Read Елизаветинская Библия, 1751 1-я Паралипоменон 17 Bible Online

1-я Паралипоменон 17 - Елизаветинская Библия, 1751 bible

1-я Паралипоменон 17

¹И бысть егда обиташе давид в дому своем, и рече давид к нафану пророку: се, аз живу в дому кедрове, кивот же завета Господня под кожами.

²И рече нафан к давиду: все еже в сердцы твоем твори, яко Бог с тобою есть.

³И бысть нощи тоя, и бысть слово Господне к нафану, глаголя:

⁴иди и рцы давиду рабу моему: сия рече Господь: не созиждеши ты мне дому, еже обитати ми в нем:

⁵яко не обитах в дому от дне, в оньже изведох израиля (от земли египетския), даже до дне сего, но бых в скинии и в шатре:

⁶во всех аможе ходих со всем израилем, аще глаголя глаголах коему колену израилеву, имже повелех да пасут люди моя, глаголя: чесо ради не создасте мне дому кедрова?

⁷и ныне тако рцы рабу моему давиду: сия рече Господь вседержитель: аз изях тя от паствы, егда последовал еси стаду, еже быти тебе вождем над людьми моими израилем,

⁸и бых с тобою во всех, идеже ходил еси, и потребих вся враги твоя от лица твоего, и сотворих тебе имя якоже имя великих, иже на земли:

⁹и дах место людем моим израилю, и насадих я, и обитают в нем, и не возскорбят ктому: ни сынове беззакония приложат смирити их якоже от начала

¹⁰и от дний, в няже дах судии людем моим израилю, и смирих вся враги твоя, и возращу тя, и дом созиждет ти Господь:

¹¹и будет егда исполнятся дние твои и почиеши со отцы твоими, и воздвигну семя твое по тебе, еже будет от чрева твоего, и возставлю царство его:

¹²той созиждет мне дом, и укреплю престол его даже до века:

¹³аз буду ему во отца, и той будет мне в сына: и милость мою не отиму от него, якоже отях от бывших прежде тебе:

¹⁴и уверю его в дому моем и во царствии его даже до века, и престол его будет исправлен до века.

¹⁵По всем словесем сим и по всему видению сему тако глаголал есть нафан к давиду.

¹⁶И прииде царь давид, и седе пред Господем, и рече: кто есмь аз, Господи Боже мой? и что дом мой, яко возлюбил мя еси до века?

¹⁷и сия мала суть пред тобою, Боже, и глаголал еси на дом раба твоего (еще) издалеча, и призрел еси на мя яко видение человека, и возвысил мя еси, Господи Боже:

¹⁸что приложит еще давид к тебе еже прославити? и ты раба твоего веси:

¹⁹Господи, раба твоего ради сотворил еси все величие сие и по сердцу твоему, еже знаема сотворити вся величия твоя:

²⁰Господи, несть подобен тебе, и несть Бога разве тебе, по всем елика слышахом ушима нашима,

²¹и несть, якоже людие твои израиль, язык еще на земли, яко пойде Бог избавити люди себе, еже положити имя себе велие и славное, еже изгнати от лица людий твоих, ихже избавил еси от египта, языки:

²²и дал еси люди твоя израиля тебе в люди даже до века, и ты, Господи, был еси им в Бога:

²³и ныне, Господи, слово твое, еже глаголал еси рабу твоему и на дом его, да уверится до века: и сотвори якоже глаголал еси,

²⁴и да уверится и возвеличится имя твое даже до века, глаголющих: Господи, Господи вседержителю, Боже израилев, и дом давида раба твоего да будет исправлен пред тобою:

²⁵ты бо, Господи Боже мой, отверзл еси ухо раба твоего создати ему дом, сего ради обрете раб твой (дерзновение) молитися пред лицем твоим:

²⁶и ныне, Господи, ты еси сам Бог, и глаголал еси к рабу твоему благая сия:

²⁷и ныне начни благословити дом раба твоего, да будет во веки пред тобою: яко ты, Господи, благословил еси, и благослови во веки.