от лица сынов израилевых, и царие израилевы елицы сотвориша,

⁹и елицы сокрыша сынове израилевы словеса, не тако на Господа Бога своего: и создаша себе высокая во всех градех своих, от столпа стрегущих даже до града тверда,

¹⁰и поставиша себе кумиры и дубравы на всяцем холме высоце и под всяким древом чащным,

¹¹и кадяху тамо на всех высоких, якоже языцы, яже удали Господь от лица их, и сотвориша общники, и начаша яве прогневляти Господа,

¹²и послужиша идолом, о нихже рече им Господь: не сотворите глагола сего Господеви.

¹³И засвидетелствова Господь во израили и во иуде, и руками всех пророк своих всякаго прозорливаго, глаголя: обратитеся от путий ваших лукавых, и сохраните заповеди моя и оправдания моя, и весь закон, егоже заповедах отцем вашым, елика послах им руками раб моих пророков.

¹⁴И не послушаша, и ожесточиша выю свою паче выи отец своих, иже не вероваша Господу Богу своему:

¹⁵и отвергоша завет его и оправдания, яже завеща отцем их и свидений его, елика засвидетелствова им, не сохраниша, и идоша вслед суетных и осуетишася, и вслед языков сущих окрест их, о нихже заповеда Господь их, еже не сотворити по сему:

¹⁶и оставиша заповеди Господа Бога своего и сотвориша себе две юницы слиты, и сотвориша дубравы, и поклонишася всей силе небесней и послужиша ваалу:

¹⁷и превождаху сыны своя и дщери своя чрез огнь, и волхвоваху волхвованием и вражаху: и продашася, еже творити лукавое пред очима Господнима, еже прогневати его.

¹⁸И разгневася Господь на израиля зело и отрину их от лица своего, и не остася, токмо едино колено иудино.

¹⁹И иуда такожде не сохрани заповедий Господа Бога своего: и хождаху по оправданием израилевым, яже сотвориша, и отвергошася Господа.

²⁰И разгневася Господь на все семя израилево и поколеба я, и даде я в руки расхищающым я дондеже отверже я от лица своего.

²¹Яко отторжеся израиль от дому давидова, и поставиша себе царя иеровоама сына наватова: и отрину иеровоам израиля от Господа и введе их во грех великий.

²²И хождаху сынове израилевы по всему греху иеровоамлю, егоже сотвори: не отступиша от него,

²³дондеже отверже Господь израиля от лица своего, якоже глагола Господь рукою всех раб своих пророков. И преселен бысть израиль от земли своея во ассирианы, даже до дне сего.

²⁴И приведе царь ассирийский из вавилона иже от хуфы и от аиа, и от емафа и сепфаруима, и вселени быша во градех самарийских вместо сынов израилевых, и наследиша самарию и вселишася во градех ея.

²⁵И бысть в начале седения их, не убояшася Господа, и пусти на ня Господь львы, и бяху убивающе я.

²⁶И реша царю ассирийску, глаголюще: языки, ихже превел и пресадил еси во градех самарийских, не разумеша суда Бога земли, и посла Господь на них львы, и се, суть убивающе их, яко не разумеша суда Бога земли.

²⁷И заповеда царь ассирийский глаголя: отведите тамо единаго жерца от плененых, да идут и да вселятся тамо, и да просветит их судом Бога земли.

²⁸И отведоша единаго от жерцев ихже взяша от самарии, и седе в вефили, и бе просвещая жрец их, яко да убоятся Господа.

²⁹И беша творяще кийждо язык боги своя: и поставиша я во храмех на высоких, ихже сотвориша самаряне, кийждо язык во градех своих, в нихже живяху.

³⁰И мужие вавилонстии сотвориша сокхоф вениф, и мужие хуфовы сотвориша гигель, и мужие емафовы сотвориша асимаф,

³¹и евее сотвориша авлазер и фарфак и сепфаруим, егда сожигаху сыны своя огнем андрамелеху и анемелеху, богом сепфаруимским.

³²И бяху боящеся Господа: и вселиша мерзости своя во храмех на высоких, ихже сотвориша в самарии, кийждо язык во граде, в немже живяху.

³³И беша боящеся Господа и сотвориша себе жерцы в высоких, и сотвориша себе в храмине высоких и Господа бояхуся, и идолом своим служаху по обычаю языков отюнудуже преселиша их.

³⁴Даже до дне сего тии творяху по обычаю их: не бояхуся Господа, и не творяху по оправданием их, и по суду их, и по закону, и по заповеди, юже заповеда Господь сыном иаковлим, идеже и нарече имя ему израиль.

³⁵И положи Господь с ними завет и заповеда им, глаголя: не убойтеся богов иных и не поклонитеся им, и не послужите им и не пожрите им:

³⁶но токмо Господеви, иже изведе вы из земли египта крепостию великою и мышцею высокою: того убойтеся, и тому поклонитеся, и тому пожрите:

³⁷И оправдания его, и суды его, и закон его, и заповеди, яже написа вам творити, храните во вся дни, и не убойтеся богов иных:

³⁸и завета, егоже завеща с вами, не забывайте: и не убойтеся богов иных,

³⁹но токмо Господа и вашего убойтеся, и той измет вы от всех враг ваших.

⁴⁰И не послушаша сего, но по обычаем своим преждним твориша.

⁴¹И бяху языцы сии боящеся Господа, и изваянным своим служаще: такожде и сынове их и сынове сынов их, якоже сотвориша отцы их, тако творят и до сего дне.