Read Елизаветинская Библия, 1751 4-я Царств 3 Bible Online

4-я Царств 3 - Елизаветинская Библия, 1751 bible

4-я Царств 3

¹И иорам сын ахаавов воцарися над израилем в самарии, в лето осмоенадесять иосафата царя иудина, и царствова лет дванадесять,

²и сотвори лукавое пред очима Господнима: обаче не якоже отец его и не якоже мати его: и разруши капища ваалова, яже сотвори отец его:

³обаче ко греху иеровоама сына наватова, иже введе во грех израиля, прилепися и не отступи от него.

⁴И моса царь моавль бе нокид и даяше дань царю израилеву, сто тысящ агнцев и сто тысящ овнов с рунами.

⁵И бысть по умертвии ахаавли и отвержеся царь моавль царя израилева.

⁶И изыде царь иорам во дни оны от самарии и согляда израиля,

⁷и иде, и посла ко иосафату царю иудину, глаголя: царь моавль отвержеся мене: идеши ли со мною на брань на моава? И рече: взыду: сице мне, якоже и тебе: якоже людие мои, людие твои: якоже кони мои, кони твои.

⁸И рече: киим путем взыдем? И рече: путем пустыни едомския.

⁹И иде царь израилев и царь иудин и царь едомль, и идоша путем седмь дний: и не бе полку воды и скотом сущым с ними.

¹⁰И рече отроком своим царь израилев: о, яко созва Господь три сия цари идущыя предати их в руце моавли.

¹¹И рече иосафат к нему царь иудин: есть ли зде пророк Господень, и вопросим Господа им? и отвеща един отрок царя израилева и рече: зде есть елиссей сын сафатов, иже возливаше воду на руце илиине.

¹²И рече иосафат: есть с ним глагол Господень. И сниде к нему царь израилев и иосафат царь иудин и царь едомль.

¹³И рече елиссей ко царю израилеву: что мне и тебе? иди ко пророком отца твоего и ко пророком матере твоея. И рече ему царь израилев: еда созва Господь три цари, еже предати я в руце моавли?

¹⁴И рече елиссей: жив Господь сил емуже предстою пред ним, яко аще бых не лице иосафата царя иудина аз приял, то воззрел ли бых на тя, и видел ли бых тя?

¹⁵и ныне приведи ми певца. И бысть егда воспеваше певец, и бысть на нем рука Господня,

¹⁶и рече: тако глаголет Господь: сотворите поток сей рвами рвами,

¹⁷яко тако глаголет Господь: не узрите духа, и ниже увидите дождя: и поток сей наполнится воды, и пиете вы и стяжания ваша и скоти ваши:

¹⁸и легко сие пред очима Господнима, и предам моава в руки вашя,

¹⁹и поразите всяк град тверд, и всяко древо благо низложите, и всяк источник воды заградите, и всяку часть благу разбиете камением.

²⁰И бысть заутра восходящей жертве, и се, воды идяху путем едомским, и исполнися воды земля.

²¹И вси моавитяне услышаша, яко взыдоша тридесяти царя братися с ними. И возопиша отвсюду препоясаннии оружием и реша: ох: и сташа у предела.

²²И ураниша заутра, и солнце возсия на воды: и виде моав сопротив воды чермны яко кровь,

²³и рече: кровь сия есть от оружия: и бишася царие, и уби муж искренняго своего: и ныне (гряди) на корысти, моаве.

²⁴И внидоша в полк израилев, израилтяне же восташа. и избиша моавлян: и побегоша от лица их: и внидоша входяще и биюще моава,

²⁵и грады разбиша, и всяку часть благу навергоша мужие камением, и наполниша ю, и всяк источник заградиша, и всяко древо благо изсекоша, донележе оставиша камение стен разбиено: и обступиша пращницы и разбиша его.

²⁶И виде царь моавль, яко укрепися над ним брань, и взя с собою седмь сот мужей со обнаженным оружием, еже просещися ко царю едомску: и не возмогоша.

²⁷И поят сына своего первенца, егоже воцари вместо себе, и вознесе его во всесожжение на стене: и бысть раскаяние великое во израили: и отступиша от него и возвратишася в землю свою.