Read Елизаветинская Библия, 1751 4-я Царств 5 Bible Online

4-я Царств 5 - Елизаветинская Библия, 1751 bible

4-я Царств 5

¹И нееман князь силы сирийския бе муж велий пред господином своим и дивен лицем, яко им даде Господь спасение сирии: и муж бе силен крепостию прокажен.

²И из сирии изыдоша воини и плениша юнотку малу от земли израилевы: и бе пред женою неемановою (служа)

³и рече госпоже своей: о, дабы господин мой был у пророка Божия, иже в самарии, той бы очистил его и проказы его.

⁴И вниде и возвести господину своему и рече: тако и тако глагола юнотка, яже от земли израилевы.

⁵И рече царь сирийский ко нееману: иди, вниди, и послю писание ко царю израилеву. И пойде, и взя в руце свои десять талант сребра и шесть тысящ златник и десять изменяемых риз.

⁶И внесе писание к царю израилеву глаголя: и ныне егда приидет писание сие к тебе, се, послах к тебе неемана раба моего, да очистиши его от проказы его.

⁷И бысть егда прочте писание царь израилев, раздра ризы своя и рече: еда аз Бог есмь, еже мертвити и животворити, яко сей посла и мне, да очищу мужа от проказы его? прочее разумейте и видите, яко се ищет вины ко мне.

⁸И бысть егда услыша елиссеи, яко раздра ризы своя царь израилев, и посла к царю израилеву, глаголя: почто раздрал еси ризы твоя? да приидет ко мне ныне нееман, и да разумеет, яко есть пророк во израили.

⁹И прииде нееман на конех и на колесницех и ста при дверех дому елиссеева.

¹⁰И посла елиссей посланника к нему, глаголя: шед измыйся седмижды во иордане, и возвратится плоть твоя к тебе, и очистишися.

¹¹И разгневася нееман, и отиде, и рече: се, убо глаголах, яко изыдет ко мне, и станет, и призовет во имя Бога своего, и возложит руку свою на место, и очистит проказу:

¹²не благи ли авана и фарфар реки дамасковы паче иордана и всех вод израилевых? не шед ли измыюся в них и очишуся? И уклонися и отиде во гневе.

¹³И приближишася отроцы его и реша ему: аще бы велие слово глаголал пророк тебе, не бы ли сотворил еси? а яко рече к тебе: измыйся, и очистишися.

¹⁴И сниде нееман, и погрузися во иордане седмижды, по глаголу елиссееву: и возвратися плоть его яко плоть отрочате млада, и очистися.

¹⁵И возвратися ко елиссею сам и все ополчение его, и прииде и ста пред ним и рече: се, ныне разумех, яко несть Бога во всей земли, но токмо во израили: и ныне приими благословение от раба твоего.

¹⁶И рече елиссей: жив Господь, емуже предстах пред ним, аще прииму. И понуждаше его взяти, и не послуша.

¹⁷И рече нееман: аще ли не (хощеши взяти), то даждь рабу твоему время, супруг мсков, от земли сея червленыя: яко и сотворит отселе раб твой всесожжения и жертвы богом иным, но Господу единому,

¹⁸по глаголу сему и о словеси сем: и очистит Господь раба твоего, егда внидет господин мой в дом ремманов на поклонение тамо: и той почиет на руку моею, и поклонюся в дому реммани, внегда кланятися ему в дому реммани, и очистит Господь раба твоего по словеси сему.

¹⁹И рече елиссей ко нееману: иди с миром. и отиде от него на хаврафа земли.

²⁰И рече гиезий отрочищь елиссеев: се, пощаде господин мой неемана сирянина сего, еже не взяти от руки его, яже принесе: жив Господь, яко имам тещи вслед его, и возму от него нечто.

²¹И тече гиезий во след нееманов. И виде его нееман текуща вслед себе, и возвратися с колесницы на сретение ему и рече: мир ли?

²²И рече гиезий: мир: господин мой посла мя, глаголя: се, ныне приидоста ко мне два отрочища от горы ефремли от сынов пророчих: даждь убо има талант сребра и две премены риз.

²³И рече нееман: возми два таланта сребра. И взя два таланта во два мешца и две премены риз, и возложи на два отрочиша своя, и несоста пред ним:

²⁴и приидоша в сумраки, и взя от рук их и сокры во храмине, и отпусти мужы.

²⁵И сам вниде и предста господину своему. И рече к нему елиссей: откуду (пришел еси), гиезие? И рече гиезий: не исходил раб твой никаможе.

²⁶И рече к нему елиссей: не ходило ли сердце мое с тобою, и видех, егда возвращашеся муж с колесницы своей во сретение тебе? и ныне взял еси сребро и ризы взял еси, да купиши за них вертограды и маслины и винограды, и овцы и волы, и отроки и отроковицы:

²⁷и проказа нееманова да прильпнет к тебе и к семени твоему во веки. И изыде от лица его прокажен яко снег.